Read Kernewek 1 Korinthianys 6 Bible Online

1 Korinthianys 6 - Kernewek bible

1 Korinthianys 6

¹Pan eus dhe nebonan ahanowgh grevons erbynn den arall, a vedh ev bos breusys a-rag tus kammhynsek, kyns es a-rag an syns?

²A ny wodhowgh hwi y hwra an syns breusi an bys? Ha mars yw an bys dhe vos breusys genowgh hwi, owgh hwi anwiw dhe vreusi maters byghan?

³A ny wodhowgh hwi y hwren ni breusi eledh? Pygemmys moy traow an bewnans ma!

⁴Rakhenna mars eus dhywgh devri traow an bys dhe vos breusys, a wrewgh hwi aga dri a-rag an re yw dispresys y'n eglos?

⁵Hemma a lavarav rag gorra meth ynnowgh! A nyns eus yn agas mysk unn den skentel lowr neb a yll breusi ynter an vreder?

⁶Mes broder yw breusys erbynn broder, ha hemma dherag diskryjygyon!

⁷Lemmyn yn tevri, ha hwi ow mos dhe lagha, an eyl erbynn y gila, fethys owgh hwi yn tien. Prag nag yw gwell genowgh godhevel drokoleth? Prag nag yw gwell genowgh bos toellys?

⁸Mes hwi agas honan a wra drokoleth ha toell, ha hemma erbynn agas breder hwi.

⁹A ny wodhowgh hwi na wra drogoberoryon erita gwlaskor Duw? Na vedhewgh toellys! Na tus dhijast, na gordhyoryon idolys, nag avoutroryon, na'n re vedhel, na kethreydhelogyon,

¹⁰na ladron, na tus pith, na medhewon, na sklandroryon, na'n re graf, ny wrons i erita gwlaskor Duw.

¹¹Hag yndella y fedha re ahanowgh hwi; mes golghys vewgh, sanshes vewgh, akwitys vewgh yn hanow an Arloedh Yesu Krist ha gans Spyrys agan Duw.

¹²‘Lafyl yw pup-tra dhymm’, mes nyns yw pup-tra hag yw dhe les. ‘Lafyl yw pup-tra dhymm’, mes ny vynnav bos dres yn-dann vaystri travyth.

¹³‘Boes rag an benn-gasenn, ha'n benn-gasenn rag boes’, ha Duw a dhistru ha'n eyl ha'y gila. Nyns yw an korf rag fornikashyon mes rag an Arloedh, ha'n Arloedh rag an korf.

¹⁴Ha Duw a dhrehevis an Arloedh dasserghi hag ynwedh ev a wra agan drehevel ni der y alloes.

¹⁵A ny wodhowgh bos agas korfow eseli Krist? Ytho, a wrav vy kemmeres eseli Krist ha gul dhedha bos eseli hora? Bynner re hwarvo!

¹⁶A ny wodhowgh, neb a gesun gans hora dhe dhos ha bos gensi unn korf? Rag dell yw skrifys, ‘An dhew a wra dos ha bos unn kig.’

¹⁷Mes neb yw kesunys dhe'n Arloedh a dheu ha bos ganso unn spyrys.

¹⁸Gohelewgh fornikashyon. Py pegh arall pynag a wrello den, yn-mes a'n korf yma; mes neb yw dijast a begh erbynn y gorf y honan.

¹⁹A ny wodhowgh hwi bos agas korf tempel an Spyrys Sans a-bervedh ynnowgh, hag a'gas beus dhiworth Duw? Ny berghennowgh agas honan;

²⁰rag prenys a bris vewgh. Gordhyewgh Duw, ytho, yn agas korf.