Read Kernewek Oberow 3 Bible Online

Oberow 3 - Kernewek bible

Oberow 3

¹Lemmyn yth esa Peder ha Yowann ow mos yn-bann dhe'n tempel dhe'n eur a bysadow, an nawves eur.

²Hag yth esa neb unn gour degys, evredhek a-dhia vrys y vamm, neb a worrens pub dydh ryb porth an tempel henwys Fethus, dhe wovynn alusen dhiworth an re esa owth entra y'n tempel.

³Ow kweles Peder ha Yowann parys dhe entra y'n tempel ev a bysis kavoes alusen.

⁴Peder, ow hwithra warnodho gans Yowann a leveris, ‘Mir orthyn.’

⁵Hag ev a viras orta gans rach, ow kwaytya degemmeres neppyth dhiworta.

⁶Mes yn-medh Peder, ‘Ny'm beus nag arghans nag owr; mes an pyth a'm beus, henna a rov dhis: yn hanow Yesu Krist a Nazareth, sav, ha kerdh.[3]’

⁷Hag orth y dhalghenna er an leuv dhyghow ev a'n drehevis; hag a-dhistowgh y dhewdroes hag y dhewufern a veu gwrys krev,

⁸hag ow lamma yn-bann ev a sevis ha kerdhes hag entra gansa y'n tempel, ow kerdhes ha lamma ha gormel Duw.

⁹An dus oll a'n gwelas ev ow kerdhes hag ow kormel Duw;

¹⁰hag i a'n aswonnis avel an den o esedhys ryb Porth Fethus an tempel rag alusen, ha lenwys vons a varth ha sowdhan drefenn an pyth a hwarvia dhodho.

¹¹Hag ev ow synsi Peder ha Yowann, an dus oll, meur aga marth, a boenyas war-barth dhedha dhe'n golovenva henwys Portal Solomon.

¹²Pan welas Peder henna, ev a gewsis orth an bobel, ‘Gwer Ysrael, prag yma marth dhywgh a hemma, po prag y hwithrowgh warnan kepar ha pan y'n gwrussyn kerdhes der agan nerth po agan sansoleth agan honan?

¹³Duw Abraham, Ysak ha Yakob[4], Duw agan tasow, a ros golewder dh'y was[5] Yesu, neb a dhaskorrsowgh ha nagha dherag Pilat pan ervirys o y livra.

¹⁴Mes hwi a naghas an Sans ha Gwiryon, ha govynn moldrer dhe vos grontys dhywgh,

¹⁵ha hwi a ladhas an Awtour a vewnans, neb a veu drehevys gans Duw dhiworth an re varow; dhe henna dustunioryon on ni.

¹⁶Ha'y hanow, dre fydh yn y hanow, a wrug krev an gour ma neb a welowgh hag aswonn, ha'n fydh dredho ev a ros dhodho an yeghes ma a-dheragowgh hwi oll.

¹⁷‘Ha lemmyn, breder, my a woer hwi dhe oberi dre dhiskians, kepar dell wrug agas rewloryon ynwedh,

¹⁸mes yndella Duw a gollenwis an taklow a dharganas ev dre anow an brofoesi oll, y Grist dhe wodhevel.

¹⁹Rakhenna kemmerewgh edrek, ha treylyewgh may fo defendys dhe-ves agas peghosow,

²⁰may teffo dhiworth golok an Arloedh prysyow a dhifresyans ha may tannvonno ev an Krist ragordenys ragowgh, henn yw Yesu.

²¹Y telledh nev dh'y gemmeres bys yn prysyow daskorrans pup-tra oll, dell gewsis Duw dre anow y brofoesi sans nans yw pell.

²²Yn tevri, Moyses a leveris, “An Arloedh agas Duw a dhrehav ragowgh profoes dhiworth agas breder, avelov vy; hwi a wra goslowes orto yn pup-tra a lavarro dhywgh.

²³Hag y hwer, pub enev na wrello goslowes orth an profoes na dhe vos distruys yn tien mes a'n bobel.”

²⁴Hag oll an brofoesi neb re gewsis, dhiworth Samuel ha'n re neb a dheuth war y lergh, i ynwedh a dharganas an dydhyow ma.

²⁵Hwi yw mebyon an brofoesi ha'n kevambos a wrug Duw gans agan tasow, ow leverel dhe Abraham, “Y'th has pub teylu a'n norvys a vydh bennigys.”

²⁶Ragowgh hwi yn kynsa, Duw a dhrehevis y was[6], ha'y dhannvon rag agas benniga orth agas treylya dhe-ves, yn kettep penn, dhiworth agas drogoberow.’