Read Kernewek Oberow 20 Bible Online

Oberow 20 - Kernewek bible

Oberow 20

¹Pan hedhis an freudh, Powl a elwis war-barth an dhyskyblon ha'ga hennertha, ha wosa gasa kummyas anedha ev eth yn-rag dhe Masedonia.

²Ha ev ow mos der an ranndiryow, ev a's kennerthas gans lies ger, hag ev a dheuth yn Pow Grek,

³may spenas tri mis. Hag ev parys dhe woelya dhe Syria, bras a veu gwrys er y bynn gans an Yedhewon, hag ev a erviras dehweles dre Masedonia.

⁴Hag yth eth ganso Sopater mab Pyrrhus a Berea, Aristarghus ha Sekundus a Thessalonika, Gayus a Derbe, Timothi, ha Tyghikus ha Trofimus a Asia.

⁵An re ma eth yn-rag ha'gan gortos yn Troas;

⁶ha ni a woelyas dhiworth Filippi wosa dydhyow an bara heb goell, ha kyns penn pymp dydh ni a dheuth dhedha yn Troas, may hwortsyn seyth dydh.

⁷Y'n kynsa dydh a'n seythun, pan omguntellsyn rag terri bara, yth esa Powl ow kewsel orta; drefenn y vos ervirys mos dhe-ves ternos, ev a besyas kewsel bys yn hanter-nos.

⁸Lemmyn yth esa lies lugarn yn stevell y'n soler mayth en ni kuntellys.

⁹Hag unn gour yowynk henwys Ewtyghus, esa owth esedha y'n fenester, eth ha bos fethys dre gosk down ha Powl ow kewsel pella. Fethys dre gosk, ev a goedhas yn-nans dhiworth an tressa leur hag ev a veu kemmerys yn-bann yn farow.

¹⁰Mes Powl eth yn-nans hag omblegya dresto, hag orth y wrynya ev a leveris, ‘Na vedhewgh yn ankres, rag yma y vewnans ynno.’

¹¹Ena Powl a yskynnas ha wosa terri an bara ha dybri, ev a besyas keskewsel bys yn bora; ena ev eth yn-mes.

¹²Hag i a dhros dhe-ves an gour yowynk yn few, ha konfortys meur ens i.

¹³Ni eth yn-rag dhe'n gorhel ha goelya dhe Assos, mayth esa war agan towl dri Powl y'n gorhel, rag yndella ev re ordensa, ervirys mos di war droes.

¹⁴Lemmyn pan vetsyn orto yn Assos, ni a'n dros y'n gorhel ha dos dhe Mitylene.

¹⁵Ha ternos ow koelya alena ni a dheuth a-dal Kios, ha'n jydh ow siwya ni a dremenas ogas dhe Samos, ha ternos ni a dheuth dhe Miletus.

¹⁶Rag Powl re ervirsa goelya dres Efesus, ma na spenna termyn yn Asia; rag yth esa ow fistena, mar kalla bos yn Yerusalem erbynn dy' Fenkost.

¹⁷Dhiworth Miletus ev a dhannvonas dhe Efesus, ow kelwel henavogyon an eglos.

¹⁸Ha pan dheuthons dhodho, ev a leveris dhedha: ‘Hwi a woer, dhiworth an kynsa dydh may teuth vy yn Asia, fatell o genev pup-prys ha my genowgh,

¹⁹ow servya an Arloedh gans pub uvelder ha dagrow, ha prevyansow a goedhas warnav dre vrasow an Yedhewon,

²⁰ha my heb hokya ow terivas pup-tra o dhe les dhywgh, hag orth agas dyski a-rag tus hag y'n chiow,

²¹hag ow tustunia keffrys dhe Yedhewon ha dhe Grekys a-dro dhe edrek a-rag Duw ha fydh yn agan Arloedh Yesu.

²²Lemmyn otta, kelmys gans an Spyrys, yth esov vy ow mos dhe Yerusalem, heb godhvos an pyth a wra dos er ow fynn ena,

²³marnas an Spyrys Sans a dheg dustuni dhymm yn pub sita, ow leverel bos kolmow ha galarow orth ow gortos.

²⁴Mes ny akontyav ow bewnans a vri vyth dhymmo vy, unnweyth a kallen kowlwul ow resegva, ha'n menystrans a dhegemmeris dhiworth an Arloedh Yesu, rag doen dustuni dhe'n aweyl a ras Duw.

²⁵‘Ha lemmyn otta, my a woer na vydh nagonan ahanowgh ow kweles ow fas na fella, mayth yth vy a-derdro yntredhowgh ow pregoth an wlaskor.[23]

²⁶Rakhenna my a dheg dustuni dhywgh y'n jydh hedhyw ow bos glan a woes tus oll;

²⁷rag ny omwithis vy rag derivas dhywgh oll an gusul a Dhuw.

²⁸Kemmerewgh with a'gas honan hag a'n para oll ma'gas gorras an Spyrys Sans avel gorwoelysi rag bugelya eglos Duw[24], a waynyas der y woes y honan.

²⁹My a woer y teu wosa ow mones dhe-ves bleydhi gwyls, heb sparya an para,

³⁰hag yn-mes a'gas mysk agas honan gwer a sev ow kewsel taklow gorth rag tenna dhe-ves an dhyskyblon war aga lergh.

³¹Rakhenna bedhewgh war, ow perthi kov na astelas vy keski pub huni dres teyr blydhen nos ha dydh, gans dagrow.

³²Ha lemmyn my a'gas kommend dhe'n Arloedh ha dhe er y ras, a yll drehevel ha ri an eretons yn mysk oll an re sanshes.

³³Ny hwensis vy arghans nag owr na dillas denvyth;

³⁴hwi agas honan a woer an dhiwla ma dhe venystra dhe'm edhommow vy hag edhommow an re esa genev.

³⁵Yn pup-tra my a dhiskwedhas dhywgh, y telledh, ow lavurya yndella, sokra an re wann ha perthi kov a eryow an Arloedh Yesu, dell leveris ev, “Moy gwynnvys yw ri ages degemmeres.” ’

³⁶Ha pan lavarsa an taklow ma, ow mos war benn-dewlin gansa oll, ev a bysis.

³⁷Hag yth esa meur a oelva gans oll, hag ow koedha war gonna Powl i a ammas dhodho,

³⁸duwenhes a'n moyha drefenn an pyth a lavarsa, na welens y fas arta. Hag i a'n hembronkas dhe'n gorhel.