Read Kernewek Oberow 27 Bible Online

Oberow 27 - Kernewek bible

Oberow 27

¹Pan veu ervirys ni dhe woelya dhe Itali i a dhaskorras Powl ha prisnoryon erell dhe benn-kangour a'n kohort awgustanek, henwys Yulius.

²Ow mos a-bervedh yn gorhel a Adramyttium o parys dhe woelya dhe'n porthow ryb an arvor a Asia, ni a voras, ha genen Aristarghus, den Masedonek a Thessalonika.

³Ha ternos ni a diras dhe Sidon, ha Yulius, ow tyghtya Powl yn kuv, a ros dhodho kummyas dhe vones dh'y gowetha may kaffa sokor.

⁴Ow mora alena ni a woelyas yn-dann goskes a Syprus drefenn bos an gwynsow er agan pynn,

⁵hag ow koelya dres an mor usi ryb Silisia ha Pamfylia ni a dheuth yn-nans dhe Myra yn Lykia.

⁶Hag ena an penn-kangour a gavas gorhel a Aleksandria ow koelya dhe Itali, ha'gan gorra a-bervedh ynno.

⁷Ni a woelyas yn lent niver a dhydhyow ha dos gans kaletter ryb Knidus, hag a-ban na'gan gasas an gwyns, ni a woelyas yn-dann goskes a Kreta ryb Salmone,

⁸hag ow koelya rybdho gans kaletter ni a dheuth dhe unn tyller henwys Skovvaow Teg, ogas dhe'n sita Lasea.

⁹Ha pan dremensa meur a dermyn, ha drefenn bos an vyaj peryllus lemmyn, rag nans o an Penys[27] passys seulabrys, Powl a's kusulyas,

¹⁰ow leverel dhedha, ‘Gwer, my a wel y fydh an vyaj gans peryll ha koll meur dhe'n karg ha dhe'n gorhel, keffrys dh'agan bewnans.’

¹¹Mes an penn-kangour a wrug vri moy orth an lewyader ha mester an gorhel ages orth an pyth a leveris Powl.

¹²Drefenn nag o an porth 'vas rag spena an gwav ena, an rann vrassa anedha a erviras mora alena, ow kwaytya dos dhe Feniks war neb kor rag spena an gwav; porth a Kreta o, a-dal an soth-west ha'n north-west.

¹³Ha pan hwythas yn hweg gwyns a'n soth, i a dybis y hallens kowlwul aga thowl; rakhenna ow trehevel ankor i a woelyas ryb an arvor a Kreta.

¹⁴Mes kyns nep-pell gwyns hwyflyn henwys Ewrakylon[28] a weskis dhiworth an ynys,

¹⁵ha'n gorhel a veu kemmerys ha ny yllys y dreylya erbynn an gwyns, ha ni a omros dhe vos degys yn-rag.

¹⁶Hag ow resek yn-dann skoes ynysik henwys Klawda[29], skant ny yllsyn ni kavoes skath an gorhel yn-dann agan galloes.

¹⁷Wosa hy hemmeres a-bervedh, i a wrug devnydh a lovonow rag kelmi an gorhel a-derdro, hag ow perthi own i dhe resek war drethennow Syrtis, i a worras yn-nans an ankor-tenna hag yndella i a veu degys.

¹⁸Mes drefenn agan bos tewlys a-dro yn fell gans an annawel, ternos i a dewlis an karg mes a'n gorhel

¹⁹ha'n tressa dydh gans aga diwla aga honan i a dewlis[30] daffar an gorhel yn-mes.

²⁰Pan na omdhiskwedhas na howl na ster lies dydh, hag yth esa hager-awel a-has ow kweskel, pub govenek y fedhen ni sawys a veu kellys.

²¹A-ban viens i heb boes termyn hir[31], Powl a sevis yn aga mysk ha leverel, ‘Gwer, y koedhvia dhywgh siwya ow husul na wrellewgh goelya dhiworth Kreta, ha goheles an arnow ma ha'n koll ma.

²²Lemmyn my a'gas kusul a wellhe agas cher, rag ny vydh koll a'gas bewnans, saw unnsel a'n gorhel.

²³Rag nyhewer y sevis rybov el a'n Duw neb a'm piw hag ynwedh neb a servyav,

²⁴ow leverel, “Na borth own, Powl, res yw dhis sevel a-rag Sesar, hag otta, Duw re ros dhis oll an re ma usi ow koelya genes.”

²⁵Rakhenna, gwellhewgh agas cher, A wer; rag my a grys Duw, y fydh kepar dell veu leverys dhymm.

²⁶Mes res vydh dhyn resek war-dir war neb ynys.’

²⁷Lemmyn pan dheuth an peswardhegves nos ha ni ow pos degys a-dhedro yn mor Adria, a-dro dhe hanter-nos an marners a dybis i dhe dhos nes dhe dir.

²⁸Pan dowlsons an plemmik i a gavas ugens gourhys; pan mos yn-rag nebes pella i a dewlis arta ha kavoes pymthek gourhys.

²⁹Ow perthi own yth ellen war-dir yn arvor meynek, i a dewlis peswar ankor yn-mes a'n aros ha pysi may teffa an bora.

³⁰Ha pan assayas an marners diank dhiworth an gorhel i a worras an skath yn-nans y'n mor, ow tolos i dhe ervira tewlel ankoryow yn-mes a'n flour-rag,

³¹Powl a leveris dhe'n penn-kangour ha dhe'n soudoryon, ‘Marnas an re ma a worta y'n gorhel ny yllowgh hwi bos sawys.’

³²Ena an soudoryon a droghas lovonow an skath ha'y gasa dhe goedha dhe-ves.

³³Pan esa bora ow talleth, Powl a's bysis i oll a gemmeres boes, ow leverel, ‘Hedhyw nans yw an peswardhegves dydh mayth esowgh ow kortos, ow pesya heb boes; ny dhyb'sowgh travyth.

³⁴Rakhenna my a'gas pys a gemmeres boes, drefenn bos hemma rag agas sawyans, rag blewenn a'n penn a dhenvyth ahanowgh ny vydh kellys.’

³⁵Pan lavarsa an taklow ma, ev a gemmeras bara, a ros grasow dhe Dhuw a-ragdha oll, a'n torras hag a dhallathas dybri.

³⁶Ena i oll a dheuth ha bos da aga cher, hag i a gemmeras boes.

³⁷Oll war-barth yth en ni dew kans hwetek ha tri-ugens y'n gorhel.

³⁸Wosa bos lenwys a voes, i a skavhas an gorhel, ow tewlel an gwaneth yn-mes y'n mor.

³⁹Pan dheuth an jydh, ny aswonnsons an tir, mes i a aspias unn pleg-mor ha dhodho treth mayth ervirsons gorra an gorhel, mar kallens.

⁴⁰Pan droghsens dhe-ves an ankoryow, i a's gasas y'n mor; y'n keth termyn i a lowsyas lovonow an lewyow, halya an goel a-rag dhe'n gwyns ha mos yn-rag dhe'n treth.

⁴¹Mes kechys vons gans dew fros an eyl ow resek erbynn y gila, hag i a worras an gorhel war-dir. An penn a-rag eth ha bos stag, ha n yllys y vovya, mes an delergh a veu terrys dhe demmyn dre nerth an tonnow.

⁴²Lemmyn yth o towl an soudoryon ladha an prisnoryon ma na dhianka denvyth anedha ow neuvya;

⁴³mes an penn-kangour, ow mynnes sawya Powl, a wrug aga difenn na gowlwrellens aga thowl, ha gorhemmynna dhe'n re a wodhva neuvya lamma yn-mes a 'n gorhel kynsa ha mos dhe'n tir,

⁴⁴ha dhe'n re erell siwya, re anedha war blenkys ha re war rannow an gorhel. Hag yndella, dell hwarva, i oll a veu dres yn saw dhe'n tir.