Read Kernewek Oberow 7 Bible Online

Oberow 7 - Kernewek bible

Oberow 7

¹Ha'n arghoferyas a wovynnas, ‘Yw gwir an taklow ma?’

²Hag yn-medh ev: ‘Breder ha Tasow, goslowewgh. An Duw a wolewder a omdhiskwedhas dhe Abraham hag ev yn Mesopotamia, kyns ev dhe driga yn Haran,

³hag a leveris dhodho, “Ke yn-rag mes a'th tir hag a'th neshevin, ha deus y'n tir a dhiskwedhav dhis.”

⁴Ena ev eth mes a bow an Kaldeanys ha triga yn Haran. Hag alena, wosa y das dhe verwel, Duw a'n tennas yn-mes y'n tir ma mayth esowgh hwi trigys lemmyn.

⁵Hwath ny ros dhodho eretons ynno, na kyn fe troesla, mes ev a dhedhewis y ri rag perghennogeth dhodho ev ha dh'y henedh war y lergh, kyn nag esa flogh dhodho.

⁶Ha Duw a gewsis yndella, y fedha y henedh alyons yn tir tus erell; hag i a's gwre kethyon ha'ga thebeldhyghtya dres peswar kans blydhen;

⁷“Ha my a wra breusi an genedhel a servyons”, yn-medh Duw, “ha wosa an taklow ma i a wra dos yn-mes, hag i a wra ow gordhya y'n tyller ma.”

⁸Hag ev a ros dhodho kevambos a drodreghi; hag Abraham a dhineythis Ysak, ha'y drodreghi dhe'n ethves dydh, hag Ysak a dheuth ha bos tas Yakob, ha Yakob a dheuth ha bos tas an dewdhek ugheldas.

⁹‘Ha'n ugheldasow, lenwys a avi, a werthas Yosep yn Ejyp; mes yth esa Duw ganso,

¹⁰hag ev a'n sawyas mes a'y boenvos oll, ha ri dhodho favour ha furneth dherag Faro myghtern Ejyp, neb a'n ordenas governour dres Ejyp ha dres y goskordh oll.

¹¹Lemmyn y teuth divoetter dres oll Ejyp ha Kanan, ha poenvotter meur, ha ny ylli agan tasow kavoes boes.

¹²Mes pan glewas Yakob bos ys yn Ejyp, ev a dhannvonas yn-rag agan tasow an kynsa gweyth;

¹³ha'n nessa gweyth Yosep a veu aswonnys gans y vreder, ha Faro a wodhya a-dro dhe deylu Yosep.

¹⁴Ena Yosep a dhannvonas ha gelwel Yakob y das ha'y neshevin oll, pymthek enev ha tri-ugens.

¹⁵Ytho Yakob eth yn-nans dhe Ejyp, hag ev ha'gan tasow a verwis,

¹⁶hag a veu degys dhe Shekem ha gorrys y'n bedh a brenas Abraham a bris arghans dhiworth mebyon Hamor yn Shekem.

¹⁷‘Pan nesas termyn an dedhewadyow a ros Duw dhe Abraham, an bobel a devis hag a veu lieshes yn Ejyp,

¹⁸bys pan sevis ken myghtern dres Ejyp, na aswonnis Yosep.

¹⁹Ev a dhyghtyas agan agh yn fel, hag arwaska agan tasow, ow kul dhedha gorra aga fleghesigow yn-mes ma na vens gwithys yn few.

²⁰Y'n termyn ma y feu Moyses genys, ha teg o a-wel dhe Dhuw. Ev a veu megys tri mis yn chi y das,

²¹ha pan veu gorrys yn-mes, myrgh Faro a'n kemmeras yn-bann ha'y veythrin avel hy mab hy honan.

²²Ha Moyses a veu dyskys yn oll skentoleth an Ejyptianys, ha nerthek o yn y eryow ha'y oberow.

²³‘Mes pan o dew-ugens bloedh, y teuth yn y golonn mos dhe weles y vreder, mebyon Ysrael.

²⁴Pan welas onan anedha ow pos kammdhyghtys, ev a dheuth dh'y weres, hag ow kweskel an gour ejyptek, ev a dhiallas an gour a veu kammdhyghtys.

²⁵Lemmyn ev a dybis y vreder dhe gonvedhes Duw dhe ri selwyans dhedha der y leuv; mes ny gonvedhsons.

²⁶Ha ternos ev a omdhiskwedhas dhedha, hag i owth omladh, hag ev a assayas aga unnverhe yn kres, ow leverel, “Gwer, breder owgh hwi; prag y kammdhyghtyowgh an eyl y gila?”

²⁷Mes an gour esa ow kammdhyghtya y gentrevek a'n herdhyas dhe-ves, ow leverel, “Piw a'th ordenas dhe vos rewler ha breusyas dreson?

²⁸A vynn'ta ow ladha vy par dell ledhsys an gour ejyptek de?”

²⁹Ytho orth an ger ma Moyses a fias, ha mos ha bos alyon yn pow Midyan, may tineythis dew vab dhodho.

³⁰‘Lemmyn pan o tremenys dew-ugens blydhen, el a omdhiskwedhas dhodho yn gwylvos menydh Sinay yn flamm bos ow tewi.

³¹Moyses pan y'n gwelas, marth a'n jeva a'n wel; hag ev ow nesa rag mires, y teuth lev an Arloedh:

³²“Duw dha dasow ov vy, Duw Abraham hag Ysak ha Yakob.” Mes Moyses a grenas, ha ny vedhas mires.

³³Hag yn-medh an Arloedh dhodho, “Lows dha sandalyow a'th treys; rag an tyller may sevydh yw dor sans.

³⁴My re welas arwask ow fobel yn Ejyp, ha my re's klewas ow kyni, ha my re dheuth yn-nans rag aga sawya; lemmyn, deus, dha dhannvon dhe Ejyp a wrav.”

³⁵‘An Moyses ma, neb a naghsons, ow leverel, “Piw a'th ordenas bos rewler ha breusyas?” Duw a'n dannvonas dhe vos ha rewler ha selwyas dre leuv an el neb a omdhiskwedhas dhodho y'n bos.

³⁶An gour ma a's hembronkas yn-mes, ow kul marthusyon hag arwoedhyow yn pow Ejyp, hag orth an Mor Rudh, hag y'n gwylvos dres dew-ugens blydhen.

³⁷Hemm yw an Moyses a leveris dhe vebyon Ysrael, “Duw a dhrehav ragowgh profoes dhiworth agas breder, dell y'm drehevis vy.”

³⁸Hemm yw neb esa y'n kuntelles y'n gwylvos gans an el a leveris dhodho yn menydh Sinay, ha gans agan tasow; hag ev a dhegemmeras lavarow bew dhe ri dhyn,

³⁹dhe neb ny vynnas agan tasow bos gostydh, mes i a'n herdhyas dhe-ves ha treylya dhe Ejyp yn aga holonnow,

⁴⁰ow leverel dhe Aron, “Gwra formya ragon ni duwow neb a wra mos a-dheragon; ha'n Moyses ma neb a'gan hembronkas yn-rag mes a bow Ejyp, ny wodhon an pyth re hwarva dhodho.”

⁴¹Hag y'n dydhyow na i a formyas leugh hag offrynna sakrifis dhe'n idol ha lowenhe yn oberow aga diwla.

⁴²Mes Duw a dreylyas ha'ga daskorr dhe wordhya lu nev, par dell yw skrifys yn lyver an brofoesi: “A dhresowgh hwi dhymm offrynnow ledhys ha sakrifisow dew-ugens blydhen y'n gwylvos, A ji Ysrael?

⁴³Hwi a gemmeras yn-bann tylda Molok ha sterenn agas duw Refan, an imajys hag a formsowgh rag aga gordhya; ha my a wra agas divroa dhe'n tu arall dhe Babylon.”

⁴⁴‘Yth esa dh'agan tasow tylda an dustuni y'n gwylvos dell erghis ev neb a leveris dhe Moyses, may fe gwrys war-lergh an patron re welsa.

⁴⁵Pan y'n degemmersens, agan tasow a'n dros gans Yoshua pan fessons an kenedhlow hag a dewlis Duw yn-mes a-dherag agan tasow, bys yn dydhyow Davydh,

⁴⁶a gavas favour gans Duw, ha govynn kummyas dhe gavoes trigva rag chi Yakob.[12]

⁴⁷Mes y feu Solomon neb a dhrehevis chi ragdho.

⁴⁸Mes ny drig an Ughella yn annedhow gwrys gans diwla; dell lever an profoes,

⁴⁹“Nev yw ow se, ha'n norvys skavell-droes ow threys; py par chi a wrewgh hwi y dhrehevel ragov, yn-medh an Arloedh, po pyth yw tyller ow fowesva?

⁵⁰A ny wrug ow leuv oll an taklow ma?”

⁵¹‘A hwi kales agas kilbenn, hag antrodreghys yn agas kolonn hag yn agas diwskovarn, pup-prys y sevowgh erbynn an Spyrys Sans, kepar dell wre agas tasow, yndella hwi ynwedh a wra.

⁵²Py re a'n brofoesi ny veu helghys gans agas tasow? Hag i a ladhas an re a dharganas an Den Gwiryon dhe dhos, hag anodho ev hwi lemmyn res eth ha bos traytours ha moldroryon,

⁵³hwi neb a dhegemmeras an lagha dell veu res gans eledh, ha neb na'n gwithas.’

⁵⁴Lemmyn pan glewsons an taklow ma, konneryek vons yn aga holonnow, hag i a dheskornas orto.

⁵⁵Mes leun a'n Spyrys Sans, hag ow mires stark yn nev, ev a welas golewder Duw ha Yesu ow sevel dhe'n barth dhyghow dhe Dhuw;

⁵⁶hag ev a leveris, ‘Otta, my a wel an nevow igerys, ha Mab an den ow sevel dhe'n barth dhyghow dhe Dhuw.’

⁵⁷Mes i a skrijas, ughel aga lev, ha stoppya aga diwskovarn, ha fyski war-barth bys dhodho.

⁵⁸Ena i a'n tewlis mes a'n sita ha'y labydha; ha'n dhustunioryon a worras aga dillas orth treys gour yowynk henwys Sowl.

⁵⁹Hag i ow labydha Stefan, ev a elwis war Dhuw, ow leverel, ‘Arloedh Yesu, degemmer ow spyrys’,

⁶⁰hag ow mos war benn-dewlin ev a grias, ughel y lev, ‘Arloedh, na syns an pegh ma er aga fynn.’ Pan lavarsa hemma, ev a goedhas yn kosk.