Read Kernewek 2 Korinthianys 12 Bible Online

2 Korinthianys 12 - Kernewek bible

2 Korinthianys 12

¹Y telledh my dhe vostya; nyns yw dhe les, byttegyns my a wra dos dhe welesigethow ha diskwedhyansow a'n Arloedh.

²My a aswonn den yn Krist neb, nans yw peswardhek blydhen, a veu kemmerys yn-bann dhe'n tressa nev — mars esa y'n korf ny wonn, po mes a'n korf ny wonn, Duw a woer, —

³ha my a woer an den ma — mars esa y'n korf po a-ves dhe'n korf ny wonn, Duw a woer, —

⁴dhe vos kemmerys yn-bann yn paradhis, ha klewes lavarow[7] na yll denvyth aga leverel.

⁵A-barth den a'n par na my a wra bostya, mes a-barth dhymm ow honan ny wrav bostya, marnas y'm gwannderyow.

⁶Mes mar mynnav bostya, ny vydhav foll, rag kewsel an gwiryonedh a wrav; mes my a omwith, ma na dyppo denvyth gwell ahanav ages an pyth a wel ev ynnov po klewes ahanav,

⁷ha dre gnas fest dibarow an diskwedhyansow. Rakhenna, ma na dheffen ha bos re woethus, y feu res dhymm dreynenn y'n kig, el Satnas, ma'm kronkya ma na ven re woethus.

⁸A-dro dhe hemma, teyrgweyth y pysis war an Arloedh, rag mayth ella dhiworthiv.

⁹Mes ev a leveris dhymm: ‘Ow gras yw lowr ragos; rag yn gwannder yth yw ow nerth[8] gwrys perfydh.’ Ytho, fest yn lowen y hwrav vy bostya y'm gwannder, may trikko warnav nerth Krist.

¹⁰Rakhenna pes da ov vy, yn gwannder, yn despityansow, yn edhommow, yn helghyans ha kaletteryow rag Krist; rag gwann pan ov vy, ena galloesek ov.

¹¹Deuvev ha bos foll; hwi re'm konstrynas. Y telledh ow bos kommendys genowgh hwi, rag ny fyll dhymm travyth a'n abesteli worughel, kyn na viv evy travyth.

¹²Yn hwir, arwoedhyow an abostol a veu oberys yn agas mysk gans perthyans meur, der arwoedhyow ha dre varthusyon ha der oberow galloesek.

¹³Rag yn py maner yth ewgh hwi a le bri ages an eglosyow erell, marnas nag en vy ow honan begh warnowgh? Gevewgh dhymm an dhrokoleth ma!

¹⁴Otta, parys ov vy dhe dhos dhywgh an tressa gweyth, ha ny vydhav vy begh warnowgh; rag ny hwilav agas pythow, mes hwi. Rag ny dhegoedh dhe'n fleghes kuntell tresor a-barth aga herens, mes an gerens a-barth aga fleghes.

¹⁵Ytho, fest yn lowen y hwrav vy spena ha bos spenys a-barth agas enevow. Mara'gas karav dhe voy, a vydhav vy kerys dhe le?

¹⁶Pur ewn yw, ytho, na veuv vy begh warnowgh; mes, ha my ow pos sotel, gans gil my a'gas dynyas.

¹⁷A wrug vy kavoes prow dhiworthowgh dre nebonan a'n re a dhannvenis dhywgh?

¹⁸My a bysis Titus a vos, ha my a dhannvonas ganso an broder. A wrug Titus kavoes prow dhiworthowgh? A ny gerdhsyn ni y'n keth spyrys? hag y'n keth olow?

¹⁹Seulabrys y tybowgh ni dhe omaskusya dhywgh. A-rag Duw ni a gews yn Krist; mes pup-tra, karadowyon, yw a-barth agas drehevyans.

²⁰Own a'm beus a gavoes, pan dhov, nag owgh hwi par dell vynnav vy, hag ow bos vy kevys genowgh par dell na vynnowgh hwi. Own a'm beus a strivyans, avi, sorr, kedrynnansow, sklanderyow, drokhwystrennow, goeth, derays;

²¹own a'm beus, pan dhov arta, ow Duw dhe'm uvelhe a-ragowgh, ha my dhe alari a-dro dhe lies a'n re neb re beghas kyns, heb kavoes edrek a'n plosedhes, nag a fornikashyon na drokhwans re wrussons.