Read Kernewek Romanyon 10 Bible Online

Romanyon 10 - Kernewek bible

Romanyon 10

¹A vreder, yeunes ow holonn ha'm pysadow dhe Dhuw yw rag selwyans dhedha.[16]

²My a dheg dustuni ragdha, i dhe vos diwysyk war-lergh Duw mes nyns yw herwydh godhvos.

³Rag heb godhvos a ewnder Duw, hag ow hwilas sevel aga ewnder aga honan, nyns ens gostydh dhe ewnder Duw.

⁴Rag Krist yw penn an lagha rag ewnder dhe beub a grys.

⁵Rag Moyses a skrif a-dro dhe ewnder an lagha, ‘An den a wra an taklow ma a vew dredha.’

⁶Mes an ewnder usi a fydh a lever yndella: ‘Na lavar y'th kolonn, “Piw a yskynn y'n nev?” ’ (hemm yw dhe dhri Krist yn-nans)

⁷‘po “Piw a dhiyskynn y'n islonk?” ’ (hemm yw dhe dhri Krist yn-bann a vernans).

⁸Mes pandr'a lever ev? ‘Yma an ger yn ogas dhis, yn dha anow hag y'th kolonn’ henn yw, an ger a fydh a bregewthyn.

⁹Rag mar konfessydh yn dha anow Yesu dhe vos Arloedh ha krysi y'th kolonn y hwrug Duw y dhrehevel a'n mernans, y fydhydh selwys.

¹⁰Rag gans kolonn y krysir dhe ewnder ha gans ganow y konfessir dhe selwyans.

¹¹Rag an skryptor a lever, ‘Ny'n jevydh meth neb a grysso ynno.’

¹²Rag nyns eus dihevelepter ynter an Yedhow ha'n Grek, an keth Arloedh yw dhe oll, a re y rychys dhe oll a elow warnodho.

¹³Rag, ‘Neb a elwo war hanow an Arloedh a vydh selwys.’

¹⁴Fatell yll tus gelwel war nebonan ma na gryssons ynno? Ha fatell yllir krysi dhe nebonan ma na glewas anodho; ha fatell yllir klewes heb pregowther?

¹⁵Ha fatell yllir pregoth mar nyns or dannvenys? Dell yw skrifys, ‘Ass yns i teg treys an re ow tyllo nowodhow da!’[17]

¹⁶Mes nyns o pubonan gostydh dhe'n aweyl; rag Ysay a lever, ‘A Arloedh, piw a grysis agan derivas?’

¹⁷Ytho fydh a dheuth a glewes, ha'n klewes dre eryow Krist.[18]

¹⁸Mes my a lever, A wrussons i klewes? Gwrussons yn hwir! Rag ‘Dhe'n bys oll yth eth aga lev, ha'ga geryow dhe bennow an norvys.’

¹⁹Mes y lavarav, A ny gonvedhas Ysrael? Wostalleth Moyses a lever, ‘My a wra dhis perthi avi orth an re nag yns kenedhel, hag orth an re yw kenedhel dalsogh y hwrav dhis serri.’

²⁰Mes Ysay yw hardh hag a lever, ‘Kevys veuv gans an re nag esens orth ow hwilas, diskwedhys veuv dhe'n re nag esens ow kovynn war ow lergh.’

²¹Mes dhe Ysrael ev a lever, ‘Oll an jydh yth ystynnen ow diwleuv dhe bobel dhiwostydh ha gorth.’