Read Kernewek Oberow 28 Bible Online

Oberow 28 - Kernewek bible

Oberow 28

¹Wosa agan bos sawys, ena ni a dhiskudhas bos an ynys henwys Melita[32].

²Ha'n deythyogyon a dhiskwedhas dhyn kuvder dres eghenn; rag i a wrug tanses ha'gan wolkomma ni oll drefenn an glaw dhe dhalleth koedha ha yeyn o.

³Pan wrug Powl kuntell breghas a geunys ha'y worra y'n tan, sarf a dheuth yn-mes drefenn an toemmder hag omdakkya orth y leuv.

⁴Ha pan welas an deythyogyon an sarf ow kregi a'y leuv, i a leveris an eyl dh'y gila, ‘Yn tevri, an den ma yw moldrer re beu sawys dhiworth an mor, mes ny wrug Ewnder y asa yn few.’

⁵Ena ev a shakyas an kreatur y'n tan heb godhav drog vyth;

⁶mes i a dhesevas y hwre hwythfi po a-dhesempis koedha marow. Mes wosa i dhe wortos hag aspia termyn hir, ha gweles na'n darva travyth koynt, i a dreylyas aga howses ha leverel y vos duw.

⁷Lemmyn a-dro dhe'n le na yth esa tiryow dhe benn-soedhek an ynys henwys Publius; ev a wrug agan wolkomma ha ri dhyn gwest yn hel tri dydh.

⁸Dell hwarva, yth esa tas Publius a'y wrowedh ow kodhav terthennow ha'n skit. Powl a entras dhodho ha pysi, ow korra y dhiwla warnodho, ha'y sawya.

⁹Wosa hemma, an re erell y'n ynys ha gansa klevesow a dheuth ynwedh ha bos sawys.

¹⁰I a'gan enoras yn lies fordh, ha pan en ni parys dhe woelya i a worras a-bervedh an taklow mayth esa edhomm dhyn. gen 3 9

¹¹Wosa tri mis ni a voras yn gorhel a Aleksandria, re spensa an gwav y'n ynys, merkys gans sin an Evellyon[33].

¹²Ni a diras yn Syrakus, may hwortsyn tri dydh.

¹³Alena, ow koelya a-dro ni a dheuth dhe Rhegium. Wosa unn jydh, gwyns a'n soth a sevis ha'n nessa dydh ni a dheuth dhe Puteoli

¹⁴may kevsyn breder, ha ni a veu gelwys gortos gansa seyth dydh. Hag y'n for' ma ni a dheuth dhe Rom.

¹⁵An vreder neb a glewsa a-dro dhyn a dheuth alena bys yn Forum Appius ha Tri Thavern rag metya orthyn. Orth aga gweles, Powl a rassas dhe Dhuw ha kemmeres kolonn.

¹⁶Ha pan dheuthen yn Rom, Powl a veu gesys dhe driga y honan, gans an souder esa orth y witha.

¹⁷Dell hwarva, wosa tri dydh, ev a elwis war-barth ledyoryon an Yedhewon; ha pan omguntellsens ev a leveris dhedha, ‘Breder, kyn na wrussen vy travyth erbynn an bobel na hengovyow an tasow, daskorrys veuv yn Yerusalem, prisner dhe'n Romanyon.

¹⁸Pan wrussens ow apposya i a vynnas ow delivra, drefenn na gavsons ynnov travyth ow tervynn an mernans.

¹⁹Pan gewsis an Yedhewon erbynn hemma, res o dhymm porres gelwel orth Sesar, kyn na'm beu kuhudhans vyth dhe wul erbynn ow fobel.

²⁰Rag an acheson ma, ytho, my re'gas gelwis, rag agas gweles ha kewsel orthowgh, drefenn a-barth govenek Ysrael yw, ow bos kelmys gans an chayn ma.’

²¹Hag i a leveris dhodho, ‘Ny dhegemmersyn lytherow a Yudi a-dro dhis, na ny dheuth omma denvyth a'n vreder ha derivas po kewsel drog vydh y'th kever.

²²Mes ni a garsa klewes genes an pyth a brederydh; rag yn hwir, a-dro dhe'n sekt ma ni a woer y kewsir yn pub le er y bynn.’

²³I a settyas dydh ganso, hag i a dheuth yn y ji, meur aga niver. A vyttin bys yn gorthugher ev a styryas dhedha, ow toen dustuni a-dro dhe wlaskor Duw, hag owth assaya gul dhedha krysi a-dro dhe Yesu, dhiworth lagha Moyses keffrys dhiworth an brofoesi.

²⁴Re anedha eth ha bos treylys yn aga howses der an taklow leverys, mes re erell ny gryssons.

²⁵Hag ow tisputya an eyl orth y gila, i a dhallathas omdenna, heb bos yn akord an eyl gans y gila, wosa Powl dhe leverel unn ger diwettha, ‘Yn ewn y kewsis an Spyrys Sans der an profoes Ysay orth agas tasow, ow leverel,

²⁶“Ke dhe'n bobel ma dhe leverel: Hwi a wra klewes heb konvedhes kammenn, ha hwi a wra mires heb gweles kammenn.

²⁷Rag kolonn an bobel ma res eth ha bos talsogh, ha ny glewons gans aga diwskovarn, hag i re dhegeas aga dewlagas; ma na wrellens gweles nevra gans aga lagasow, na klewes gans aga skovornow, na konvedhes gans aga holonn, ha treylya, may hwrylliv vy aga sawya.”

²⁸Rakhenna bedhes godhvedhys dhywgh bos an selwyans ma a Dhuw dannvenys dhe'n Jentilys, hag i a wra goslowes.’

²⁹Wosa ev dhe leverel hemma an Yedhewon eth dhe-ves, ow tadhla yn feur an eyl gans y gila.

³⁰Yth esa ev trigys ena diw vlydhen dhien yn y ji-wobrenys y honan, hag ev a wolkomma kekemmys a dheffa dhodho,

³¹ow pregoth gwlaskor Duw hag ow tyski an taklow a-dro dhe'n Arloedh Yesu Krist, gans pub hardhder ha heb lett.