Read Kernewek 1 Korinthianys 15 Bible Online

1 Korinthianys 15 - Kernewek bible

1 Korinthianys 15

¹Lemmyn my a dhre dh'agas kov, breder, an aweyl hag a bregewthis dhywgh, hag a dhegemmersowgh, keffrys may sevowgh ynni,

²keffrys mayth owgh selwys dredhi, mar synsowgh yn fast an ger a bregewthis dhywgh, marnas yn euver y kryssowgh.

³Rag my a ystynnas dhywgh yn kynsa an pyth a dhegemmeris vy ynwedh, Krist dhe verwel rag agan peghosow herwydh an skryptors,

⁴ha bos ynkleudhys, ha dasserghys dhe'n tressa dydh, herwydh an skryptors;

⁵hag yth omdhiskwedhas dhe Kefas, ena dhe'n dewdhek.

⁶Wosa henna ev a omdhiskwedhas dhe voy es pymp kans broder oll war-barth, mayth yw an moyha rann anedha hwath yn few, kyn koskas re.

⁷Wosa henna ev a omdhiskwedhas dhe Jamys, ena dhe'n abesteli oll.

⁸Gordhiwedh, avel dhe onan genys kyns y dermyn, ev a omdhiskwedhas dhymmo vy ynwedh.

⁹Rag an lyha a'n abesteli yth ov, anwiw dhe vos gelwys abostol, drefenn my dhe helghya eglos Duw;

¹⁰mes dre ras Duw yth ov vy an pyth hag yth ov, ha nyns o euver y ras orthiv. Yn kontrari, my a lavuryas yn kreffa agessa oll, kyn nag o my, mes gras Duw usi genev.

¹¹Byttegyns, po my po i, yndella ni a bregoth hag yndella hwi a grysis.

¹²Lemmyn, mars yw Krist pregewthys avel onan re beu drehevys dhiworth an re varow, fatell yll rann ahanowgh leverel nag eus dasserghyans a'n re varow?

¹³Mes mar nyns eus dasserghyans a'n re varow, ena Krist ny veu drehevys;

¹⁴ha mar ny veu Krist drehevys, euver yw agan pregoth, hag euver yw agas fydh.

¹⁵Keffrys kevys on ni fals dhustunoryon a Dhuw, rag ni dhe dhustunia a Dhuw ev dhe dhrehevel Krist, neb na wrug ev y dhrehevel mars yw gwir nag yw drehevys an re varow.

¹⁶Rag mar nyns yw drehevys an re varow, na hwath ny veu Krist drehevys;

¹⁷ha mar ny veu drehevys Krist, euver yw agas fydh, hag yth esowgh hwi hwath yn agas peghosow.

¹⁸Keffrys an re neb re goskas yn Krist, dhe goll galsons.

¹⁹Mar ny'gan beus govenek yn Krist saw y'n bewnans ma, moy truedhek on ni ages tus oll.

²⁰Mes Krist yn hwir re beu drehevys dhiworth an re varow, kynsa frut an re a goskas.

²¹Rag dell dheuth ankow der unn den, der unn den ynwedh y teuth dasserghyans an re varow.

²²Rag dell verow oll yn Adam, yndella ynwedh yn Krist oll a vydh gwrys yn few.

²³Mes peub yn y dorn y honan: Krist an kynsa frut: wosa henna, orth y dhevones, an re yw dhe Grist.

²⁴Ena y teu an diwedh, pan dhaskorr ev an wlaskor dhe Dhuw an Tas, wosa distrui pub prynsipata ha pub potestas ha pub maystri.

²⁵Rag res yw dhodho reynya bys pan worro oll y eskerens yn-dann y dreys.

²⁶An eskar diwettha dhe vos distruys yw ankow;

²⁷rag ‘ev re worras pup-tra yn-dann y dreys.’ Mes pan leverir ‘pup-tra dhe vos gorrys yn-danno’, diblans, nag yw reknys yn hemma ev neb re worras pup-tra yn-danno.

²⁸Pan yw pup-tra gorrys yn-danno, ena an Mab y honan a vydh gostydh dhe neb re worras pup-tra yn-danno, may fo Duw oll yn oll.

²⁹Poken pyth a wrons i neb yw besydhys a-barth an re varow? Mar nyns yw drehevys mann an re varow, prag yth yns i besydhys a-barth dhedha?

³⁰Ha prag yth eson ni ow peryllya pub eur?

³¹Pub dydh y farwav — my a'n avow, breder, dre ow bostyans a-dro dhywgh hag a'm beus yn Krist Yesu agan Arloedh.

³²Mar omledhis vy orth goedhviles yn Efesus rag skilys nag o saw a dhenses,[15] py les yw dhymm? Mar nyns yw drehevys an re varow, ‘Gwren dybri hag eva, rag a-vorow y ferwyn.’

³³Na vedhewgh toellys: ‘Keskowethyans drog a shynd norter da.’

³⁴Dewgh dhe skians sad hag ewn, ha na beghewgh namoy. Rag tus yma, na aswonnons Duw; hemma my a lever dh'agas meth.

³⁵Mes nebonan a wra govynn, ‘Fatell yw an re varow drehevys? Gans py par korf y tons i?’

³⁶Ty wokki! An pyth a hesydh ny wra bewa marnas ev a verow;

³⁷ha'n pyth a hesydh nyns yw an korf a vydh wosa hemma, mes greunenn noeth, martesen a waneth po a neb ys arall;

³⁸mes Duw a re dhodho korf dell dhewisas, ha dhe bub sort a has y gorf y honan.

³⁹Rag nyns yw kehaval kig oll, mes unn sort rag tus yma, onan arall rag bestes, onan arall rag ydhyn hag onan arall rag puskes.

⁴⁰Yma korfow a nev ha korfow a nor; mes golewder an korf a nev yw unn dra, ha golewder an korf a nor yw tra arall.

⁴¹Yma unn golewder a'n howl, ha golewder arall a'n loer, ha golewder arall a'n ster; rag an eyl sterenn yw dihaval dhe sterenn arall yn golewder.

⁴²Yndella yw dasserghyans an re varow. An pyth yw hesys yn podredhes, dastrehevys yw yn anpodredhes.

⁴³Yn disenor yth yw hesys, yn golewder yth yw dastrehevys; yn gwannder yth yw hesys, yn nerth yth yw dastrehevys;

⁴⁴korf a'n bys ma yth yw hesys, korf spyrysek yth yw drehevys. Mars eus korf a'n bys ma, korf spyrysek yma ynwedh.

⁴⁵Yndella skrifys yw, ‘An kynsa den Adam a dheuth ha bos enev bew’; an Adam diwettha a dheuth ha bos spyrys a re bewnans.

⁴⁶Mes nyns yw an korf spyrysek hag yw an kynsa, mes korf a'n bys ma, ha wosa henna an korf spyrysek.

⁴⁷A'n dor yth o an kynsa den, den a dhoust; a nev yth yw an nessa den.

⁴⁸Par dell o an den a dhoust, yndella yw an re neb yw a dhoust; ha par dell yw an den a nev, yndella yw an re neb yw a nev.

⁴⁹Par dell dhugon ni hevelep an den a dhoust, ni a wra doen ynwedh hevelep an den a nev.

⁵⁰Hemma my a lever, breder: kig ha goes ny yllons erita gwlaskor Duw, na podredhes ny erit anpodredhes.

⁵¹Otta, my a lever kevrin dhywgh. Ny wren ni oll koska, mes ni oll a vydh chanjys,

⁵²yn pols, war blynch lagas, orth an hirgorn diwettha. Rag an hirgorn a wra seni, ha'n re varow a vydh drehevys heb podredhes bynitha, ha chanjys vydhyn ni.

⁵³Rag res yw dhe'n korf ma a beder gwiska anpodredhes, ha dhe'n korf marwel gwiska anvarwoleth.

⁵⁴Ha pan wra an dra bodradow ma omwiska yn anpodredhes, ha'n dra varwel ma omwiska yn anvarwoleth, ena y hwyrvydh an ger yw skrifys, ‘Ankow yw kollenkys yn trygh.’

⁵⁵‘A ankow, ple'ma dha drygh? A ankow, ple'ma dha vros?’

⁵⁶Bros ankow yw peghadow, ha nerth peghadow yw an lagha;

⁵⁷Mes re bo grasow dhe Dhuw, neb a re dhyn an trygh der agan Arloedh Yesu Krist.

⁵⁸Rakhenna, ow breder meurgerys, bedhewgh len, fyrv, pup-prys ow palshe yn gonis an Arloedh, ow kodhvos nag yw euver agas lavur y'n Arloedh.