Read Kernewek Romanyon 9 Bible Online

Romanyon 9 - Kernewek bible

Romanyon 9

¹Yth esov ow kewsel an gwirder yn Krist, ny wowlavarav; ow howses a dheg dustuni y'n Spyrys Sans,

²bos dhymm galar meur hag anken heb hedhi y'm kolonn.

³Rag y'm bia bodh my ow honan dhe vos milligys ha diberthys dhiworth Krist rag ow breder, ow herens a-barth an kig.

⁴Ysraelysi yns ha dhedha yw an adoptyans avel mebyon, an golewder, an kevambosow, ri an lagha, an servis[14] ha'n ambosow,

⁵dhedha yth yw an ugheldasow hag a'ga eghenn, war-lergh an kig, yw Krist usi a-ugh oll, Duw bennigys bys vykken. Amen.

⁶Mes nyns yw par dell fallsa ger Duw. Rag nyns yns dhe Ysrael oll hag yw sevys a Ysrael.

⁷Ha nyns yns oll mebyon Abraham drefenn i dhe vos y henedh; mes ‘Dre Ysak yth henwir dha henedh.’

⁸Homma a styr nag yw mebyon an kig neb yw mebyon Duw, mes mebyon an ambos a reknir avel henedh.

⁹Rag hemm yw an pyth a leveris an ambos, ‘A-dro dhe'n termyn ma y tehwelav hag y fydh mab dhe Sara.’

¹⁰Ha ny veu yndella yn unnsel, mes ynwedh pan omdhegsa Rebeka gans unn gour, agan hendas, Ysak,

¹¹kyn na vons hwath genys na ny wrussens naneyl da na drog, (rag may pessyo towl Duw herwydh dewisyans, a-der der oberow mes der y alow),

¹²dhedhi y leveris, ‘An kottha a wra servya an yowynka.’

¹³Dell yw skrifys, ‘Yakob a geris mes Esaw a gesis.’

¹⁴Pandr'a leveryn ytho? Eus kammhynseth gans Duw? Bynner re bo!

¹⁵Rag ev a lever dhe Moyses, ‘My a gemmer mersi warnodho ev may kemmerav mersi warnodho, ha my a gemmer pita anodho ev neb may kemmerav pita anodho.’

¹⁶Ytho nyns yw drefenn bodh den na drefenn lavur den mes drefenn tregeredh Duw.

¹⁷Rag an skryptor a lever dhe Faro, ‘My re'th sevis rag an keth tra ma may tiskwetthiv dhis ow galloes ynnos ha may fo dyllys ow hanow vy y'n norvys oll.’

¹⁸Ytho ev a gemmer mersi war geniver a blekkyo dhodho hag ev a galesha kolonn keniver a blekkyo dhodho.

¹⁹Ty a lever dhymm ytho, ‘Prag y krodhvol ev? Rag piw a yll sevel erbynn y vodh?’

²⁰Mes piw os jy, den, dhe worthybi dhe Dhuw? A lever an dra formys dh'y formyer, ‘Prag y'm gwrussys yndella?’

²¹A nyns eus dhe'n gweythor-pri maystri war an pri dhe wruthyl a'n keth tamm an eyl lester rag enor ha'y gila rag disenor?

²²Mes pandra mar kwrug Duw, gans bodh a dhiskwedhes y gonnar ha dyllo y alloes, perthi gans perthyans meur an lestri a gonnar gwrys gwiw rag distrui,

²³ha henna may fo godhvedhys rychys y wolewder rag an lestri a dregeredh hag a ragbareusis ev rag golewder,

²⁴bys dhyn ni neb re elwis, na veu unnsel a'n Yedhewon, mes ynwedh a'n kenedhlow?

²⁵Dell lever ev ynwedh yn Hosea, ‘An re nag o ow fobel my a's henow ow fobel, ha hi nag o kerys, my a's henow ow haradow.’

²⁶‘Hag y'n keth le may feu leverys dhedha, “Nyns owgh ow fobel”, ena i a vydh henwys mebyon an Duw bew.’

²⁷Hag Ysay a gri yn ughel a-dro dhe Ysrael, ‘Mara pydh niver mebyon Ysrael avel tewes an mor, an remenant a vydh selwys;

²⁸rag an Arloedh a gowlwra y vreus war an norvys, heb hokya.’

²⁹Ha dell dharganas Ysay, ‘Na assa Arloedh an luyow has, y tothyen ha bos avel Sodom ha gwrys vien haval dhe Gomorra.’

³⁰Pandr'a leveryn ytho? An kenedhlow na siwyens ewnder re gavas ewnder dre fydh;

³¹mes Ysrael ow siwya lagha a ewnder ny dhrehedhas dhe'n lagha.

³²Praga? Drefenn na'n siwya dre fydh mes dre oberow.[15] I re drebuchyas orth an men a drebuchya,

³³dell yw skrifys, ‘Ottavy ow korra yn Sion men trebuchya, ha karrek a offens ha neb a grysso ynno, ny berth ev meth.’