Read Kernewek Oberow 8 Bible Online

Oberow 8 - Kernewek bible

Oberow 8

¹Hag yth esa Sowl owth assentya dh'y ladhva. Hag y'n jydh na yth esa helghyans meur erbynn an eglos yn Yerusalem, hag i oll a veu skattrys dres an powyow a Yudi ha Samaria, marnas an abesteli.

²Gwer gryjyk a ynkleudhyas Stefan ha gul dresto oelva veur.

³Mes yth esa Sowl ow ravna an eglos; hag owth entra yn chi wosa chi, ev a dhraylya dhe-ves ha gwer ha benynes ha'ga gorra yn prison.

⁴Lemmyn an re a veu skattrys eth a-derdro, ow pregoth an ger.

⁵Mes Felip eth yn-nans dhe'n sita a Samaria[13] ha pregoth dhedha an Krist,

⁶ha gans unn akord an routhow a goelas orth an pyth a veu leverys gans Felip pan y'n klewsons ha gweles an arwoedhyow esa orth aga gul.

⁷Rag lies spyrys avlan a dheuth yn-mes a'n dus a's tevo, ow kria ughel aga lev; ha lies o palsyes po evredhek a veu yaghhes;

⁸hag yth esa meur a lowena y'n sita na.

⁹Lemmyn yth esa unn gour henwys Simon neb a wre pystria seuladhydh y'n sita, ha gorra marth yn bobel Samaria, ow leverel y vos nebonan meur y vri;

¹⁰i oll, byghan ha bras, a goela orto, ow leverel, ‘An gour ma yw nerth Duw, henwys Meur.’

¹¹Hag i a goela orto drefenn ev dhe worra marth ynna der y bystri dres termyn hir.

¹²Mes pan gryssons i dhe Felip hag ev ow pregoth a-dro dhe wlaskor Duw ha hanow Yesu Krist, besydhys vons, ha gwer ha benynes.

¹³Hag ynwedh Simon y honan a grysis, ha wosa y vos besydhys ev a junyas gans Felip; hag ow kweles arwoedhyow ha marthusyon meur gwrys, marth a'n jeva.

¹⁴Ha'n abesteli yn Yerusalem, pan glewsons Samaria dhe dhegemmeres ger Duw, a dhannvonas dhedha Peder ha Yowann,

¹⁵neb eth yn-nans dhe bysi ragdha, may tegemmerrens an Spyrys Sans;

¹⁶hwath ny goedhsa war dhenvyth anedha, mes besydhys viens unnsel yn hanow an Arloedh Yesu.

¹⁷Ena i a worras aga diwla warnedha, hag i a dhegemmeras an Spyrys Sans.

¹⁸Lemmyn Simon, pan welas y feu res an Spyrys dre worra diwla an abesteli, a brofyas dhedha mona, ow leverel,

¹⁹‘Rewgh dhymm ynwedh an awtorita ma, may tegemmerro ev an Spyrys Sans piwpynag a worriv ow diwla warnodho.’

²⁰Mes yn-medh Peder dhodho, ‘Dhe goll re ylli ha genes dha arghans, drefenn ty dhe dybi y hyllydh kavoes ro Duw dre vona.

²¹Ny'th eus na rann na le y'n mater ma, rag nyns yw dha golonn ewn dherag Duw.

²²Kemmer edrek, ytho, a'n sherewynsi usi dhis, ha pys war an Arloedh may fo gevys dhis, mar kyll bos, mynnas dha golonn.

²³Rag, dell welav, yn bystel a hwerowder hag yn kolm a gammhynseth yth esos.’

²⁴Ha Simon a worthybis, ‘Pysiwgh ragov war an Arloedh, ma na dheffo warnav nagonan a'n taklow re leversys.’

²⁵Ena wosa doen dustuni ha kewsel ger an Arloedh, i a dhehwelis dhe Yerusalem, ow pregoth an aweyl yn lies tre a'n Samaritanys.

²⁶Mes el an Arloedh a gewsis orth Felip, ow leverel, ‘Sav yn-bann ha ke troha'n dyghow y'n fordh ow mos war-nans dhiworth Yerusalem dhe Gaza.’ Hemm yw difeythtir.

²⁷Ytho ev a sevis ha mos. Hag otta, gour a Ethiopia, spadhesik, lyswas Kandake, myghternes tus Ethiopia, dhe neb esa charj dres hy thresor oll, re dhothya dhe Yerusalem rag gordhya,

²⁸hag yth esa ow tehweles, esedhys yn y jarett, hag ow redya an profoes Ysay.

²⁹Hag yn-medh an Spyrys dhe Felip, ‘Ke, gwra nesa ha junya gans an charett ma.’

³⁰Ha Felip a boenyas dhodho, ha'y glewes ow redya Ysay an Profoes, hag yn-medh ev, ‘A gonvedhydhta, ytho, an pyth a redydh?’

³¹Hag yn-medh ev, ‘Yn tevri, fatell allav vy, marnas nebonan a'm gittyo?’ Hag ev a bysis Felip mayth yskynno dhe esedha ganso.

³²Lemmyn rann an skryptor esa orth hy redya o homma, ‘Kepar ha davas ev a veu ledys dhe ladhva ha kepar dell yw avlavar oen a-rag an knyver, yndella ny iger ev y anow.

³³Yn y sham gwirvreus a veu kemmerys dhiworto; piw a wra derivas y henedh? Rag y vewnans yw kemmerys dhe-ves dhiworth an norvys.’

³⁴Yn-medh an spadhesik dhe Felip, ‘My a wovynn orthis, piw y lever an profoes hemma a-dro dhodho? A-dro dhodho y honan, po a-dro dhe dhen arall?’

³⁵Ena Felip a igoras y anow, hag ow talleth dhiworth an skryptor ma, ev a bregowthas Yesu dhodho.

³⁶Hag i ow mos der an fordh, i a dheuth dhe dhowr, hag yn-medh an spadhesik, ‘Otta dowr; pandra'm lett rag bos besydhys?’

³⁷Hag yn-medh Felip, ‘Mar krysydh gans oll dha golonn, gwiw yw.’ Hag ev a worthybis, ‘My a grys bos Yesu Krist Mab Duw.’[14]

³⁸Ena ev a worhemmynnis mayth hettha an charett, hag i eth yn-nans y'n dowr aga dew, ha Felip ha'n spadhesik, hag ev a'n besydhyas.

³⁹Ha pan dheuthons yn-bann mes a'n dowr, Spyrys an Arloedh a gachyas Felip dhe-ves; ny'n gwelas an spadhesik na fella, hag ev eth y'n fordh yn unn lowenhe.

⁴⁰Mes Felip a veu kevys yn Azotus, hag ow mos dres an pow[15] ev a bregowthas an aweyl y'n sitys oll bys pan dheuth dhe Sesarea.