Read Kernewek Romanyon 7 Bible Online

Romanyon 7 - Kernewek bible

Romanyon 7

¹A ny wodhowgh, a vreder — rag yth esov ow kewsel dhe re a woer an lagha — bos dhe'n lagha maystri war dhen unnsel hedre vo bew?

²Yndella an wreg re beu kelmys dre lagha dhe'n gour hag ev yn few; mes mar merow hy gour rydh yw hi dhiworth lagha an gour.

³Yndella gelwys avoutres y fydh hi mar pyw hi gans gour arall ha'y gour hwath yn few. Mes mar merow hy gour rydh yw hi dhiworth an lagha ha mar temmedh gans den arall nyns yw hi avoutres.

⁴Y'n keth fordh, ow breder, ledhys re bewgh dhe'n lagha dre gorf Krist rag may fowgh dhe onan arall, dhodho ev neb re beu drehevys a'n re varow rag may tykkyn frut rag Duw.

⁵Ha ni hwath ow pywa y'n kig, agan drokhwansow a begh drehevys gans an lagha, a oberi yn agan eseli dhe dhoen frut rag mernans.

⁶Mes lemmyn yth on digelmys dhiworth an lagha, marow dhe'n pyth a'gan synsi, bys may serfyn yn fordh nowydh an Spyrys, a-der yn fordh goth an skrif.

⁷Pandr'a wren y leverel ytho? An lagha dhe vos pegh? Bynner re bo! Mes na ve an lagha, ny wodhvien pegh. Ny wodhvien hwans mar ny lavarra an lagha, ‘Na wra hwansa.’

⁸Mes pegh ow kavoes prys y'n gorhemmynn, a wre ynnov vy drokhwans a bub eghenn, rag a-der an lagha marow yw pegh.

⁹Ow pywa yth esen a-der an lagha, mes pan dheuth an gorhemmynn, dasserghi a wrug pegh,

¹⁰hag y ferwis vy; an keth gorhemmynn o bewnans dhymm a dheuth ha bos mernans dhymmo vy.

¹¹Rag pegh, ow kavoes spas y'n gorhemmynn a'm toellas ha dredho y'm ladhas.

¹²Rag an lagha yw sans, ha'n gorhemmynn yw ha sans ha teg ha da.

¹³Ytho a dheuth an da ha bos mernans dhymm? Bynner re bo! Pegh o hag ynnov owth oberi der an pyth yw da, rag may fe pegh diskwedhys avel pegh, ha der an gorhemmynn may teffa peghus dres eghenn.

¹⁴Rag ni a woer an lagha dhe vos a'n spyrys; mes a'n kig ov, gwerthys yn keth dhe begh.

¹⁵Rag an pyth a wrav ny'n konvedhav; rag an pyth na vynnav y wul henna a wrav, mes an pyth a gasav hemma a wrav.

¹⁶Mes mar kwrav an pyth na vynnav y wul, unnver ov an lagha dhe vos da.

¹⁷Ytho nyns yw my a'n gwra na fella mes an pegh hag a drig ynnov.

¹⁸Rag y hwonn na drig ynnov travyth da, henn yw y'm kig. Yma parys genev an mynnas, mes kowlwul an da — ny allav.

¹⁹Rag ny wrav an pyth a vynnav y wul, mes an drog na vynnav y wul henna a wrav.

²⁰Mes mar kwrav an pyth na vynnav y wul, nyns yw na fella my a'n gwra, mes pegh hag a drig ynnov.

²¹Ytho y kavav avel lagha bos genev droktra pan vynnav gul da.

²²Rag y lowenhav yn lagha Duw y'm kowses usi ynnov ow honan,

²³mes y hwelav y'm eseli ken lagha ow kwerrya orth lagha ow brys hag orth ow gul prisner dhe lagha pegh hag a drig y'm eseli.

²⁴Truan dell ov! Piw a'm delirv dhiworth korf an mernans ma?

²⁵Grasow[9] dhe Dhuw dre Yesu Krist agan Arloedh! Yndella genev vy ow honan y servyav lagha Duw gans ow brys, mes gans ow hig y servyav lagha pegh.