Read Kernewek 1 Korinthianys 10 Bible Online

1 Korinthianys 10 - Kernewek bible

1 Korinthianys 10

¹Ny vynnav, breder, hwi dhe vos heb godhvos bos agan tasow oll yn-dann an gommolenn, hag i oll a dremenas der an mor,

²hag oll a veu besydhys yn Moyses, y'n gommolenn hag y'n mor,

³hag oll a dhybris an keth boes spyrysek,

⁴hag oll a evas an keth diwes spyrysek; rag i a evas a'n garrek spyrysek a'ga siwyas, ha'n garrek o Krist.

⁵Byttegyns, gans an brassa rann anedha Duw nyns o pes da; rag domhwelys vons y'n difeyth.

⁶Gwarnyansow dhyn ni yw an traow ma, ma na vo dhyn hwans a dhrog, par dell esa dhedha i.

⁷Na vewgh gordhyoryon idolys, kepar ha rann anedha, dell yw skrifys, ‘An bobel a wrug esedha rag dybri hag eva ha sevel rag gwari.’

⁸Ny goedh dhyn omri dhe fornikashyon, par dell wrug rann anedha, hag yn unn jydh y ferwis tri mil warn ugens.

⁹Ny goedh dhyn previ Krist[8] par dell wrug rann anedha, hag a vons distruys gans serf;

¹⁰ha na grodhvolewgh par dell wrug rann anedha, hag y fons ledhys gans an distruer.

¹¹Lemmyn an traow ma a hwarva yn ensampel dhedha i, mes skrifys vons rag agan keski ni war neb deuva keweras an oesow.

¹²Rakhenna, neb eus ow tybi y sev ev, kemmeres with ma na goettho.

¹³Ny dheuva warnowgh temptyans vyth nag yw kemmyn dhe vab-den. Lel yw Duw, ha ny wra ev agas gasa dhe vos temptys dres agas nerth, mes keffrys ha'n temptyans ri fordh a dhiank a wra ev, rag may hyllowgh y berthi.

¹⁴Rakhenna, ow haradowyon, fiewgh dhiworth gordhyans idolys.

¹⁵My a gews orthowgh, tus fur dell owgh; gwrewgh hwyhwi breusi an pyth a lavarav.

¹⁶An hanaf a vennath hag a vennigyn, a nyns yw kevrenna yn goes Krist? An bara hag a derryn, a nyns yw kevrenna yn korf Krist?

¹⁷A-ban eus unn bara, ni neb yw lies unn korf yw, drefenn ni dhe gevrenna an keth bara.

¹⁸Mirewgh orth usadow Ysrael: a nyns yw an re a dheber an sakrifisow kevrennoryon a'n alter?

¹⁹Pandra, ytho, a lavarav? Bos offrynn dhe idol neppyth, po bos idol neppyth?

²⁰Na, mes an pyth a sakrifions,[9] i a'n sakrifi dhe dhywolow, kammenn dhe Dhuw; ny vynnav orthowgh dos ha bos kevrennoryon gans dywolow.

²¹Ny yllowgh hwi eva hanaf an Arloedh ha hanaf dywolow; ny yllowgh hwi kevrenna a voes an Arloedh hag a voes dywolow.

²²A wren ni gul dhe'n Arloedh perthi avi? On ni kreffa agesso ev?

²³‘Lafyl yw pup-tra’, mes nyns yw pup-tra dhe les; ‘lafyl yw pup-tra’, mes ny wra pup-tra drehevel.

²⁴Na hwiles denvyth y dhader y honan, mes dader den arall.

²⁵Dybrewgh pypynag yw gwerthys y'n varghas-kig heb hwithra travyth drefenn kowses;

²⁶rag ‘dhe'n Arloedh yw an nor, ha pup-tra eus ynno.’

²⁷Onan a'n dhiskryjygyon mara'gas gelow dhe gevewi, ha mar mynnowgh mos, dybrewgh pup-tra yw settys a-ragowgh heb hwithra travyth drefenn kowses.

²⁸Mes mar lever nebonan dhywgh, ‘Hemma re beu offrynnys yn sakrifis’, na'n dybrewgh, ow kul vri orth neb a leveris dhywgh hag drefenn kowses,

²⁹y gowses ev, a-der agas kowses hwi. Prag y koedh ow rydhses vy bos breusys gans kowses den arall?

³⁰Mar kemmerav dre ras, prag yth ov vy kablys rag an pyth a wrassav.

³¹Ytho, po dybri po eva a wrewgh, po pypynag a wrewgh, pup-tra dhe wordhyans Duw gwrewgh.

³²Na wrewgh offens vydh dhe Yedhewon, na dhe Grekys, na dhe eglos Duw,

³³par dell blegyav evy dhe dus oll yn pup-tra a wrav, heb hwilas ow les ow honan, mes an les a lies, may fons selwys.