Read Kernewek Romanyon 8 Bible Online

Romanyon 8 - Kernewek bible

Romanyon 8

¹Lemmyn nyns eus dampnya rag an re usi yn Krist Yesu.

²Rag lagha Spyrys bewnans yn Krist Yesu re'th tigolmas[10] dhiworth lagha pegh ha mernans.

³Rag an pyth a veu an lagha dialloes dh'y wul, rag hy bos gwann der an kig, Duw y honan re wrug, ow tannvon y Vab y honan yn hevelep kig a begh, dhe vos offrynn pegh, hag yndella ev a dhampnyas pegh y'n kig,

⁴rag may fo ordenans an lagha kowlwrys ynnon ni, eus ow kerdhes a-der war-lergh an kig mes war-lergh an Spyrys.

⁵Rag an re a vew war-lergh an kig a wra fors a daklow an kig, mes an re a vew war-lergh an Spyrys a wra fors a daklow an Spyrys.

⁶Rag brys an kig yw mernans, mes brys an Spyrys yw bewnans ha kres.

⁷Yndella an brys a wra fors a'n kig, yw eskarogeth erbynn Duw; nyns yw gostydh dhe lagha Duw, yn hwir ny yll bos yndella,

⁸ha'n re usi y'n kig ny yllons plesya Duw.

⁹Mes nyns esowgh y'n kig, y'n Spyrys yth esowgh, mars usi Spyrys Duw trigys ynnowgh yn hwir. Neb na'n jeves Spyrys Krist nyns yw ev dhodho.

¹⁰Mes mars usi Krist ynnowgh, kynth yw marow agas korf drefenn pegh, yn few yw agas spyrys drefenn ewnder.

¹¹Mars usi trigys ynnowgh y Spyrys ev, neb a dhrehevis Yesu a vernans, ev neb a dhrehevis Yesu a vernans a re bewnans dh'agas korf marwel ynwedh der y Spyrys usi trigys ynnowgh.

¹²Yndella, hwi vreder, kendonoryon on, nyns yw dhe'n kig, dhe vewa war-lergh an kig —

¹³rag mar pywowgh war-lergh an kig, merwel a wrewgh; mes mar korrowgh der an Spyrys gweythresow an korf, bewa a wrewgh.

¹⁴Rag myns a hembrenkir gans Spyrys Duw mebyon Duw yth yns.

¹⁵Ny gemmersowgh spyrys a gethneth ow ledya arta dhe own, mes hwi a gemmeras spyrys adoptyans avel mebyon dredho may kriyn ‘Abba! Tas!’

¹⁶An Spyrys y honan a dheg dustuni gans agan spyrys ni, ni dhe vos mebyon Duw,

¹⁷ha mebyon Duw mars on, heryon ynwedh, heryon a Dhuw ha kes-heryon a Grist, mar kodhevyn ganso rag may fyn war-barth ganso yn golewder.

¹⁸My a dyb na dal galarow an termyn ma bos kehaval dhe'n golewder usi ow tos dhe vos diskwedhys dhyn.

¹⁹Rag an kreashyon a wayt gans mall an diskwedhyans a vebyon Duw.

²⁰Rag yth esa an kreashyon yn-dann vaystri euveredh, nyns o a'y vodh mes der y vodh ev neb a'n fethas yn govenek;

²¹drefenn an kreashyon y honan dhe vos rydhhes dhiworth kethneth podredhes dhe rydhses golewder fleghes Duw.

²²Ni a woer an kreashyon oll dhe vos ow kyni yn keudh war-barth bys omma;

²³mes moy es henna, ni agan honan ynwedh, a'gan beus kynsa frut an Spyrys, ni agan honan a gyn ynnon agan honan dell wortyn gans mall adoptyans avel mebyon, daspren agan korf.

²⁴Rag y'n govenek may feun selwys, mes govenek gwelys nyns yw govenek, rag piw a wayt an pyth a wel?

²⁵Mes mar kwaytir an pyth na welir, gans mall y'n gwaytir.

²⁶Ynwedh an Spyrys a'gan gweres yn agan gwannder, rag ny wodhon fatell byssyn dell dhegoedh, mes an Spyrys y honan a bys ragon[11] gans kyni dres leverel.

²⁷Hag ev neb usi ow hwithra kolonnow a woer an pyth usi yn brys an Spyrys, rag ev dhe bysi a-barth an syns herwydh bodh Duw.

²⁸Ni a woer pup-tra dhe oberi war-barth rag dader rag an re a gar Duw, an re yw gelwys herwydh y borpos.

²⁹Rag an re a ragaswonnis, ev a's ragdhestnas ynwedh dhe vos kesfurvys yn imaj y Vab, rag may fo ev an kynsa-genys yn mysk breder pals.

³⁰Ha'n re a ragdhestnas, ev a's elwis ynwedh; ha'n re a elwis, ev a's justifias ynwedh; ha'n re a justifias, ev a's glorifias ynwedh.

³¹Pandr'a leveryn dhe'n taklow ma ytho? Mars usi Duw a-barth dhyn, piw eus er agan pynn?

³²Neb na sparyas y Vab y honan mes y'n ros ragon ni oll, a ny vynn ev ri dhyn pup-tra ganso?

³³Piw a guhudh an re dewisys gans Duw? Duw yw hag a akwit.

³⁴Piw a guhudh? Yesu[12] Krist yw, neb a verwis, yn hwir, hag a veu drehevys a'n mernans, hag usi a'n dhyghowbarth dhe Dhuw, hag a bys ragon.

³⁵Piw a'gan diberth dhiworth kerensa Krist? A wra galar, po anken, po helghya, po esow, po noethedh, po peryll, po kledha?

³⁶Dell yw skrifys, ‘A'th wovis jy yth on ny ledhys oll an jydh; reknys on ni avel deves dhe'n ladhva.’

³⁷Mes yn oll an taklow ma moy es tryghoryon on dredho ev neb a'gan kara.

³⁸Rag surhes ov, nag ankow, na bewnans, na eledh, na prynsipatys, na taklow eus lemmyn, na taklow a dheu, na nerthow,[13]

³⁹na ughelder, na downder, na tra arall y'n kreashyon oll, ny yll agan diberth dhiworth kerensa Duw yn Krist Yesu agan Arloedh.