Read Kernewek 1 Korinthianys 9 Bible Online

1 Korinthianys 9 - Kernewek bible

1 Korinthianys 9

¹A nyns ov vy livrys? A nyns ov vy abostol? A ny wrug vy gweles Yesu agan Arloedh? A nyns owgh hwi ow obereth y'n Arloedh?

²Mar nyns ov abostol dhe re erell, devri dhywgh hwyhwi yth ov; rag yth owgh hwi sel ow abostolieth y'n Arloedh.

³Hemm yw ow klem dhe'n re a vynnsa ow apposya.

⁴A nyns eus dhyn gwir a dhybri hag a eva?

⁵A nyns eus dhyn gwir a gemmeres genen gwreg gryjyk, kepar dell wra an abesteli erell ha breder an Arloedh ha Kefas?

⁶Po a nyns yw marnas Barnabas ha my heb gwir a omwitha rag gonis?

⁷Py souder a serv yn y gost y honan? Piw a blans gwinlann heb dybri rann a'y frut? Po py bugel deves a with para heb kavoes rann a'n leth?

⁸A lavarav an traow ma herwydh awtorita mab-den? A ny lever an lagha an keth traow?

⁹Rag yn lagha Moyses skrifys yw, ‘Na wra kelmi ojyon hag ev ow trushya.’ Yw oghen mayth yw Duw prederus a-dro dhedha?

¹⁰A ny gews ev yn tevri a-barth dhyn ni? Skrifys veu a-barth dhyn ni, a-ban goedh dhe'n aradror aras gans govenek ha dhe'n drushyer drushya gans govenek, a gavoes rann a'n drevas.

¹¹Mar konedhsyn ni has a daklow spyrysek yntredhowgh, yw tra veur mar mysyn agas dader a'n bys ma?

¹²Mar kevrenn re erell an gwir ma warnowgh, a ny wren ni hwath dhe voy? Byttegyns, ny wrussyn devnydh a'n gwir ma, mes ni a berth pup-tra kyns es gorra lett yn fordh aweyl Krist.

¹³A ny wodhowgh hwi an re arvethys y'n tempel dhe gavoes aga boes dhiworth an tempel, ha'n re ow servya orth an alter dhe gevrenna an pyth re beu offrynnys?

¹⁴Y'n keth vaner, an Arloedh a worhemmynnis y koedh dhe'n re neb a bregoth an aweyl kavoes aga fygans der an aweyl.

¹⁵Mes ny wrug vy devnydh a dravyth a'n gwiryow ma, na ny skrifis vy rag gwaynya traow a'n par na. Merwel a vynnsen kyns es dell gemmerro nebonan dhiworthiv ow skila dhe vostya!

¹⁶Rag mar pregowthav an aweyl, ny'm beus skila dhe vostya, rag dever yw gorrys warnav: go-vy mar ny bregowthav an aweyl!

¹⁷Rag mar kwrav hemma a'm bodh ow honan, gober a'm beus; mes mara'n gwrav a'm anvodh, charj re beu res dhymm.

¹⁸Pyth, ytho, yw ow gober? Hemma: ha my ow pregoth, my a yll gul dhe'n aweyl bos heb kost vyth, ha my heb gul devnydh kowal a'm gwir y'n aweyl.

¹⁹Rag kynth ov kwit a dus oll, my a omwrug keth dhe bubonan, may hwaynnyen tus voy.

²⁰Dhe'n Yedhewon my eth ha bos avel Yedhow, may hwaynnyen Yedhewon; dhe'n re yn-dann an lagha, my eth ha bos avel onan yn-dann lagha — kyn nag esov evy yn-dann an lagha — may hwaynnyen an re yn-dann an lagha.

²¹Dhe'n re a-ves dhe'n lagha my eth ha bos avel onan a-ves dhe'n lagha — kyn nag esov evy a-ves dhe lagha Duw, mes yn-dann lagha Krist — may hwaynnyen an re a-ves dhe'n lagha.

²²Dhe'n re wann my eth ha bos gwann, may hwaynnyen an re wann. My res eth ha bos pup-tra dhe dus oll may salwen awos eghenn rann anedha.

²³My a wra pup-tra a-barth an aweyl may kevrenniv y vennathow.

²⁴A ny wodhowgh hwi bos an resoryon oll yn resegva ow kesstrivya, mes ny dhendil an gober marnas onan? Y'n for' ma gwrewgh ma'n kyffowgh.

²⁵Pub striver y'n gwariow a omrewl yn traow oll. I a'n gwra rag kavoes kurun a wedher, mes ni rag kavoes onan na wedher nevra.

²⁶Ytho, ny resav heb towl, ny voksusav avel onan ow kweskel ayr;

²⁷mes my a gronk ow horf ha'y wul gostydh, ma na viv evy, wosa pregoth dhe re erell, gelwys anwiw.