Read Kernewek 2 Korinthianys 2 Bible Online

2 Korinthianys 2 - Kernewek bible

2 Korinthianys 2

¹Ytho, my a erviras hemma: na dhen vy dhywgh arta yn keudh.

²Rag mara'gas keudhav, piw eus neb a'm heudhha, marnas ev yw keudhys genev vy?

³My a skrifas poran kepar dell wrug, ma na'm be keudh, pan dheffen vy, dhiworth an re may tegoedh dhedha ow heudhhe, rag yma fydhyans dhymm ynnowgh, ow joy dhe vos agas joy hwi oll.

⁴My a skrifas dhywgh a alar meur ha fienasow kolonn ha gans meur a dhagrow; ny wrug vy henna may fewgh hwi keudhys, mes mayth aswonnewgh an gerensa pur vras hag a'm beus ragowgh.

⁵Mes, mar keudhis nebonan, ny'm keudhis evy, mes yn rann (ny vynnav meurhe an dra) ev re'gas keudhis hwi oll.

⁶An kessydhyans ma gans an rann vrassa a'n dus yw lowr rag den a'n par na;

⁷ytho lemmyn, yn le henna y tegoedh dhywgh gava dhodho ha'y gonfortya, ma na ve den a'n par na fethys dre alar re vras;

⁸rakhenna my a'gas pys a afia agas kerensa dhodho;

⁹rag hemm yw an acheson may skrifis vy: rag previ agas gnas, ha godhvos mars owgh hwi gostydh yn pup-tra.

¹⁰Lemmyn, dhe neb a evowgh neppyth, my ynwedh a'n gwra; rag mar kwrugavy gava neppyth, my ynwedh re'n gavas ragowgh hwi yn golok Krist,

¹¹ma na wrella Satnas agan treylya dh'y les y honan; rag nyns on ni heb godhvos a-dro dh'y dowlow.

¹²Pan dheuth vy dhe Troas rag aweyl Krist, daras a veu igerys dhymm gans an Arloedh;

¹³mes ny'm beu powes a'm spyrys pan na gevis Titus ow broder, ytho my a leveris farwell dhedha ha mos yn-rag dhe Masedonia.

¹⁴Mes dhe Dhuw re bo grasow, neb a'gan hembronk pup-prys yn trygh[2] yn Krist, ow lesa dredhon yn pub le odour an godhvos anodho;

¹⁵drefenn agan bos odour hweg Krist dhe Dhuw yn mysk an re ow pos selwys hag yn mysk an re usi ow mos dhe goll,

¹⁶dhe'n re ma odour a vernans dhe'n mernans, ha dhe'n re na odour a vewnans dhe vewnans. Piw yw da lowr rag an traow ma?

¹⁷Rag nyns on ni gwikoryon a er Duw, kepar ha lies; mes dell ve a lenduri, yn hwir dell ve dhiworth Duw, ha dherag Duw, ni a gews yn Krist.