Read Kernewek Oberow 14 Bible Online

Oberow 14 - Kernewek bible

Oberow 14

¹Lemmyn dell hwarva yn Ikonium, i a entras war-barth yn synaga an Yedhewon ha kewsel yn maner may krysis routh veur, ha Yedhewon ha Grekys.

²Mes an Yedhewon neb o diskryjygyon a ynnias war an Jentilys, ow treylya aga brys erbynn an vreder.

³Rakhenna hirneth i a wortas, ow kewsel yn hardh rag an Arloedh neb a dhustunias dhe er y ras, ow kul dhe arwoedhyow ha marthusyon hwarvos der aga diwla.

⁴Mes rynnys o pobel an sita hag yth esa rann anedha gans an Yedhewon, mes re erell gans an abesteli.

⁵Ha pan veu gwrys assay hag a'n Jentilys hag a'n Yedhewon gans aga routers dh'aga thebeldhyghtya ha dh'aga labydha,

⁶i a glewas anodho ha diank dhe Lystra ha Derbe, sitys a Lykaonia, ha dhe'n pow a-dro,

⁷hag y'n tylleryow na i a bregowthas an aweyl.

⁸Lemmyn yn Lystra yth esa unn gour dialloes y dhewdroes, evredhek dhiworth torr y vamm, na gerdhsa bythkweth.

⁹An den ma a woslowas orth Powl ow kewsel; ha Powl, ow hwithra warnodho hag ow kweles y'n jeva fydh may fe yaghhes,

¹⁰a leveris, ughel y lev, ‘Sav yn-bann war dha dreys.’ Hag ev a lammas yn-bann ha kerdhes.

¹¹Ha pan welas an routhow an pyth a wrussa Powl, i a dhrehevis aga lev, ow leverel yn Lykaonek, ‘An duwow re dhiyskynnas dhyn yn hevelep denel’,

¹²ha Barnabas i a henwis Zeus, ha Powl Hermes, drefenn y vos an penn-arethor.

¹³Hag oferyas Zeus, dhe neb esa y dempel a-rag an sita, a dhros terewi ha garlontow dhe'n porthow ha mynnes sakrifia gans an routhow.

¹⁴Mes an abesteli Barnabas ha Powl a glewas, hag ow skwardya aga dillas i a fyskas yn-mes yn mysk an routh, ow karma,

¹⁵‘A wer, prag y hwrewgh hwi an taklow ma? Ni ynwedh yw gwer, a'n keth gnas avelowgh, ha ni a bregoth rag agas treylya dhiworth an taklow koeg ma dhe Dhuw bew, neb a wrug an nev ha'n nor ha'n mor ha pup-tra eus ynna.

¹⁶Y'n henedhow tremenys ev a asas an kenedhlow oll dhe vos yn aga fordhow aga honan;

¹⁷byttegyns ny asas y honan heb dustuni, rag dader ev a wra, ow ri dhywgh glaw a nev ha prysyow ow toen frut, ow lenwel agan kolonnow a voes hag a heudhder.’

¹⁸Hag ow leverel an taklow ma, skant y lettsons an routhow a sakrifia dhedha.

¹⁹Mes Yedhewon dhiworth Antiogh hag Ikonium a dheuth di, ha wosa dendil skoedhyans an routhow i a labydhas Powl ha'y dhraylya mes a'n sita, ow tybi ev dhe vos marow.

²⁰Byttegyns, ha'n dhyskyblon owth omguntell a-dro dhodho, ev a sevis yn-bann hag entra y'n sita. Ha ternos ev eth yn-rag gans Barnabas dhe Derbe.

²¹Ha pan bregowthsens an aweyl dhe'n sita na ha gul meur a dhyskyblon, i a dhehwelis dhe Lystra ha dhe Ikonium ha dhe Antiogh,

²²ow surhe spyrys an dhyskyblon ha'ga ynnia pesya y'n fydh, ha leverel y tegoedh dhyn dre lies galar entra yn gwlaskor Duw.

²³Ha pan ordensens ragdha henavogyon yn pub eglos, gans pysadow ha penys i a's kommendyas dhe'n Arloedh yn neb a gryssens.

²⁴Ena i a bassyas dre Pisidia ha dos dhe Pamfylia,

²⁵ha pan gowssens an ger yn Perga i a dheuth yn-nans dhe Attalia

²⁶hag alena i a woelyas dhe Antiogh, may fiens kommendys dhe ras Duw rag an ober re gowlwrussens.

²⁷Ha pan ens i devedhys i a guntellas war-barth an eglos ha derivas an taklow re wrussa Duw dredha, ha fatell igorsa daras a fydh dhe'n Jentilys.

²⁸Hag i a wortas pol'ta gans an dhyskyblon.