Read Kernewek 2 Korinthianys 4 Bible Online

2 Korinthianys 4 - Kernewek bible

2 Korinthianys 4

¹Rakhenna, a-ban eus dhyn an menystrans ma, kepar dell gevsyn tregeredh, ny dheun ha bos digolonnek,

²mes ni re hepkorras traow kevrinek ha divlas; ny wren ni gul devnydh a felder, na gul kamm ger Duw, mes dre dhiskwedhyans a'n gwiryonedh ni a omgommend dhe gowses pub huni dherag Duw.

³Mes yn hwir mars yw kudhys agan aweyl, kudhys yw rag an re usi ow mos dhe goll.

⁴An duw a'n oes ma re dhallas brysyow an dhiskryjygyon ma na welsons i golow aweyl golewder Krist, neb yw imaj Duw.

⁵Rag nyns yw pregoth agan honan a wren ni, mes Krist Yesu avel Arloedh, ha ni agan honan avel agas kethyon, a-barth Yesu.

⁶Rag Duw, neb a leveris ‘Yn-mes a dewlder y hwra golow splanna’, re splannas yn agan kolonnow dhe ri golow godhvos golewder Duw yn fas Krist.

⁷Ha ni a'gan beus an tresor ma yn lestri a bri, rag may fo an nerth dres eghenn dhiworth Duw, a-der ni;

⁸yn-dann alar yn pub maner, nyns on ni yn ahwer; penndegys, nyns eson ni yn desper;

⁹arweskys, nyns on ni forsakys; gweskys dhe'n leur, nyns on ni distruys;

¹⁰prest ow toen a-dro yn agan korf mernans Krist, may fo diskwedhys ynwedh bewnans Yesu yn agan korf.

¹¹Rag, ha ni yn few, prest yth on ni delivrys dhe'n mernans a-barth Yesu, may fo diskwedhys ynwedh bewnans Yesu yn agan kig marwel.

¹²Ytho, ankow a ober ynnon ni, mes bewnans a ober ynnowgh hwi.

¹³Ha kepar ha pan usi dhyn an keth spyrys a fydh, herwydh an pyth yw skrifys, ‘My a grysis, rakhenna my a gewsis’, ni ynwedh a grys ha rakhenna ni a gews,

¹⁴ow kodhvos hemma: ev neb a dhrehevis an Arloedh Yesu a wra agan drehevel ni ynwedh gans Yesu, hag ev a wra agan dri a-ragdho, genowgh hwi.

¹⁵Rag pup-tra yw a-barth dhywgh hwi, may hwrello an gras, res yn hel dhe voy ha dhe voy a dus, gul grasyans dhe balshe, dhe wormola Duw.

¹⁶Rakhenna ny dheun ha bos digolonnek; kyn hwannha agan gnas usi a-ves, hwath yma agan gnas usi a-ji nowydhhes pub dydh oll.

¹⁷Rag yma agan galar ydhil na dhur marnas dres pols ow kwaynya ragon ni poes a wolewder a dhur bynitha, dres musur oll,

¹⁸drefenn na wren ni vri a'n pyth yw gwelys, mes a'n pyth nag yw gwelys; rag an pyth yw gwelys ny dhur mann, mes an pyth nag yw gwelys a dhur bynitha.