Read Kernewek Romanyon 2 Bible Online

Romanyon 2 - Kernewek bible

Romanyon 2

¹Ytho ny'th eus askus, A dhen, piwpynag vi, ow preusi den arall; rag pan vreusydh den arall y preusydh er dha bynn dha honan rag ty, an breusyas, a wra an keth taklow dha honan.

²Ni a woer breus Duw dhe goedha yn hwir war an re a wra taklow a'n par na.

³A dybydh, A dhen, y skeusydh a vreus Duw pan vreusydh an re a wra taklow a'n par na ha ty dha honan orth aga gul?

⁴Po dispresya a wredh jy rychys y guvder ha'y wodhevyans ha'y berthyans? A ny wodhes jy kuvder Duw dhe'th hembronk dhe edrek?

⁵Mes dre dha golonn gales hag anedrek yth esos ow kreuni konnar ragos dha honan y'n jydh a gonnar may fo diskwedhys ynno breus gwiryon Duw.

⁶Rag yth attal dhe bub den herwydh y oberow:

⁷dhe'n re a hwila, dre berthyans ow kul da, gordhyans hag enor hag anvarwoleth, y fynn ev ri bewnans heb diwedh.

⁸Mes rag an re neb der avi yw diwostydh dhe'n gwiryonedh, mes dhe'n droktra gostydh y fydh konnar ha sorr bras.

⁹Galar hag ahwer a'n jevydh pub enev den a wra drog, an Yedhow yn kynsa ha'n Grek ynwedh,

¹⁰mes gordhyans hag enor ha kres rag pub huni a wra da, an Yedhow yn kynsa ha'n Grek ynwedh.

¹¹Rag nyns eus faverans gans Duw.

¹²Pub huni re beghas yn-mes a'n lagha a verow yn-mes a'n lagha, ha pub huni re beghas yn-dann an lagha a vydh breusys yn-dann an lagha.

¹³Rag nyns yw goslowysi an lagha hag yw justifiys a-rag Duw, mes gwrioryon an lagha hag a vydh prevys ewn.

¹⁴An kenedhlow na's teves an lagha, pan wrons dre natur an pyth yw erghys gans an lagha, lagha yns i dhedha aga honan, kyn na's teves an lagha.

¹⁵I a dhiskwa bos skrifys war aga holonn an pyth yw erghys gans an lagha, ha'ga howses ynwedh a dheg dustuni ha'ga thybyans a's kuhudh a-bervedh ynna po martesen a's askus

¹⁶y'n jydh may freus Duw, war-lergh ow aweyl, kevrinyow tus dre Yesu Krist.

¹⁷Mes mara'th henwir Yedhow ha fydhya a wredh y'n lagha ha bostya yn Duw

¹⁸ha godhvos y vodh ha synsi bos plegadow an pyth yw gwell drefenn ty dhe vos dyskys y'n lagha,

¹⁹ha mars os sur ty dhe vos hembrenkyas dhe'n dhellyon, golow dhe'n re usi y'n tewlder,

²⁰kesker dhe'n fellyon, dyskador fleghes, ow kavoes y'n lagha an leun studh a wodhvos hag a wiryonedh —

²¹ty ytho hag a dhysk ken re, a ny vynnydh omdhyski? Ha ty ow pregoth erbynn ladra, a ledrydh?

²²Ty hag a lever na wreller avoutri, a wredh jy avoutri? Ty hag a gas imajys, a ledrydh templow?

²³Ty hag a vost y'n lagha, a wredh jy disenor dhe Dhuw dre derri an lagha?

²⁴Rag dell yw skrifys, ‘Hanow Duw yw disenorys yn mysk an kenedhlow dredhos.’

²⁵An trodreghyans yw dhe les yn tiogel mars os gostydh dhe'n lagha; mes mar terrydh an lagha, dha drodreghyans yw gyllys dhe antrodreghyans.

²⁶Ytho, mar syns den yw heb trodreghyans ordenansow an lagha, a ny vydh y antrodreghyans reknys avel trodreghyans?

²⁷Ytho an den na'n jeves an trodreghyans yn y gorf mes a syns an lagha a'th kuhudh, ty hag a'th eus skrif an lagha ha'n trodreghyans mes a derr an lagha.

²⁸Rag nyns yw ev gwir Yedhow neb yw onan war-ves, na nyns yw gwir drodreghyans neppyth war-ves hag y'n kig.

²⁹Mes ev yw gwir Yedhow neb yw onan war-ji, ha trodreghyans yw a'n golonn, yn spyrys heb bos yn lytherenn, ma nag yw y wormola dhiworth tus mes dhiworth Duw.