Read Kernewek Romanyon 16 Bible Online

Romanyon 16 - Kernewek bible

Romanyon 16

¹My a gommend dhywgh agan hwoer, Febe, servyades a'n eglos yn Kenkrea,

²rag ma's degemmerrewgh y'n Arloedh, dell dhelledh dhe'n syns, ha sevel rygdhi yn pypynag a's teffo edhomm anodho, rag hi re beu gwithyades dhe lies ha dhymmo vy ynwedh.

³Salusewgh Priska hag Akwila, ow hesoberoryon yn Krist Yesu,

⁴neb a-barth ow bewnans a beryllyas aga honna aga honan mayth aswonnyn gras dhedha, my ow honan, mes ynwedh oll eglosyow an kenedhlow;

⁵salusewgh ynwedh an eglos yn aga chi. Salusewgh ow Epaynetus karadow hag a veu an kynsa frut yn Asia rag Krist.

⁶Salusewgh Maria neb re lavuryas meur ragowgh.

⁷Salusewgh Andronikus ha Yunia, ow herens ha'm kesprisnoryon, hag yw tus a vri yn mysk an abesteli, hag yn tevri re beu yn Krist a-ragov.

⁸Salusewgh Ampliatus, ow haradow y'n Arloedh.

⁹Salusewgh Urbanus agan kesoberer yn Krist ha Staghys ow haradow.

¹⁰Salusewgh Apelles, neb yw kommendys yn Krist. Salusewgh eseli teylu Aristobulus.

¹¹Salusewgh Herodion, ow har. Salusewgh an re usi y'n Arloedh a ji Narkissus.

¹²Salusewgh Tryfena ha Tryfosa an re ow lavurya y'n Arloedh. Salusewgh Persis an garadow, neb a lavurya meur y'n Arloedh.

¹³Salusewgh Rufus yw dewisys y'n Arloedh ha'y vamm ev ha'm mamm vy ynwedh.

¹⁴Salusewgh Asynkritus, Flegon, Hermes, Patrobas, Hermas ha'n vreder usi gansa.

¹⁵Salusewgh Filologus, Yulia, Nereus ha'y hwoer, hag Olympas hag oll an syns usi gansa.

¹⁶Salusewgh an eyl y gila gans amm sans. Oll eglosyow Krist a'gas salus.

¹⁷My a'gas pys, breder, omwithewgh orth an re a wra folsyow hag offensys a-der an dyskas a dhys'sowgh, ha treylyewgh a-dhiworta.

¹⁸Rag tus a'n par na, ny servyons Krist mes aga thorr aga honan, ha dre gows teg ha dre gows ow flattra, y toellons kolonn an re wiryon.

¹⁹Rag agas gostytter yw aswonnys gans tus oll, bys may lowenhav warnowgh; my a vynn orthowgh bos fur dhe'n da ha gwiryon dhe'n drog.

²⁰Ena an Duw a gres a vrew Satnas yn-dann agas treys hware. Gras agan Arloedh Yesu Krist re bo genowgh.

²¹Timothi ow hesoberer a'gas salus, ha Lukius ha Yason ha Sosipater, ow herens.

²²My, Tertius, skrifer an lyther ma a'gas salus y'n Arloedh.

²³Gayus, ost dhymmo vy ha dhe'n eglos oll, a'gas salus. Erastus, alhwedhor an sita, ha'gan broder Kwartus, a'gas salus.

²⁴Gras agan Arloedh Yesu Krist re bo genowgh hwi oll. Amen.[31]

²⁵Lemmyn dhodho ev neb a yll agas krevhe herwydh ow aweyl ha pregoth Yesu Krist, herwydh diskwedhyans an kevrin a vedha gwithys taw der an oesow

²⁶mes lemmyn yw diskudhys ha, der an skrifow profoesek, war-lergh gorhemmynn an Duw heb diwedh, rag gostytter a fydh, yw dyllys dhe'n gwlaskordhow oll:

²⁷re bo dhe'n unn Duw fur golewder bys vykken dre Yesu Krist: Amen.