Read Kernewek Romanyon 4 Bible Online

Romanyon 4 - Kernewek bible

Romanyon 4

¹Pandr'a leveryn ytho y hwrug Abraham y gavoes, agan hendas war-lergh an kig?

²Rag mar peu Abraham justifiys der oberow, ev a'n jeves bostya, marnas a-rag Duw.

³Rag pandr'a lever an skryptor? ‘Abraham a grysi dhe Dhuw ha homm o reknys dhodho avel ewnder.’

⁴Lemmyn dhe neb a lavur nyns yw an gober reknys avel ro mes avel kendon.

⁵Ha dhe neb na lavur mes neb a drest ynno ev neb a justifi an den ongrassyes, y reknir y fydh avel ewnder.

⁶Yndella Davydh a gews a vennesikter an den neb yw reknys ewn gans Duw heb oberow:

⁷‘Gwynnvys an re gevys dhedha aga hammweythyow ha kudhys aga feghosow;

⁸gwynnvys an gour ma na reken an Arloedh y begh er y bynn.’

⁹Yw an vennath ma war an re drodreghys, po war an re na's teves an trodreghyans ynwedh? Ni a lever, ‘Y feu reknys fydh dhe Abraham avel ewnder.’

¹⁰Fatell veu reknys ytho? A veu ev trodreghys po na? Ny veu trodreghys hwath, mes antrodreghys.

¹¹Ev a'n jeva an tokyn a drodreghyans a-wosa, sel a'n ewnder a'n jevo dre fydh hag ev hwath antrodreghys; may fo gwrys tas peub eus ow krysi kyn fo antrodreghys; may fo ewnder reknys dhedha i ynwedh.

¹²Hag yndella ev yw tas an re trodreghys, an re nag yns unnsel trodreghys, mes ynwedh ymons ow kerdhes yn olow fydh agan tas ni Abraham kyns ev dhe vos trodreghys.

¹³Rag ny dheuth der an lagha an ambos dhe Abraham ha'y henedh y fedha ev her an bys mes dre ewnder an fydh.

¹⁴Rag mara pydh an re a hol an lagha heryon, fydh yw gwag ha'n ambos re beu distruys.

¹⁵Rag an lagha a wra konnar, mes le nag eus lagha nyns eus torrva-lagha.

¹⁶Ytho an ambos a dheu dhiworth fydh, may fo dre ras ha may fo surhes dhe oll y dhiyskynnysi — na vo unnsel dhe'n re a hol an lagha mes ynwedh dhe'n re usi a fydh Abraham, neb yw tas dhyn ni oll.

¹⁷Dell yw skrifys, ‘My re'th wrug tas kenedhlow pals’ — a-rag an Duw may krysis ynno, neb a re bewnans dhe'n re varow hag a elow dhe vosva an taklow na's teves bosva.

¹⁸Neb a grysi yn govenek dres govenek y to ha bos ‘an tas dhe genedhlow pals’, dell via leverys, ‘Yndella y fydh dha henedh.’

¹⁹Ha nyns esa ow kwannhe yn fydh pan brederi y farwsa y gorf y honan[5] drefenn ev dhe vos a-dro dhe gans bloedh, po pan brederi y farwsa torr Sara.

²⁰Ny'n gwre diskryjyans vyth mayth hokya a-dro dhe ambos Duw, mes y feu krevhes y'n fydh ow kormel Duw,

²¹hag ow pos sur y hylli Duw gul an pyth re ambossa.

²²Dredhi ynwedh ‘Rakhenna feu reknys dhodho avel ewnder.’

²³Mes ny veu an geryow, ‘y feu reknys dhodho’ skrifys unnsel ragdho ev,

²⁴mes ragon ni ynwedh. Reknys vydh dhyn ni hag a grys ynno ev neb a dhrehevis Yesu agan Arloedh dhiworth an re varow,

²⁵neb a veu res dhe'n mernans drefenn agan drogoberow ha drehevys rag may fen ni kevys ewn.