Read Kernewek 1 Korinthianys 12 Bible Online

1 Korinthianys 12 - Kernewek bible

1 Korinthianys 12

¹Lemmyn, a-dro dhe daklow spyrysek, breder, ny vynnav orthowgh bos heb godhvos.

²Dell wodhowgh, pan ewgh hwi paganys, dynys vewgh, ledys yn stray dhe idolys avlavar, yn py fordh pynag y fewgh ledys.

³Rakhenna my a afydh dhywgh na lever denvyth ‘Milligys re bo Yesu’ hag ev ow kewsel dre Spyrys Duw, keffrys na yll denvyth leverel ‘Yesu yw an Arloedh’ marnas der an Spyrys Sans.

⁴Lemmyn rohow a lies eghenn yma, mes an keth Spyrys;

⁵ha soedhow a lies eghenn yma, mes an keth Arloedh;

⁶hag oberyansow a lies eghenn yma, mes an keth Duw yw a ober pup-tra yn tus oll.

⁷Mes dhe bub huni yw res diskwedhyans an Spyrys rag an les kemmyn.

⁸Rag dhe onan yw res der an Spyrys lavar a skentoleth, dhe onan arall lavar a wodhvos herwydh an keth Spyrys,

⁹dhe onan arall fydh der an keth Spyrys, ha dhe onan arall rohow a yaghheans der an keth[13] Spyrys,

¹⁰dhe onan arall galloes dhe oberi merklys, dhe onan arall profoesans, dhe onan arall godhvos dhe dhissernya yntra spyrysyon, dhe onan arall divers tavosow, ha dhe onan arall styr tavosow;

¹¹hag oberys yw oll an traow ma gans an unn ha'n keth Spyrys, neb a re, dell vynn ev, dhe gettep penn y rann y honan.

¹²Rag kepar dell yw an korf onan, ha ganso lies esel, (mes eseli an korf, kynth yns lies, yw unn korf), yndella ynwedh yw Krist.

¹³Rag der unn Spyrys ni oll a veu besydhys yn unn korf, Yedhewon po Grekys, kethyon po tus rydh, ha dhyn ni oll y feu gwrys dhe eva yn unn Spyrys.

¹⁴Rag devri, an korf nyns yw a unn esel, mes a lies.

¹⁵Mar lavarra an troes, ‘Drefenn nag ov leuv, nyns ov rann a'n korf’, ny via byttele rann a'n korf.

¹⁶Ha mar lavarra an skovarn, ‘Drefenn nag ov lagas, nyns ov rann a'n korf’, ny via byttele rann a'n korf.

¹⁷Mar pe oll an korf lagas, ple fia an skovarn? Mar pe oll an korf klewes, ple fia tastya?

¹⁸Ytho, lemmyn Duw a worras an eseli, kettep onan, y'n korf par dell vynnas.

¹⁹Mar pe i oll unn esel, ple fia an korf?

²⁰Lemmyn lies esel yma, mes unn korf.

²¹An lagas ny yll leverel dhe'n leuv, ‘Nyns eus dhymm edhomm ahanas’, na'n penn dhe'n treys, ‘Nyns eus dhymm edhomm ahanowgh’;

²²mes moy es henna, rannow an korf hag a hevel bos gwanna yw anhepkorradow,

²³ha rannow an korf hag yw le enorys, dell dybyn, yn kyrghynn an re ma ni a sett enor brassa, ha'gan rannow anonest yw dyghtys gans bern brassa,

²⁴ma nag eus edhomm anodho dh'agan rannow onest. Mes Duw re gesunyas an korf y'n for' ma, ow ri enor brassa dhe'n rann may fyll enor dhedhi,

²⁵ma na vo fols vyth y'n korf, mes may kemmerro an eseli an keth bern an eyl a'y gila.

²⁶Mar kodhev unn esel, an eseli oll a wodhev ganso; mars yw enorys unn esel, an eseli oll a lowenha war-barth.

²⁷Lemmyn, hwi yw korf Krist, hag eseli anodho kettep penn.

²⁸Ha Duw re ordenas y'n eglos, kynsa abesteli, nessa profoesi, tressa dyskadoryon, ena galloes dhe oberi merklys, ena rohow a yaghheans, a ri sokor, a venystra, a dhivers tavosow.

²⁹Yw peub oll abesteli? Yw peub oll profoesi? Yw peub oll dyskadoryon? A ober peub oll merklys?

³⁰Yw dhe beub oll galloes dhe yaghhe? A gews peub oll yn tavosow? A yll peub oll ri styryow?

³¹Mes yeunewgh yn ter an rohow ughella. Ha my a wra diskwedhes dhywgh fordh hwath bryntinna.