Read Kernewek 2 Korinthianys 1 Bible Online

2 Korinthianys 1 - Kernewek bible

2 Korinthianys 1

¹Powl, abostol Krist Yesu dre vodh Duw, ha Timothi agan broder, Dhe eglos Duw usi yn Korinth, gans oll an syns dres Aghaia oll:

²Gras dhywgh ha kres dhiworth Duw agan Tas ha'n Arloedh Yesu Krist.

³Bennigys re bo Duw ha Tas agan Arloedh Yesu Krist, Tas a druedhow ha Duw a gonfort oll,

⁴neb a'gan konfort yn oll agan galar, may hyllyn ni konfortya an re usi yn pub galar, der an konfort mayth on ni agan honan konfortys gans Duw.

⁵Rag kepar dell balsha godhevyans Krist genen ni, yndella dre Grist agan konfort ynwedh a balsha.

⁶Lemmyn mar perthyn ni galarow, a-barth agas konfort ha'gas selwyans yth yw; po mars on ni konfortys, a-barth agas konfort yth yw, hag a ober pan berthewgh hwi an keth galarow hag a wodhevyn ni ynwedh.

⁷Ha fyrv yw agan govenek ragowgh, a-ban wodhon ni hemma: par dell owgh hwi kevrennoryon a'n galarow, yndella ynwedh hwi a gevrenn a'n konfort.

⁸Rag ny vynnyn hwi dhe vos heb godhvos, breder, a-dro dh'agan galar pan esen ni yn Asia; beghys dres eghenn en ni, dres nerth, mayth esa dhyn desper a vewnans y honan;

⁹yn hwir, ni a omglewsyn warnan breus an mernans, ma na fytthyen ynnon agan honan, mes yn Duw neb a dhrehav an re varow.

¹⁰Ev re'gan delivras dhiworth mernans mar vras, hag ev a wra agan delivra; warnodho ni re worras agan govenek ev dh'agan delivra arta,

¹¹ha hwi ynwedh orth agan gweres dre bysadow ragon, may hwodhvo lies den gras a-barth dhyn a'n ro grassyes res dhyn dre bysadow lies den.

¹²Lemmyn, hemm yw agan bost, dustuni agan kowses, ni dhe omdhegi y'n bys yn sempledh[1] ha gwiryonses Duw, heb skentoleth an kig mes dre ras Duw, ha dres oll orthowgh hwi.

¹³Rag ny skrifyn dhywgh travyth a-der an pyth a redyowgh ha konvedhes ynwedh, ha govenek a'm beus hwi dhe gonvedhes yn tien,

¹⁴dell y'gan konvedhsowgh yn rann seulabrys, rag yn dydh agan Arloedh Yesu, agas bost hwi on ni, kepar dell owgh hwi agan bost ni.

¹⁵A-ban en vy sur a hemma, ervirys en dhe vos dhywgh wostalleth, ma'gas be favour diwweyth;

¹⁶my a vynnas dos dhywgh, ena tremena dhe Masedonia, ha dhiworth Masedonia dehweles dhywgh ha bos dannvenys yn-rag genowgh dhe Yudi.

¹⁷Rakhenna, pan vynnis gul hemma, en vy hedro? Pan ervirav traow, a oberav vy war-lergh an kig, may leverriv yn kettermyn ‘Ya, ya’ ha ‘Na, na’?

¹⁸Mes, dell yw Duw lel, nyns yw agan ger dhywgh ‘Ya ha Na.’

¹⁹Rag Mab Duw, Krist Yesu, neb a veu pregewthys genen yn aga mysk, genev vy, ha gans Silvanus ha Timothi, nyns o ev ‘Ya ha Na’, mes ynno ev pup-prys yth yw ‘Ya.’

²⁰Rag ynno ev pub ambos Duw yw ‘Ya’; rakhenna, dredho ev yth yw ni dhe leverel ‘Amen’ dhe wolewder Duw.

²¹Mes Duw yth yw neb a'gan gwra fyrv genowgh yn Krist, ha neb re'gan untyas,

²²neb re'gan selyas ha ri dhyn mewgh an Spyrys yn agan kolonnow.

²³Lemmyn my a elow war Duw yn test war ow enev: rag agas sparya yth o na dhehwelis dhe Korinth,

²⁴Nyns yw ni dhe routya agas fydh, mes kesoberoryon on ni genowgh rag agas joy: rag y'n fydh y sevowgh fyrv.