Read Kernewek 1 Korinthianys 4 Bible Online

1 Korinthianys 4 - Kernewek bible

1 Korinthianys 4

¹Yndella y koedh dhe dus agan akontya avel gwesyon Krist ha rennysi kevrinyow Duw.

²Dres henna, hwilys yw yn rennysi, aga bos prevys lel.

³Byttegyns ny'm deur mann ow bos breusys genowgh hwi po gans breuslys vytholl a vab-den; ha my ynwedh, ny ombreusav,

⁴rag ny wonn travyth er ow fynn ow honan, mes nyns ov vy akwitys dre henna. An Arloedh yw, neb a'm breus.

⁵Na vreusiwgh travyth, ytho, kyns an ewn-dermyn may teffo an Arloedh, neb a wra golowi traow kudhys y'n tewlder keffrys diskwedhes kusulyow an golonn; hag y'n eur na kettep onan a wra kavoes y wormola dhiworth Duw.

⁶My re gewsis an taklow ma, breder, a-dro dhymmo vy hag a-dro dhe Apollos rag agas les, dredhon may tyskowgh styr an lavar ‘Travyth dres an pyth yw skrifys’, ma na vowgh hwi omhwythys a-barth an eyl erbynn y gila.

⁷Rag piw a wel dha vos arbennik? Ha pandra a'th eus na dhegemmersys? Ha mara'n degemmersys, prag y fostydh, kepar ha pan na dhegemmersys?

⁸Y'n eur ma lenwys owgh hwi! Y'n eur ma deuvewgh ha bos rych! A-der ni, hwi re dheuth ha bos myghternedh! Hag unnweyth a pewgh hwi myghternedh yn hwir, may kesreynnyen ni genowgh!

⁹Dell dybav, Duw re'gan diskwedhas, an abesteli, avel an re dhiwettha, dampnys dhe'n mernans, drefenn ni dhe dhos ha bos ges dhe'n bys, keffrys dhe eledh ha dhe dus.

¹⁰Fellyon rag Krist yth on ni, mes skentel yn Krist yth owgh hwi; gwann yth on ni, mes krev yth owgh hwi; yn enor yth owgh hwi synsys, mes disenorys yth on ni.

¹¹Bys y'n eur ma ha nown ha syghes ni a'm beus, ha noeth on ni, ha skorjys, ha diannedh,

¹²ha ni a lavur ow konis gans agan diwleuv agan honan; drog henwys, ni a vennik; helghys, ni a wodhev:

¹³sklandrys, ni a gews yn kuv; ni re dheuth ha bos atal an bys, skubyon a bup-tra, bys y'n jydh ma.

¹⁴Ny skrifav dhywgh an traow ma rag gul dhywgh bos methek, mes rag agas keski avel ow fleghes veurgerys.

¹⁵Rag kyn fo dhywgh deg mil a dhyskadoryon yn Krist, nyns eus dhywgh nameur a dasow; yn tevri my a dheuth ha bos agas tas yn Krist der an aweyl.

¹⁶Rakhenna my a'gas pys a wul war ow lergh.

¹⁷Hemm yw an pur skila my dhe dhannvon dhywgh Timothi, neb yw ow flogh meurgerys ha lel y'n Arloedh, ha neb a wra dri dh'agas kov ow fordhow yn Krist Yesu, kepar dell dhyskav yn pub tyller, yn pub eglos.

¹⁸Lemmyn, re ahanowgh deuva ha bos goethus, kepar ha pan na ven ow tos dhywgh.

¹⁹Byttegyns my a wra dos dhywgh yn skon, mar mynn an Arloedh, ha diskudha an galloes, a-der an kows, a'n dus woethus ma;

²⁰rag nyns yw gwlaskor Duw yn kows mes yn galloes.

²¹Pandr'a vynnowgh? A wrav vy dos dhywgh ha genev gwelenn, poken gans kerensa hag yn spyrys a glorder?