Read Kernewek Oberow 19 Bible Online

Oberow 19 - Kernewek bible

Oberow 19

¹Lemmyn dell hwarva, hag Apollos yn Korinth, Powl a dremenas der an ranndiryow ughella ha dos dhe Efesus, may kavas dyskyblon,

²hag ev a leveris dhedha, ‘A gemmersowgh hwi an Spyrys Sans pan gryssowgh?’ Hag yn-medhons i dhodho, ‘Hwath ny glewsyn ni mars eus Spyrys Sans.’

³Hag yn-medh ev, ‘Yn py besydh, ytho, a vewgh hwi besydhys?’ I a leveris, ‘Yn besydh Yowann.’

⁴Ha Powl a leveris, ‘Yowann a besydhyas gans an besydh a edrek, ow leverel dhe'n bobel may kryssens ynno ev neb esa ow tos war y lergh, henn yw, yn Yesu.’

⁵Pan glewsons hemma, i a veu besydhys yn hanow an Arloedh Yesu.

⁶Ha Powl ow korra y dhiwla warnedha, an Spyrys Sans a dheuth warnedha, hag i a dhallathas kewsel yn tavosow ha profoesa.

⁷Yth esa anedha a-dro dhe dhewdhek gour yn somm.

⁸Ev a entras y'n synaga ha dres tri mis ev a gewsi yn hardh, ow tadhla hag owth assaya aga dri dhe gryjyans a-dro dhe wlaskor Duw.

⁹Mes drefenn bos re anedha penn-kales ha diskryjyk, ow kewsel drog a-dro dhe'n Fordh a-rag an routh, ev a omdennas dhiworta hag ow kemmeres an dhyskyblon ganso, yth esa ow tadhla pub dydh yn skol Tyrannus.

¹⁰Hemma eth yn-rag dres diw vlydhen, may klewas oll trigoryon Asia ger an Arloedh, ha Yedhewon ha Grekys.

¹¹Ha Duw a wrug oberow marthys dres eghenn dre dhiwla Powl,

¹²may hwarva, pan veu dres dhe'n glevyon lienyow-dorn po apronyow ha re bia orth y groghen, aga klevesow a's gasas hag yth eth an spyrysyon drog yn-mes anedha.

¹³Mes re a'n hudoryon yedhowek gwandrek a assayas gelwel war hanow an Arloedh dres an re na hag ynna spyrysyon drog, ow leverel, ‘My a'th charj dre Yesu neb yw pregewthys gans Powl.’

¹⁴Yth esa dhe unn Skeva, Yedhow hag arghoferyas, seyth mab esa ow kul hemma,

¹⁵ha'n spyrys drog a worthybis ha leverel dhedha, ‘Yesu devri a aswonnav, ha Powl a gonvedhav, mes piw owgh hwyhwi?’

¹⁶Ha'n den hag ynno an spyrys drog a lammas warnedha, ow kul maystri warnedha ha'ga fetha, may fisons yn-mes a'n chi na, noeth ha goliys.

¹⁷Ha hemma a dheuth ha bos godhvedhys dhe vyns o trigys yn Efesus, ha Yedhewon ha Grekys, hag own a goedhas warnedha oll, ha hanow an Arloedh Yesu a veu meurhes.

¹⁸Ha meur a'n re neb a grysis a dheuth ha yes ha derivas aga oberow.

¹⁹Ha niver da a'n re neb a wre pystri a guntellas aga lyvrow ha'ga leski a-rag an bobel oll; hag i a reknas an pris anedha, hag yth o hanter-kans mil vath a arghans.

²⁰Y'n for' ma ger an Arloedh a gressyas meur hag a veu nerthek.

²¹Pan veu kollenwys an taklow ma, ervirys o Powl yn y spyrys mos dhe Yerusalem, ow tremena dre Masedonia hag Aghaia, hag ev a leveris, ‘Wosa mos di, y koedh dhymm gweles Rom ynwedh.’

²²Ha wosa dannvon dew a'y venysters, Timothi hag Erastus, yn Masedonia, ev a wortas pols yn Asia.

²³Lemmyn yth esa a-dro dhe'n termyn na meur a dros a-dro dhe'n Fordh.

²⁴Rag unn gour henwys Demetrius, gweythor arghans, a wre templow Artemis a arghans, hag ev a dhre gwayn da dhe'n greftoryon.

²⁵Ev a guntellas an re ma, ha gansa an weythoryon yn ober a'n par na, hag yn-medh ev, ‘Gwer, hwi a gonvedh ni dhe gavoes agan pygans dhiworth an ober ma,

²⁶ha lemmyn, dell welowgh ha klewes, hag yn Efesus keffrys hag yn oll Asia ogasti, an Powl ma re dreylyas ha dynya routh veur, ow leverel a-dro dhe dhuwow gwrys gans diwla, nag yns duwow mann.

²⁷Lemmyn yma peryll agan kreft dhe gelli y hanow da, mes ynwedh y fydh tempel an dhuwes veur Artemis akontys heb bri, mes moy es henna, y fydh hy braster lehes, neb yw gordhys gans oll Asia ha'n bys.’

²⁸Pan glewsons hemma, ha lenwys a gonnar, i a skrijas, ‘Meur yw Artemis an Efesianys.’

²⁹Ha'n sita a veu lenwys a dheray, hag yn keskolonn i a fyskas y'n wariva, ow talghenna Gayus hag Aristarghus, tus a Masedonia, kowetha vyaj Powl.

³⁰Powl a vynnas entra yn kuntelles an bobel, mes ny ros an dhyskyblon kummyas dhodho.

³¹Re a'n Asiarghow, neb o y gowetha, a dhannvonas dhodho, orth y ynnia na vettha y honan mos y'n wariva.

³²Re a arma unn dra, re a arma neppyth arall, rag yth esa an kuntelles yn deray, ha ny wodhya an rann vrassa anedha prag yth omguntellsens.

³³Re a'n routh a ros gorhemmynnow dhe Aleksander, neb re bia herdhys yn-rag gans an Yedhewon; hag Aleksander, ow kwevya y leuv, a vynnas styrya an dra dhe'n kuntelles.

³⁴Mes pan konvedhsons y vos Yedhow, i a skrijas, unys aga lev, dres moy es dew our, ‘Meur yw Artemis an Efesianys.’

³⁵Ha wosa koselhe an routh, skrifennyas an sita a leveris, ‘Gwer Efesus, piw eus na woer bos sita an Efesianys gwithyas tempel an Artemis veur ha'y imaj a goedhas dhiworth nev?

³⁶Drefenn bos an taklow ma heb aga nagha, res yw dhywgh bos kosel heb gul travyth diswar.

³⁷Hwi re dhros an wer ma nag yns ladron a demplys na ny wrussons blasfemi orth agan[21] duwes.

³⁸Rakhenna, mars eus dhe Demetrius ha'n greftoryon ganso krodhvol war nebonan, igerys yw an breuslysyow, hag yma prokonsuls: drens kuhudhans an eyl erbynn y gila.

³⁹Mar hwilowgh neppyth moy, ervirys vydh y'n kuntelles lafyl.

⁴⁰Rag yn tevri, yth eson ni yn peryll a guhudhans drefenn an tervans gwrys hedhyw, heb skila hag a yllyn ni ri rag an kuntellyans direwl ma.’

⁴¹Pan lavarsa hemma, ev a dhannvonas dhe-ves an kuntelles.[22]