Read Kernewek Oberow 13 Bible Online

Oberow 13 - Kernewek bible

Oberow 13

¹Lemmyn y'n eglos yn Antiogh yth esa profoesi ha dyskadoryon, Barnabas, Simeon henwys Niger, Lukius a Kyrene ha Manaen koweth Herod an tetrargh a'y flogholeth, ha Sowl.

²Hag i ow kordhya an Arloedh hag ow penys, an Spyrys Sans a leveris, ‘Diberthewgh ragov Barnabas ha Sowl rag an gonis ma's gelwis vy.’

³Ytho pan penyssens ha pysi i a worras aga diwla warnedha ha'ga dannvon yn-kerdh.

⁴Rakhenna, dannvenys yn-mes gans an Spyrys Sans, i eth yn-nans dhe Selewsia, hag alena i a woelyas dhe Syprus.

⁵Ha pan dheuthons bys yn Salamis i a bregowthas ger Duw yn synagys an Yedhewon; hag yth esa Yowann gansa rag aga gweres.

⁶Wosa mos der an ynys oll bys Pafos, i a gavas unn gour, pystrier, fals profoes yedhowek, henwys Bar Yesus,

⁷neb esa gans an prokonsul Sergius Pawlus, gour a boell. An gour ma a elwis Barnabas ha Sowl ha hwilas klewes ger Duw;

⁸mes an pystrier Elymas (rag yndella treylys yw y hanow) a sevis er aga fynn, ow hwilas treylya an prokonsul dhiworth an fydh.

⁹Mes Sowl (neb o Powl ynwedh), lenwys a'n Spyrys Sans, ow mires stark orto a leveris,

¹⁰‘A, lenwys a bub toell hag a bub frows, mab an jowl, eskar pub ewnder, a ny vynn'ta hedhi, kamma fordhow ewn an Arloedh?

¹¹Ha lemmyn, otta, yma leuv an Arloedh warnas, ha dall vydhydh heb gweles an howl rag termyn.’ Ha hware niwl ha tewlder a goedhas warnodho hag ev eth a-dro yn-dann hwilas tus dh'y ledya er an leuv.

¹²Ena an prokonsul, ow kweles an pyth a hwarva, a grysis, rag marth bras a'n jeva a dhyskas an Arloedh.

¹³Lemmyn Powl ha'y gowetha a voras dhiworth Pafos ha dos dhe Perga yn Pamfylia; ha Yowann a dhibarthas dhiworta ha dehweles dhe Yerusalem.

¹⁴Mes i eth yn-rag dhiworth Perga ha dos dhe Antiogh a Pisidia; ha dydh sabot i eth y'n synaga hag esedha.

¹⁵Wosa redyans an lagha ha'n brofoesi, routers an synaga a dhannvonas dhedha, ow leverel, ‘Breder, mars eus dhywgh neb ger a gennerth rag an bobel, leverewgh e.’

¹⁶Ytho Powl a sevis yn-bann, hag ow kul sin gans y leuv ev a leveris: ‘Hwi Ysraelysi, ha'n re neb a berth own a Dhuw, goslowewgh.

¹⁷Duw an bobel ma a Ysrael a dhewisas agan tasow ha meurhe an bobel dres aga godrik yn bro Ejyp; ha'y vregh drehevys, ev a's hembronkas mes anedhi,

¹⁸ha dres neb dew-ugens blydhen ev a's porthas y'n difeythtir,

¹⁹ha pan dhistrusa seyth kenedhel yn pow Kanan ev a ros dhedha aga fow avel eretons

²⁰neb peswar kans blydhen ha hanter-kans. Ha wosa an taklow ma ev a ros dhedha breusysi bys yn termyn Samuel an profoes.

²¹Ena i a bysis myghtern, ha Duw a ros dhedha Sowl mab Kish, gour a'n loeth Benyamin, dew-ugens blydhen.

²²Ha wosa y remova, ev a dhrehevis Davydh dhe vos aga myghtern; anodho ev a leveris, ow tustunia, “My re gavas bos Davydh mab Yesse gour war-lergh ow holonn, neb a vynn gul oll ow bodh.”

²³Dhiworth henedh an gour ma Duw re dhros dhe Ysrael, herwydh y ambos, Selwyas Yesu.

²⁴Kyns y dhevones Yowann re bregowthsa besydh a edrek dhe'n bobel oll a Ysrael.

²⁵Mes pan esa Yowann ow kowlwul y resegva, ev a leveris, “Pandr'a dybowgh my dhe vos? Nyns ov vy ev; mes otta, onan a dheu war ow lergh ma nag ov vy gwiw dhe dhigelmi sandalyow y dreys.”

²⁶‘Breder, mebyon agh Abraham, ha'n re yn agas mysk a berth own a Dhuw, dhyn ni ger an selwyans ma re beu dannvenys.

²⁷Rag an re trigys yn Yerusalem ha'ga rewloryon, drefenn na'n aswonnsons, na konvedhes lavarow an brofoesi yw redys pub sabot, orth y vreusi re's kollenwis.

²⁸Kyn na gavsons skila dh'y ladha, i a wovynnas orth Pilat may fe distruys.

²⁹Ha pan gowlwrussens pup-tra re bia skrifys yn y gever, i a'n kemmeras yn-nans dhiworth an wydhenn ha'y worra yn bedh.

³⁰Mes Duw a'n drehevis dhiworth an re varow;

³¹ha lies dydh ev a omdhiskwedhas dhe'n re neb a dhothya yn-bann ganso dhiworth Galile dhe Yerusalem, neb yw lemmyn y dhustunioryon dhe'n bobel.

³²Ha ni a bregoth dhywgh an ambos a dheuth dhe'n tasow,

³³an ambos ma re gollenwis Duw dhyn ni, aga fleghes, ow trehevel Yesu; keffrys dell yw skrifys y'n nessa salm: “Ow mab yth osta, Hedhyw my re'th tineythis.”

³⁴Ha dell y'n drehevis dhiworth an re varow, heb dehweles namoy dhe bodredhes, hemma ev re leveris, “My a re dhis an taklow sur ha sans ambosys dhe Davydh.”

³⁵Rakhenna ynwedh yn salm arall ev a lever, “Ny vynnydh ri dha Sans dhe weles podredhes.”

³⁶Rag Davydh, wosa ev dhe servya bodh Duw yn y henedh y honan, a goskas hag a veu gorrys gans y dasow hag a welas podredhes.

³⁷Mes ev neb a wrug Duw y dhrehevel ny welas podredhes.

³⁸Rakhenna bedhes godhvedhys dhywgh, breder, der an den ma bos gevyans peghosow pregewthys dhywgh,

³⁹hag dredho ev pubonan a grys yw akwitys dhiworth pup-tra oll ma na yllewgh bos akwitys dhiworto dre lagha Moyses.

⁴⁰Rakhenna kemmerewgh with na dheffo warnowgh an pyth yw leverys y'n brofoesi:

⁴¹“Mirewgh, hwi neb a wra ges, kemmerewgh marth, ha kewgh dhe goll, rag yn agas dydhyow my a wra ober, ober kammenn na grysowgh mara'n deriv nebonan dhywgh.” ’

⁴²Hag i ow mos yn-mes, an bobel a's pysis may fe an geryow ma kewsys orta an nessa sabot.

⁴³Ha wosa an kuntelles dhe dhiberth, meur a'n Yedhewon hag a'n broselytys neb a wordhya y'n synaga a holyas Powl ha Barnabas, neb a gewsis orta ha'ga ynnia may pessyens yn gras Duw.

⁴⁴An nessa sabot ogas oll an sita o kuntellys rag goslowes orth ger Duw.

⁴⁵Mes pan welsons an routhow, an Yedhewon a veu lenwys a avi, hag i a gontradias, ow kewsel blasfemi erbynn an pyth a veu leverys gans Powl.

⁴⁶Hag ow kewsel yn hardh, Powl ha Barnabas a leveris, ‘Res o bos ger Duw kewsys dhywgh hwi yn kynsa; mes a-ban y'n skonyowgh hag omvreusi agas honan anwiw a vewnans heb diwedh, otta, ni a dreyl dhe'n Jentilys.

⁴⁷Rag yndella an Arloedh re'gan gorhemmynnis: “My re'th ordenas avel golow dhe'n Jentilys, rag dri selwyans bys yn penn pella an norvys.” ’

⁴⁸Ha pan glewas an Jentilys hemma, i a lowenhas hag enora ger an Arloedh, ha myns o ragordenys dhe vewnans heb diwedh a grysis,

⁴⁹hag yth esa ger an Arloedh ow lesa der oll an pow.

⁵⁰Mes an Yedhewon a ynnias war an benynes a vri neb a wordhya Duw ha gwelhevin an sita, ha dalleth helghyans erbynn Powl ha Barnabas, ha'ga thewlel mes a'ga ranndir.

⁵¹Mes i a shakyas an doust dhiworth aga threys er aga fynn, ha dos dhe Ikonium.

⁵²Ha'n dhyskyblon a veu lenwys a lowena hag a'n Spyrys Sans.