Read Kernewek Romanyon 11 Bible Online

Romanyon 11 - Kernewek bible

Romanyon 11

¹Ytho y lavarav, a dewlis Duw y bobel dhe-ves? Bynner re bo! Rag my yw Ysraelyas dhiworth has Abraham, a eghenn Benyamin.

²Ny dewlis Duw y bobel dhe-ves neb a ragaswonnis ev. Po a ny wodhowgh hwi pandr'a lever an skryptor a-dro dhe Elias, fatell bys ev Duw erbynn Ysrael?

³‘A Arloedh, dha brofoesi a ladhsons, dha alteryow re dhistrusons ha my a veu gesys ow honan hag i a hwila ow bewnans.’

⁴Mes pandr'a lever dhodho an gorthyp duwel? ‘My re withas dhymmo vy ow honan seyth mil wour na blegsons aga glin a-rag Baal.’

⁵Ytho yndella y'n eur ma yma remenant herwydh dewis a ras.

⁶Ha mars yw a ras, nyns yw na fella a oberow, po ny via gras na fella gras.[19]

⁷Pandra ytho? Ysrael a fyllis a gavoes an pyth a hwila. An re dhewisys a'n kavas ha'n re erell a veu kaleshes,

⁸dell yw skrifys, ‘Duw a ros dhedha spyrys a dalsoghter, dewlagas heb gweles, ha diwskovarn heb klewes, bys y'n jydh hedhyw.’

⁹Ha Davydh a lever, ‘Bedhes aga moes maglenn ha roes hag antell hag attal dhedha;

¹⁰bedhes tewlhes aga dewlagas bys ma na's teves gweles ha'ga heyn pup-prys ow plegya.’

¹¹My a lever ytho, A drebuchsons i rag may koetthens? Bynner re bo! Mes der aga threuspass deuva selwyans dhe'n kenedhlow, bys ma'n jeves Ysrael avi.

¹²Mes mars yw aga threuspass rychys rag an bys, ha mars yw aga difyk devedhys ha bos rychys rag an kenedhlow, kemmys moy aga leunder!

¹³Mes dhywgh hwi y lavarav, A genedhlow, seul gemmys ytho dell ov abostol dhe'n kenedhlow, y feurhav ow gonis

¹⁴rag may hwrylliv dhe'n re yw a'm kig evy perthi avi, hag yndella selwel rann anedha.

¹⁵Rag mars yw aga thewlel dhe-ves unnverheans an bys, pyth yw aga degemmeres marnas bewnans a vernans?

¹⁶Ha mars yw an kynsa frut sans, yndella ynwedh yw an toes gwrys anedhi; ha mars yw an wreydhenn sans, yndella yw an skorrennow.

¹⁷Mes mar pe rann a'n skorrennow terrys dhe-ves ha ty, olewenn woedh, ympys yn aga le dhe gevrenna yn gwreydhenn ha sugen an olewenn,[20]

¹⁸na vost war an skorrennow, mes mar postydh, an wreydhenn a'th teg ha ny dhegedh an wreydhenn.

¹⁹Ty a lever ytho: ‘Terrys dhe-ves veu skorrennow rag may fen vy ympys a-ji.’

²⁰Gwir yw! Drefenn diskryjyans y fons i terrys, ha ty dre gryjyans a sev. Na gemmer goeth, mes porth own!

²¹Rag mar ny sparyas Duw an skorrennow naturel, ny'th spar[21] tejy.

²²Gwel ytho kuvder hag sevureth Duw; sevureth a'n eyl tu orth an re re goedhas hag a'y gila kuvder Duw orthis, mar pesydh yn y guvder, poken y fydhydh treghys dhe-ves ynwedh.

²³Ha'n re na ynwedh, mar ny besyons yn aga diskryjyans, a vydh ympys a-ji, rag Duw a yll aga dasympya a-ji.

²⁴Ty mar peus treghys dhiwar olewenn yw dre natur goedh, hag ympys (ha hemma erbynn natur) yn olewenn vegys, a gemmys moy y fydh an skorrennow naturel dasympys a'ga olewenn aga honan.

²⁵Rag ny vynnav hwi dhe vos heb godhvos, a vreder, a'n kevrin ma, ma na vewgh ynnowgh hwi agas honan fur: kalesenn dhe vos devedhys yn rann war Ysrael, bys pan dheffo a-ji an myns kowal a'n kenedhlow,

²⁶hag yndella oll Ysrael a vydh selwys, dell re beu skrifys, ‘Y teu an Delivrer yn-mes a Sion, ev a dreyl ansansoleth dhe-ves dhiworth Yakob;

²⁷ha hemma a vydh ow hevambos gansa pan dhegav aga feghosow dhiworta.’

²⁸Ow tochya an aweyl, eskerens yns dhe Dhuw, a'th wovis; mes ow tochya dewisyans, kerys yns a-barth an tasow.

²⁹Rag antreylyadow yw rohow ha galow Duw.

³⁰Rag dell ewgh hwi kyns diwostydh dhe Dhuw mes lemmyn re gevsowgh tregeredh der aga diwostytter,

³¹yndella i ynwedh re beu diwostydh lemmyn rag may kaffons tregeredh der an dregeredh re gevsowgh.

³²Rag Duw re dhegeas oll yn diwostytter rag may tiskwettho tregeredh dhe beub.

³³O, downder rychys Duw ha'y furneth ha'y wodhvos! Ass yw y vreus dres konvedhes, ha dres hwithra y fordhow!

³⁴‘Rag piw a wodhya brys an Arloedh, po piw a dheuth ha bos y gusulyer?

³⁵Po piw re ros ro dhodho kyns, may fe attylys dhodho?’

³⁶Rag anodho ha dredho ha dhodho yma pup-tra. Dhodho re bo gordhyans bys vykken!