Read Kernewek 1 Korinthianys 5 Bible Online

1 Korinthianys 5 - Kernewek bible

1 Korinthianys 5

¹Yn tevri, derivys yw bos fornikashyon yn agas mysk, fornikashyon nag yw kevys y bar yn mysk jentilys; henn yw, yma gour ow kesvewa gans gwreg y das.

²Ha goethus yth owgh hwi. A ny goedhvia dhywgh oela, ha tewlel yn-mes a-dhiworthowgh ev neb re wrug an drogober ma?

³Kyn nag esov vy yn agas lok y'n korf, hwath yth esov vy genowgh y'n spyrys, ha kepar ha pan ven ena, my re'n breusis neb a wrug an dra ma.

⁴Ha hwi, pan vowgh kuntellys war-barth yn hanow an Arloedh Yesu, ha genowgh hwi ow spyrys gans nerth agan Arloedh Yesu,

⁵res yw dhywgh daskorr an gour ma dhe Satnas rag terroes an kig may fo selwys y spyrys yn dydh an Arloedh.

⁶Agas bostyans nyns yw da. A ny wodhowgh hwi y hwra tamm goell dhe oll a'n toes sevel?

⁷Kerthewgh dhe-ves an goell koth may fowgh hwi bagasik nowydh a does, dell owgh hwi heb goell yn hwir. Rag Krist agan pask re beu offrynnys.[3]

⁸Na wren ni goelya, ytho, naneyl gans goell koth na gans goell a spit hag a dhrog, mes gans bara heb goell, a lelder hag a wiryonedh.

⁹Y'm epystyl my a skrifas dhywgh na goedh dhywgh kowethya gans tus dhijast,

¹⁰— kammenn nag yw ow styr an re dhijast y'n bys ma, po tus pith ha ladron wyls, po gordhyoryon idolys, rag y'n kas na res via dhywgh mos mes a'n bys.

¹¹Mes lemmyn my re skrifas dhywgh na gowetthyowgh gans nagonan, hag ev gelwys broder, yw den dijast, po den pith, po gordhyer idolys, po sklandrer, po medhow, po lader gwyls; byth na dhybrewgh gans den a'n par na.

¹²Pyth eus dhymmo vy dhe wul, ow preusi an re usi a-ves? A ny vreusowgh hwi an re usi a-bervedh?

¹³Duw a vreus an re a-ves. ‘Tewlewgh an tebelwas yn-mes ahanowgh agas honan.’