Read Kernewek Oberow 26 Bible Online

Oberow 26 - Kernewek bible

Oberow 26

¹Yn-medh Agrippa dhe Powl, ‘Kummyas yw res dhis a gewsel a-barth dhis dha honan.’ Ena Powl a ystynnas y leuv ha gul y dhefens:

²‘A-dro dhe'n taklow oll mayth ov vy kuhudhys gans an Yedhewon, myghtern Agrippa, my a breder bos gwynn ow bys ow kul ow defens a-ragos hedhyw,

³dres oll drefenn bos meur dha skians yn pub usadow ha disputyans a'n Yedhewon. Rakhenna my a'th pys a woslowes orthiv gans perthyans.

⁴‘Ytho, oll an Yedhewon a woer gis ow bewnans a-dhia'm yowynkneth, bewnans spenys dhiworth an dalleth yn mysk ow henedhel hag yn Yerusalem.

⁵I re'm aswonnis termyn hir, mar mynnons desta, my dhe vewa avel Farise, herwydh an sekt an moyha straght yn agan kryjyans.

⁶Ha lemmyn my a sev ow pos breusys, drefenn ow govenek y'n dedhewadyow gwrys gans Duw dh'agan tasow

⁷may hwayt agan dewdhek loeth dos dhodho, ow kordhya yn tiwysyk nos ha dydh. A-dro dhe'n govenek ma yth ov kuhudhys gans an Yedhewon, A vyghtern.

⁸Prag yth yw breusys genowgh avel pyth na yllir y grysi, Duw dhe dhrehevel an re varow?

⁹‘Yn hwir, kyns my ow honan o sur y koedhva dhymm gul lies tra erbynn hanow Yesu a Nazareth.

¹⁰Hag yn tevri my a wrug hemma yn Yerusalem; ha pan dhegemmersen awtorita dhiworth an bennoferysi my a geas yn prison meur a'n syns, ha pan vons dampnys dhe'n mernans my a dewlis ow raglev er aga fynn,

¹¹owth assaya aga ynnia dhe wul blasfemi; ha my a's kessydhyas yn fenowgh dres oll an synagys, hag y'm sorr konneryek er aga fynn my a's helghyas bys yn sitys estren.

¹²‘Hag ow kul hemma, yth esen vy ow vyajya dhe Damaskus gans awtorita ha kummyas an bennoferysi;

¹³a-dro dhe hanter-dydh y'n hyns, A vyghtern, my a welas golow dhiworth nev, splanna ages an howl, ow kolowi a-dro dhymm hag a-dro dhe'n re esa ow vyajya genev.

¹⁴Pan goedhsen ni oll dhe'n dor, my a glewas lev ow leverel dhymm yn Ebrow, “Sowl, Sowl, prag y'm helghydh? Kales yw ragos potya orth an garthowyow.”

¹⁵Hag yn-medhav, “Piw osta, Arloedh?” Hag yn-medh an Arloedh, “Yesu ov vy, neb a helghydh.

¹⁶Mes sav yn-bann, ha sav war dha dreys; rag my re omdhiskwedhas dhis rag an entent ma, dha ordena gwas ha dustunier hag a'n taklow a welsys hag a'n taklow may hwrav omdhiskwedhes dhis ynna,

¹⁷orth dha livra dhiworth dha bobel ha dhiworth an Jentilys, dhe neb my a'th tannvon,

¹⁸rag igeri aga dewlagas, may treyllyons dhiworth tewlder dhe wolow, ha dhiworth awtorita Satnas dhe Dhuw, may tegemmerrons gevyans a beghosow, ha kevrenn yn mysk an re sanshes dre fydh ynnov vy.”

¹⁹‘Rakhenna, myghtern Agrippa, nyns en vy diwostydh dhe'n welesigeth nevek,

²⁰mes my a dherivas yn kynsa dhe'n re na yn Damaskus hag ena yn Yerusalem ha dres oll an pow a Yudi, y koedh dhedha kemmeres edrek ha treylya dhe Dhuw, ow kul oberow dhe edrek.

²¹Drefenn an taklow ma, an Yedhewon a settyas dalghenn ynnov y'n tempel hag assaya ow ladha.

²²Bys y'n jydh ma my re gavas sokor dhiworth Duw, ha rakhenna my a sev ow tustunia orth byghan ha bras, heb leverel travyth marnas an taklow a leveris ha'n brofoesi ha Moyses y hwrens hwarvos,

²³y koedh dhe Grist godhav, may fe an kynsa, der y dhasserghyans dhiworth an re varow, dhe dherivas golow ha dh'agan pobel ha dhe'n Jentilys.’

²⁴Hag ev ow kul y dhefens y'n for' ma, Festus a leveris, ughel y lev, ‘Mes a'th rewl osta, Powl; yma meur a lyenn orth dha dreylya gorboellek.’

²⁵Mes yn-medh Powl, ‘Nyns ov vy mes a'm rewl, bryntinna Festus, mes my a gews geryow a wiryonedh ha skians da.

²⁶Rag an myghtern a gonvedh a-dro dhe'n taklow ma, hag orto ev my a gews, hardh ow lavarow, rag sur ov vy nag yw nagonan a'n taklow ma kudhys dhiworto, rag ny veu hemma gwrys yn kornell.

²⁷Myghtern Agrippa, a grysydh jy an brofoesi? My a woer ty dhe grysi.’

²⁸Hag yn-medh Agrippa dhe Powl. ‘Hwath spys berr, ty a wra ow dynya dhe vos ha bos Kristyon.’

²⁹Hag yn-medh Powl, ‘Spys po berr po hir, my a bys Duw, ty hag ynwedh keniver a'm glew hedhyw mayth ellons ha bos kepar ha my, marnas an chaynys ma.’

³⁰Ena an myghtern a sevis yn-bann, hag ynwedh an governour ha Bernise ha'n re esedhys gansa,

³¹ha pan esens owth omdenna, i a leveris an eyl orth y gila, ‘Nyns usi an den ma ow kul travyth ow tervynn an mernans po chaynys.’

³²Hag yn-medh Agrippa dhe Festus, ‘An den ma a allsa bos livrys, mar ny alwa orth Sesar.’