Read Kernewek 2 Korinthianys 13 Bible Online

2 Korinthianys 13 - Kernewek bible

2 Korinthianys 13

¹Homm yw an tressa gweyth may tov dhywgh; ‘Res yw pub mater dhe vos skoedhys dre anow dew po tri dustunier.’

²My a leveris dhe'n re neb re beghsa kyns ha dhe oll an re erell, ha lemmyn y lavarav, ha my dhe-ves ahanowgh, dell wrug pan esen vy yn agas mysk an nessa gweyth: mar tov arta, ny sparyav,

³a-ban hwilowgh hwi prov a Grist ow kewsel ynnov. Nyns yw ev gwann genowgh, mes galloesek yw yn agas mysk.

⁴Rag krowsys veu dre wannder,[9] mes ev a vew dre nerth Duw. Yn tevri, gwann on ni ynno ev, mes ragowgh hwi ni a wra bewa ganso dre nerth Duw.

⁵Omhwithrewgh mars esowgh hwi y'n fydh, prevewgh agas honan; a ny wodhowgh hwi bos Yesu Krist ynnowgh — marnas hwi a fyll an prov?

⁶Govenek a'm beus hwi dhe wodhvos na fyllyn ni an prov.

⁷Lemmyn ni a bys Duw na wryllowgh drog vydh; nyns yw henna may fo gwelys agan bos siwen y'n prov, mes may hwryllowgh hwi an pyth yw da, kyn havallo ni dhe fyllel.

⁸Rag ny yllyn ni gul travyth erbynn an gwiryonedh, saw unnsel a-barth an gwiryonedh.

⁹Rag ni a lowenha pan on ni gwann, ha hwi krev; keffrys ni a bys hemma: agas keweras.

¹⁰Rakhenna my a skrif an traow ma, ha my dhe-ves ahanowgh, ma na dhyghtiv yn asper herwydh an awtorita a veu res dhymm gans an Arloedh rag drehevyans, a-der rag diswrians.

¹¹Gordhiwedh, breder, lowenhewgh; gwrewgh agas honan perfydh, kennerthewgh an eyl y gila, bedhewgh unnverhes, bedhewgh yn kres; ha'n Duw a gerensa hag a gres a vydh genowgh.

¹²Salusewgh an eyl y gila gans bay sans.

¹³An syns oll a'gas salus. Gras agan Arloedh Yesu Krist ha kerensa Duw ha kowethyans an Spyrys Sans re bo genowgh hwi oll.[10]