Read Kernewek Oberow 16 Bible Online

Oberow 16 - Kernewek bible

Oberow 16

¹Hag ynwedh ev a dheuth yn-nans dhe Derbe ha dhe Lystra. Hag otta, yth esa ena unn dyskybel henwys Timothi, mab Yedhowes kryjyk mes y das o Grek.

²Ev o gerys-da gans an vreder yn Lystra hag Ikonium.

³Powl a vynnas orto mos yn-rag ganso, hag ev a'n kemmeras ha'y drodreghi drefenn an Yedhewon esa y'n tylleryow na; rag i oll a wodhva bos y das Grek.

⁴Lemmyn, hag i ow mos der an sitys, i a dherivas dhedha an erviransow ordenys gans an abesteli ha'n henavogyon yn Yerusalem, ma's obayens.

⁵Ytho an eglosyow a veu krevhes y'n fydh ha kressya yn aga niver pub dydh.

⁶Hag i eth dre rannvro Frygia ha Galatia, lettys gans an Spyrys Sans rag kewsel an ger yn Asia.

⁷Mes pan dhothyens bys yn Mysia, i a assayas mos yn Bithynia, ha Spyrys Yesu ny ros dhedha kummyas;

⁸rakhenna, ow tremena dre Mysia, i a dheuth dhe Troas.

⁹Ha gwelesigeth a omdhiskwedhas dhe Powl y'n nos: yth esa gour a Masedonia ow sevel, hag ev a'n pysis ow leverel, ‘Deus a-dreus bys yn Masedonia, ha gweres ni.’

¹⁰Ytho, pan welsa ev an welesigeth, hware ni a ombareusis rag mos yn-rag dhe Masedonia, ha ni sertan Duw dh'agan gelwel rag pregoth an aweyl dhedha.

¹¹Hag ow mora dhiworth Troas, ni a woelyas yn resegva gewar dhe Samothrake, ha ternos dhe Neapolis,

¹²hag alena dhe Filippi, hag yw pennsita y'n rann na a Masedonia, trevesigeth romanek[19]. Ha ni a wodrigas y'n sita ma niver a dhydhyow.

¹³Y'n sabot ni eth yn-mes a'n porth ryb avon, le mayth esa, dell dybsyn, tyller a bysadow, hag owth esedha ni a gewsis orth an benynes o kuntellys.

¹⁴Hag yth esa unn venyn henwys Lydia, marchont yn purpur, a'n sita Thyatira neb o gordhyores Duw, ow koslowes; ha'n Arloedh a igoras hy golonn dhe attendya an taklow kewsys gans Powl.

¹⁵Ha pan veu besydhys ha gensi hy mayni, hi a'gan pysis, ow leverel, ‘Mar synsowgh hwi ow bos lel dhe'n Arloedh, dewgh dhe ostya y'm chi’; ha hi a ynnias warnan.

¹⁶Ha dell hwarva, ha ni ow mos dhe'n tyller a bysadow, unn vaghteth ha gensi spyrys a dhewinieth a dheuth er agan pynn, neb a dhri meur a wayn dh'y mestrysi ow targana fortunyow.

¹⁷Hag owth holya Powl ha ni, hi a grias, ow leverel, ‘An dus ma yw gwesyon Duw an ughella, neb a bregoth dhywgh fordh selwyans.’

¹⁸Hi a wre hemma lies dydh. Mes Powl eth ha bos anniys meur, hag ow treylya ev a leveris dhe'n spyrys, ‘My a'th ergh yn hanow Yesu Krist dos yn-mes anedhi.’ Hag ev a dheuth yn-mes y'n keth eur na.

¹⁹Ha'y mestrysi, ow kweles bos gyllys govenek aga gwayn, a dhalghennas Powl ha Silas ha'ga thenna dhe blen an varghas a-rag an rewloryon,

²⁰hag orth aga dri dhe'n justisyow, i a leveris, ‘Yma'n dus ma, yw Yedhewon, ow trobla agan sita,

²¹hag i a bregoth devosow nag yw lafyl ragon ni Romanyon, na dhe dhegemmeres na dhe wul.’

²²Ha'n routh a sevis gansa er aga fynn, ha'n justisyow ow tenna dhiworta aga dillas a worhemmynnis may fens kastigys,

²³ha wosa gorra warnedha meur a strokosow i a's tewlis yn prison, owth erghi dhe'n jayler ma's gwittha gans rach.

²⁴Pan dhegemmeras arghadow a'n par na, ev a's tewlis y'n downa prison ha karghara aga threys y'n stokkys.

²⁵Hag a-dro dhe hanter-nos yth esa Powl ha Silas ow pysi hag ow kormel Duw dre hymnys, hag yth esa an brisnoryon ow koslowes orta;

²⁶hag a-dhesempis yth esa dorgrys meur, may feu kryghyllys selyow an prison; hag a-dhistowgh an darasow oll a veu igerys, ha kolmow pub huni a veu lowsys.

²⁷Pan dhifunas an jayler ha gweles bos igerys darasow an prison, ev a dennas yn-mes y gledha, ha parys o dhe omladha, ow tybi y tianksa an brisnoryon.

²⁸Mes Powl a elwis, ughel y lev, ow leverel, ‘Na wra drog vyth dhiso jy dha honan, rag yth eson ni oll omma.’

²⁹Hag ow kovynn golowys, ev a fyskas a-ji ow krena ha koedha a-rag Powl ha Silas,

³⁰hag orth aga hembronk yn-mes ev a leveris, ‘Syrrys, pandr'a goedh dhymm dhe wul may fiv selwys?’

³¹Hag yn-medhons i, ‘Krys y'n Arloedh Yesu, ha ty ha'th vayni a vydh selwys.’

³²Hag i a gewsis ger an Arloedh dhodho ev ha dh'y vayni oll.

³³Y'n keth eur a'n nos ev a's kemmeras ha golghi aga goliow, hag ev hag oll y deylu a veu besydhys heb hokya.

³⁴Ev a's dros yn-bann dh'y ji ha gorra boes a-dheragdha, hag ev hag oll y vayni a lowenhas y tothya ev ha bos kryjyk yn Duw.

³⁵Pan dheuth an jydh, an justisyow a dhannvonas an soedhogyon, ow leverel, ‘Delivrewgh an dus na.’

³⁶Ha'n jayler a dherivas an geryow ma dhe Powl, ‘An justisyow re dhannvonas may fowgh hwi delivrys. Lemmyn, ytho, dewgh yn-mes ha kewgh yn kres.’

³⁷Mes yn-medh Powl dhedha, ‘I re'gan kastigas a-rag an bobel, heb agan bos dampnys, ha ni burjysi romanek, i a'gan tewlis yn prison. Ha lemmyn i a wra agan pellhe yn-dann gel? Ny wrons, devri, mes dens aga honan dh'agan dri yn-mes.’

³⁸An soedhogyon a dherivas an geryow ma dhe'n justisyow. Hag own a's teva pan glewsons aga bos burjysi romanek,

³⁹hag i a dheuth ha dihares dhedha, hag i a's dros yn-mes ha'ga fysi a vos mes a'n sita.

⁴⁰Ha wosa mos dhiworth an prison, i eth dhe ji Lydia, hag ow kweles an vreder i a's kennerthas, ha mos mes a'n sita.