Read Kernewek 1 Korinthianys 16 Bible Online

1 Korinthianys 16 - Kernewek bible

1 Korinthianys 16

¹Lemmyn a-dro dhe guntell an rohow rag an syns: par dell erghis vy dhe'n eglosyow a Galatia, yndella gwrewgh hwi ynwedh.

²Dhe gynsa dydh pub seythun, pub huni ahanowgh gorres neppyth a-denewen ha'y witha, dell siwenno, ma na vo edhomm a guntell pan dhyffiv.

³Ha pan dhyffiv, my a wra dannvon piwpynag a gommendyowgh, ha gansa lytherow, may tokkons agas ro dhe Yerusalem,

⁴ha mar tesedh dhymm mos ynwedh, i a wra mos genev.

⁵My a wra dos dh'agas gweles wosa tremena dre Masedonia, rag tremena a wrav dre Masedonia,

⁶ha martesen my a wra triga genowgh po devri spena an gwav, ma'm dannvennowgh y'm hyns plepynag yth ylliv.

⁷Rag ny vynnav agas gweles pan nag esov marnas ow tremena; my a wayt spena hirneth genowgh, mar re an Arloedh kummyas.

⁸Mes my a wra gortos yn Efesus bys yn Penkost,

⁹rag daras efan hag effeythus yw igerys dhymm rag gonis meur y les, hag yma meur a dus usi ow sevel er agan pynn.

¹⁰Mar teu Timothi, gwaytyewgh ma'n gwryllowgh bos heb own yntredhowgh, rag ow kul gonis an Arloedh ymava, kepar ha my.

¹¹Ytho, na'n dispresys denvyth. Dannvenewgh ev yn y hyns yn kres, may teffo dhymm; rag my a'n gorta gans an vreder.

¹²A-dro dh'agan broder Apollos, meur my a ynnias warnodho may teffa dhywgh gans an vreder, mes nyns o y vodh mann dhe dhos lemmyn. Ev a wra dos pan vo dhodho spas.

¹³Bedhewgh hewoel, sevewgh fast y'n fydh, bedhewgh hardh, bedhewgh krev.

¹⁴Pup-tra hag a wrewgh, bedhes gwrys yn kerensa.

¹⁵Tra arall a vynnav, breder: hwi a woer bos mayni Stefanas an kynsa frut yn Aghaia, hag i re omros dhe wonis dhe'n syns;

¹⁶my a'gas ynni may fowgh gostydh dhe dus a'n par na, ha dhe bub kesoberer ha lavuryer.

¹⁷Heudhhes ov orth devedhyans Stefanas ha Fortunatus hag Aghaikus, rag i a astiveras dhymm a-ban nag esowgh hwi omma.

¹⁸Rag i a dhiskwithas ow spyrys vy ha'gas spyrys hwi keffrys. Ytho, aswonnewgh tus a'n par na.

¹⁹An eglosyow a Asia a'gas salus. Akwila ha Priska, ha gansa an eglos yn aga chi, a'gas salus yn kolonnek y'n Arloedh.

²⁰An vreder oll a'gas salus. Salusewgh an eyl y gila gans bay sans.

²¹An salusyans yw gans ow leuv ow honan, Powl.

²²Neb na gar an Arloedh, bedhes milligys. Re dheffo agan Arloedh! [16]

²³Gras agan Arloedh Yesu re bo genowgh.

²⁴Ow herensa re bo genowgh hwi oll yn Krist Yesu. Amen.[17]