Read Kernewek Oberow 4 Bible Online

Oberow 4 - Kernewek bible

Oberow 4

¹Hag i ow kewsel orth an dus, an oferysi ha kapten an tempel ha'n Sadukeow a dheuth bys dhedha,

²meur anes, drefenn i dhe dhyski an dus ha pregoth yn Yesu an dasserghyans dhiworth an re varow.

³I a's dalghennas ha'ga gorra yn gwith bys an vorow; rag nans o hi gorthugher.

⁴Mes meur a'n re neb a glewas an ger a grysis, ha niver an wer a dheuth ha bos a-dro dhe bymp mil.

⁵Lemmyn ternos y hwarva bos kuntellys yn Yerusalem aga rewloryon ha'ga henavogyon ha'ga skribys,

⁶hag Annas an arghoferyas ha Kayfas ha Yowann hag Aleksander ha kemmys o a'n teylu an arghoferyas,

⁷ha pan y's gorrsens yn aga mysk, i a wovynnas, ‘Dre by galloes po yn py hanow y hwrussowgh hwi hemma?’

⁸Ena Peder, lenwys a'n Spyrys Sans, a leveris dhedha, ‘Rewloryon a'n bobel ha henavogyon,

⁹mars on ni apposys hedhyw a-dro dhe ober da gwrys dhe dhen anyagh, fatell veu yaghhes an den,

¹⁰bedhes godhvedhys dhywgh hwi oll ha dhe'n bobel oll a Ysrael, yn hanow Yesu Krist a Nazareth, neb a growssowgh, neb a wrug Duw y dhrehevel dhiworth an re varow, y'n hanow ma an den ma a sev yn yagh a-dheragowgh.

¹¹Hemm yw “an men a veu skonys genowgh hwi, an weythoryon, re dheuth ha bos pennmen an korn.”

¹²Ha nyns eus selwyans yn denvyth arall, rag nyns eus ken hanow yn-dann nev res yn mysk tus may tegoedh dhyn bos selwys.’

¹³Pan welsons kolonnekter Peder ha Yowann, ha konvedhes aga bos tus dhidhysk ha leg, yth esa marth dhedha, hag i a aswonnis y fiens gans Yesu,

¹⁴ha drefenn i dhe weles an den re bia yaghhes ow sevel gansa, ny allsons i leverel travyth erbynn henna.

¹⁵Ytho, pan arghsens dhedha dhe vos yn-mes a'n konsel, i a omgusulyas an eyl gans y gila,

¹⁶ow leverel, ‘Pandr'a yllyn ni dhe wul gans an dus ma? Rag apert yw oll dhe drigoryon Yerusalem bos arwoedh varthys gwrys dredha, ha ny yllyn ni hy nagha,

¹⁷mes ma na vo derivys a-les dhe voy orth an bobel, gwren aga godros na lavarrons na fella y'n hanow ma dhe dhenvyth.’

¹⁸Hag i a's gelwis hag a erghis dhedha na gowssons na dyski mann yn hanow Yesu.

¹⁹Mes Peder ha Yowann a worthybis ha leverel dhedha, ‘Mars yw ewn dherag Duw goslowes orthowgh hwi yn le orth Duw, hwi breusiwgh;

²⁰rag ny yllyn ni omwitha rag kewsel a-dro dhe'n taklow re welsyn ha klewes.’

²¹Ha pan y's godrossens pella, i a's livras; ny gavsons fordh vyth dh'aga hessydhya, drefenn an bobel; rag yth esa i oll ow ri gordhyans dhe Dhuw a-dro dhe'n pyth a hwarvia;

²²rag an den a hwarvia dhodho an arwoedh ma a yaghheans o moy es dew-ugens bloedh.

²³Pan vons livrys, i eth dh'aga thus aga honan hag i a dherivas pup-tra a lavarsa an bennoferysi ha'n henavogyon dhedha.

²⁴Ha pan y'n klewsons, i a dhrehevis aga lev oll war-barth dhe Dhuw ha leverel, ‘Arloedh, neb a wrug nev ha nor, ha'n mor ha pup-tra ynna,

²⁵neb a leveris gans an Spyrys Sans dre anow agan tas Davydh dha was,[7] “Prag y feu an Jentilys konneryek, hag y tevisyas an poblow taklow euver?

²⁶Myghternedh an norvys a dheuth, ha'n rewloryon a omguntellas war-barth erbynn an Arloedh hag erbynn y Untys ev.”

²⁷Rag yn hwir y'n sita ma[8] Herod ha Pontius Pilat gans Jentilys ha poblow Ysrael a omguntellas erbynn dha was[9] sans Yesu, neb a wrussys y untya,

²⁸rag gul an pyth a ragdhestnas dha leuv ha'th towl may fe gwrys.

²⁹Ha lemmyn, Arloedh, mir orth aga godrosow ha gront dhe'th wesyon kewsel dha er gans pub kolonnekter,

³⁰ha ty owth ystynn dha leuv rag yaghhe, may fo gwrys arwoedhyow ha marthusyon dre hanow dha was[10] sans Yesu.’

³¹Hag i ow pysi, an tyller mayth ens i kuntellys a veu kryghyllys, hag i oll a veu lenwys a'n Spyrys Sans, hag i a gewsis ger Duw gans kolonnekter.

³²Lemmyn routh an re a grysi o unnverhes yn kolonn hag enev, ha denvyth ny leveris bos an pythow a berghennas dhodho ev y honan, mes pup-tra o kemmyn dhedha.

³³Ha gans nerth meur an abesteli a dhegi aga dustuni a dhasserghyans an Arloedh Yesu, hag yth esa gras meur warnedha i oll.

³⁴Rag nyns o nagonan edhommek yn aga mysk; rag kemmys o perghennogyon tiryow po chiow a's gwertha, ha dri pris an taklow gwerthys

³⁵ha'y worra orth treys an abesteli; ha rynnys veu dhe gettep onan herwydh y edhomm.

³⁶Ha Yosep, henwys gans an abesteli Barnabas (treylys, henn yw ‘mab konfort’) Levyas, genesik a Syprus,

³⁷neb a'n jeva park, a'n gwerthas hag ev a dhros an pris ha'y worra orth treys an abesteli.