Read Kernewek 1 Korinthianys 11 Bible Online

1 Korinthianys 11 - Kernewek bible

1 Korinthianys 11

¹Gwrewgh war ow lergh, par dell wrav vy war-lergh Krist.

²My a'gas kommend drefenn hwi dhe berthi kov ahanav yn pup-tra, ha dhe synsi yn fast an hengovyow par dell y's res dhywgh.

³Mes my a vynn orthowgh godhvos bos Krist penn pub gour ha bos an gour penn benyn ha bos Duw penn Krist.

⁴Pub gour ow pysi po ow profoesa ha'y benn kudhlennys a dhisenor y benn,

⁵mes pub benyn ow pysi po ow profoesa ha'y fenn heb kudhlenn a dhisenor hy fenn, kepar ha pan ve hi bloghhes yth yw.

⁶Rag benyn mar nyns yw kudhlennys, bedhes knyvys; mes mars yw divlas dhe venyn bos knyvys po bloghhes, bedhes kudhlennys.

⁷Rag ny goedh dhe wour kudhlenna y benn, a-ban yw ev imaj ha golewder Duw; mes benyn yw golewder gour.

⁸Rag gour nyns yw a venyn, mes benyn a wour;

⁹yn tevri, gour ny veu gwrys rag benyn, mes benyn rag gour.

¹⁰Rakhenna, y koedh dhe venyn gorra arwoedh hy awtorita war hy fenn, a-barth an eledh.

¹¹Byttegyns y'n Arloedh naneyl benyn ny sev heb gour, na gour heb benyn;

¹²rag benyn dell yw dhiworth gour, yndella yw gour dre venyn; mes pup-tra dhiworth Duw yw.

¹³Breusiwgh yntredhowgh agas honan: a dhelledh dhe venyn heb kudhlenn pysi dhe Dhuw?

¹⁴Natur hy honan, a ny dhysk dhywgh bos disenor dhe wour ha ganso gols hir,

¹⁵mes bos golewder dhe venyn ha gensi gols hir? — drefenn bos res dhedhi an gols hir rag kudhlenn.

¹⁶Mars yw bodh nebonan dhe vos kavyllek, nyns eus usadow a'n par na dhyn ni na dhe eglosyow Duw.

¹⁷Mes y'n gorhemmynnow a siw ny'gas kommendyav, drefenn na omguntellowgh rag an gwell mes rag an gweth.

¹⁸Kynsa, pan omguntellowgh yn eglos, my a glew bos folsyow yntredhowgh hag yn rann my a'n krys.

¹⁹Rag y telledh bos eresys yntredhowgh may fons aswonnys an re yntredhowgh yw gwiryon.

²⁰Pan omguntellowgh war-barth, nyns yw dhe dhybri koen an Arloedh;

²¹rag, dhe brys boes, pub huni a gemmer y goen heb gortos, ha rakhenna an eyl a'n jeves nown, y gila yw medhow.

²²Dar! A nyns eus dhywgh chiow may hyllowgh dybri hag eva? Po a dhispresyowgh eglos Duw ha shamya an re na's teves travyth? Pandr'a allav vy dhe leverel dhywgh? A wrav vy agas kommendya? Y'n kas ma, ny'gas kommendyav.

²³Rag my a dhegemmeras dhiworth an Arloedh an pyth a res vy ynwedh dhywgh hwi: an Arloedh Yesu, y'n nos may feu traytys, a gemmeras bara,

²⁴ha wosa ri gras, ev a'n torras ha leverel, ‘Hemm[10] yw ow horf hag yw ragowgh;[11] gwrewgh hemma yn kovadh ahanav vy.’

²⁵Keffrys y'n keth vaner an hanaf, wosa koen, ow leverel, ‘An hanaf ma yw an kevambos nowydh y'm goes vy; gwrewgh hemma, peskweyth ma'n yffowgh, yn kovadh ahanav vy.’

²⁶Rag peskweyth may typprowgh an bara ma hag eva an hanaf, mernans an Arloedh a dherivowgh erna dheffo.

²⁷Rakhenna, piwpynag a dheppro an bara po a effo hanaf an Arloedh yn fordh anwiw, kablus vydh a gorf hag a woes an Arloedh.

²⁸Mes preves den y honan, hag ena dybres a'n bara hag eves a'n hanaf;

²⁹rag piwpynag a dheppro hag eva heb aswonn an korf,[12] a dheber hag eva breus warnodho y honan.

³⁰Henn yw prag yth yw rann ahanowgh gwann ha klav hag y koskas rann.

³¹Mes mar preussen ni agan honan yn hwir, ny vien ni breusys;

³²mes pan on ni breusys gans an Arloedh, keskys on ma na vyn ni dampnys war-barth ha'n bys.

³³Ytho, ow breder, pan omguntellowgh rag dybri, gortewgh an eyl y gila.

³⁴Mars eus nown dhe nebonan, dybres yn chi, ma na omguntellowgh dhe vreus. A-dro dhe'n traow erell, my a's orden pan dhov.