Read Kernewek Romanyon 6 Bible Online

Romanyon 6 - Kernewek bible

Romanyon 6

¹Pandr'a wren y leverel ytho? Yw dhyn pesya yn pegh rag may palshaho gras?

²Kammenn vyth! Fatell yllyn ni neb a verwis dhe begh bewa hwath ynno?

³Po a ny wodhowgh hwi peub ahanan ni neb re beu besydhys yn Yesu Krist dhe vos besydhys yn y vernans?

⁴Ytho ynkleudhys ganso yth en dre vesydhya yn mernans, rag may hyllyn kerdhes ganso yn nowydhses a vewnans, par dell veu Krist drehevys a'n re varow dre wolewder an Tas.

⁵Rag mar peun ni plynsys war-barth ganso yn semlans y vernans, yn kettella y fydhyn ni yn y dhasserghyans.

⁶Ni a woer y feu agan den koth krowsys ganso rag may fe an korf a begh distruys, ha rag na serfyn pegh na fella.

⁷Rag neb re verwis yw livrys dhiworth pegh.

⁸Mes mars on marow gans Krist, ni a grys y fewyn ganso.

⁹Rag y hwodhon na verow Krist arta wosa y vos drehevys a'n re varow vernans; ny'n jeves mernans maystri warnodho na fella.

¹⁰Dell verwis, y ferwis ev unnweyth dhe begh, mes dell vew, y few ev dhe Dhuw.

¹¹Ytho y tegoedh dhywgh hwi omsynsi marow dhe begh mes ow pywa dhe Dhuw yn Krist Yesu.

¹²Ytho na reynyes pegh yn agas korf marwel bys may fydhowgh gostydh dh'y dhrokhwansow.[8]

¹³Ha na rewgh agas eseli dhe begh avel arvow anewnder, mes omrewgh dhe Dhuw avel tus dhastrehevys a vernans dhe vewnans ha'gas eseli dhe Dhuw avel arvow ewnder.

¹⁴Rag ny'n jevydh pegh maystri warnowgh, a-ban nag esowgh yn-dann lagha mes yn-dann ras.

¹⁵Pandra ytho? A wren ni pegha drefenn nag eson yn-dann lagha mes yn-dann ras? Kammenn vyth!

¹⁶A ny wodhowgh hwi mar omrowgh dhe nebonan avel kethyon wostydh, hwi dhe vos kethyon poran dhe'n den na mayth owgh gostydh dhodho — po dhe begh, hag a hembronk dhe'n mernans, po dhe wostytter hag a hembronk dhe ewnheans?

¹⁷Mes dhe Dhuw re bo grasow, rag hwi, a vedha kethyon dhe begh, yw devedhys ha bos gostydh a leun golonn dhe'n patron a dhyskas may fewgh delivrys dhodho,

¹⁸ha wosa bos delivrys dhiworth pegh devedhys owgh ha bos kethyon dhe ewnder.

¹⁹Avel den y kowsav, drefenn gwannder agas kig. Rag par dell resiwgh agas eseli avel kethyon dhe avlander ha dhe anlaghedh bys yn anlaghedh hwath moy, yndella gwrewgh ri agas eseli avel kethyon dhe ewnder rag sansheans.

²⁰Pan ewgh kethyon dhe begh, delivrys ewgh dhiworth ewnder.

²¹Mes pana frut a'gas bo a'n taklow ma'gas beus meth anedha lemmyn? Diwedh an re na yw mernans.

²²Mes wosa hwi dhe vos delivrys dhiworth mernans ha devedhys ha bos kethyon dhe Dhuw, an pewas a'gas beus yw sansheans, ha'y fin yw bewnans heb diwedh.

²³Rag gobrow pegh yw mernans, mes ro Duw yw bewnans heb diwedh yn Krist Yesu agan Arloedh.