Read Kernewek Oberow 18 Bible Online

Oberow 18 - Kernewek bible

Oberow 18

¹Wosa an taklow ma ev a asas Athenys ha dos dhe Korinth.

²Ev a gavas unn Yedhow henwys Akwila, genesik a Pontus, neb re dhothya degynsow a Itali gans Priskilla y wreg, drefenn Klawdius dhe worhemmynna dhe'n Yedhewon oll mayth omdennens dhiworth Rom. Hag ev a dheuth dhedha,

³ha drefenn y vos a'n keth kreft ev a drigas gansa, hag yth esa owth oberi; rag gwrioryon a dyldow ens i a'ga kreft.

⁴Ha pub sabot ev a dhadhla y'n synaga, hag ev a assaya treylya ha Yedhewon ha Grekys.

⁵Ha pan dheuth Silas ha Timothi yn-nans a Masedonia, Powl a omri moy ha moy dhe'n ger[20], ow toen dustuni dhe'n Yedhewon bos Yesu an Krist.

⁶Mes pan sevsons er y bynn ha kewsel blasfemi, ev a shakyas y dhillas ha leverel dhedha, ‘Re bo agas goes war agas penn agas honan; glan ov vy. Alemma rag, mos dhe'n Jentilys a wrav.’

⁷Hag ev a omdennas alena ha mos dhe ji gour henwys Titius Yustus, gordhyer Duw, mayth esa y ji ryb tenewen an synaga.

⁸Lemmyn Krispus, rewler an synaga, ha ganso oll y vayni, a grysis y'n Arloedh, ha meur a dus Korinth, pan glewsons, a grysis hag a veu besydhys.

⁹Hag y'n nos, an Arloedh a leveris dhe Powl yn gwelesigeth, ‘Na borth own, mes kows ha na daw,

¹⁰rag yth esov vy genes, ha denvyth ny wra omsettya er dha bynn rag dha bystiga, drefenn bos dhymm meur a dus y'n sita ma.’

¹¹Hag yth esa trigys ena blydhen ha hwegh mis, ow tyski ger Duw yn aga mysk.

¹²Mes pan o Gallio prokonsul Aghaia, an Yedhewon, unys aga brys, a omsettyas erbynn Powl ha'y dhri dhe'n barr,

¹³ow leverel, ‘An gour ma a ynni tus gordhya Duw yn fordhow erbynn an lagha.’

¹⁴Ha Powl owth igeri y anow rag kewsel, yn-medh Gallio dhe'n Yedhewon, ‘Mar pe kas a dhrogober po hager vileni, A Yedhewon, herwydh reson my a dhegemmersa agas krodhvol;

¹⁵mes rag bos hemma mater a wovynnow a-dro dhe eryow ha henwyn ha'gas lagha agas honan, ev dyghtyewgh agas honan; ny vynnav vy bos breusyas a'n taklow ma.’

¹⁶Hag ev a's chasyas dhe-ves a'n barr.

¹⁷Ena i oll, ow talghenna Sosthenes, rewler an synaga, a'n gweskis a-rag an barr; mes ny wrug Gallio vri orth nagonan a'n taklow ma.

¹⁸Wosa gortos lies dydh moy, Powl a leveris farwell gans an vreder ha goelya dhe-ves dhe Syria, ha ganso Priskilla hag Akwila, wosa ev dhe dreghi y wols yn Kenkrea; rag y feu dhodho ambos.

¹⁹I a dheuth bys yn Efesus hag ev a's gasas ena, mes ev eth yn synaga ha dadhla gans an Yedhewon.

²⁰Ha pan y'n pysis a wortos pella, ny assentyas,

²¹mes ow kasa farwell ev a leveris, ‘Dos dhywgh arta a wrav, mar mynn Duw’; hag ev a woelyas dhiworth Efesus.

²²Pan dhothya dhe Sesarea, ev eth yn-bann ha salusi an eglos, hag ena ev eth yn-nans dhe Antiogh,

²³ha pan spensa termyn ena, ev eth yn-rag a le dhe le dre bow Galatia hag ena dre Frygia, ow krevhe an dhyskyblon oll.

²⁴Hag y teuth dhe Efesus unn Yedhow henwys Apollos, genesik a Aleksandria, gour freth ha skentel y'n skryptors.

²⁵Ev re bia dyskys yn fordh an Arloedh, ha gwresek y spyrys ev a gewsi ha dyski yn kewar an taklow a-dro dhe Yesu, kyn hwodhva unnsel besydh Yowann;

²⁶hag ev a dhallathas kewsel yn hardh y'n synaga; ha pan y'n klewas Priskilla hag Akwila, i a'n kemmeras ha styrya moy kewar dhodho fordh Duw.

²⁷Ha pan vynnas ev mos yn Aghaia, an vreder a'n kennerthas hag i a skrifas dhe'n dhyskyblon may hwrellens y wolkomma; hag ev devedhys, ev a weresas meur an re a wrussa krysi dre ras,

²⁸rag gans nerth ev a argyas orth an Yedhewon a-rag an bobel, ow kul prov der an skryptors bos Yesu an Krist.