Read Kernewek Romanyon 3 Bible Online

Romanyon 3 - Kernewek bible

Romanyon 3

¹Ytho py les eus dhe'n Yedhow? Pyth yw dader an trodreghyans?

²Meur war bub fordh. Wostalleth an Yedhewon a's teves gwitha lavarow Duw.

³Pandra, mars o nebes anedha dislel? A dhomhwel aga dislelder lelder Duw?

⁴Kammenn vyth! Bedhes Duw gwir kyn fo pub den fals, dell yw skrifys, ‘Rag may fi prevys ewn y'th heryow ha tryghi pan vi breusys.’

⁵Mes mar tiskwa agan droktra ewnder Duw, pandr'a wren leverel? Duw dhe vos anewn pan y'gan kessydh yn sorr? (Avel den y kowsav.)

⁶Kammenn vyth! Poken fatell allsa Duw breusi an bys?

⁷Mes mar palsha gwirder Duw dh'y wolewder der ow falsuri, prag yth esov hwath ow pos kuhudhys avel peghador?

⁸Ha prag na wrer drog rag may teffo da? — dell y'gan kuhudh nebes ni dhe leverel yn unn sklandra. Aga dampnya yw teg.

⁹Pandra ytho? On ni an Yedhewon byth dhe well? Nag on kammenn; rag my re guhudhas bos pub den, keffrys an Yedhewon ha'n Grekys, yn-dann alloes pegh,

¹⁰dell yw skrifys, ‘Nyns yw onan vyth gwiryon, na, nagonan vyth;

¹¹ny gonvedh denvyth, ny hwila denvyth Duw.

¹²Peub re dreylyas dhe denewen, war-barth galsons i kamm; ny wra da, nagonan vyth.

¹³Aga bryansenn yw bedh igor. I a doell gans aga thaves. Yma venim serf yn-dann aga diwweus.

¹⁴Leun yw aga ganow a vollothow ha hwerowder.

¹⁵Skav yw aga threys dhe skoellya goes,

¹⁶yn aga hynsyow yma terroes ha galar,

¹⁷ha'n hyns a gres ny aswonnsons.

¹⁸Nyns eus own a Dhuw a-rag aga dewlagas.’

¹⁹Lemmyn ni a woer, pypynag a lavarro an lagha kewsys yw dhe'n re usi yn-dann an lagha, rag may fo pub ganow degeys, ha rag may fo an bys oll yn-dann vreus Duw.

²⁰Rag ny vydh denvyth justifiys der oberow an lagha, a-ban dheu aswonnvos pegh der an lagha.

²¹Mes lemmyn ewnder Duw re beu diskwedhys a-der gans an lagha, kyn hwrug an lagha ha'n brofoesi doen dustuni anodho,

²²ewnder Duw dre fydh yn Yesu Krist rag oll hag a grys.[2] Rag nyns eus dibarth;

²³rag oll re beghas, hag i a fyll a hedhes dhe wordhyans Duw,

²⁴justifiys yns gans y ras yn ro, dre dhaspren usi yn Krist Yesu,

²⁵neb a worras Duw yn-rag avel tregeredhva[3] drehedhys dre fydh yn y woes, dhe dhiskwedhes y ewnder, ow kasa heb kessydhyans an peghosow re bia gwrys kyns;

²⁶henn o dhe brevi y'n eur ma ev y honan dhe vos ewn hag ev dhe justifia neb a'n jeves fydh yn Yesu.

²⁷Ytho ple'ma agan bostya? Eskeys yw. Drefenn py lagha? Lagha an oberow? Na, drefenn lagha fydh.

²⁸Rag[4] ni a syns den dhe vos justifiys dre fydh a-der dre oberow an lagha.

²⁹Po unnsel dhe'n Yedhewon yw ev Duw? A nyns yw ev Duw an kenedhlow ynwedh? Yw, a'n kenedhlow ynwedh,

³⁰drefenn Duw dhe vos onan; hag ev a justifi an re a's teves trodreghyans war sel aga fydh ha'n re antrodreghys der aga fydh.

³¹A dhomhwelyn an lagha gans fydh? Kammenn vyth! Yn konter, ni a venten an lagha.