Read Kernewek 2 Korinthianys 6 Bible Online

2 Korinthianys 6 - Kernewek bible

2 Korinthianys 6

¹Ha ni ow kesoberi, ni a'gas pys ma na dhegemmerrowgh gras Duw yn euver;

²rag ev a lever, ‘Yn termyn plegadow my a'th klewas hag yn dydh a selwyans my a'th weresas.’ Otta, lemmyn yth yw termyn fest plegadow, otta, lemmyn yth yw dydh a selwyans;

³nyns eson ni ow ri skila vyth a drebuchya, na vo kablys an menystrans

⁴mes yn pub fordh ni a omgommend avel menystrys Duw, yn meur a wodhevyans, yn galar, yn kaletteryow, yn ahwer,

⁵yn kastigow, yn prisonyow, yn derays, yn lavuryansow, yn nosow digosk, yn nown,

⁶yn glander, yn godhvos, yn perthyans, yn kuvder, yn sansoleth a spyrys, yn kerensa wiryon,

⁷yn gwiryonses a gows, yn nerth Duw, dre arvow a ewnder y'n dhorn dhyghow hag y'n dhorn gledh,

⁸dre wolewder ha disenor, dre gabel ha ger-da; akontys bos avel toelloryon, mes tus wiryon,

⁹avel anaswonnys, mes aswonnys yn ta, avel tus ow merwel mes otta, ni a vew; avel tus kessydhys mes nyns on ni ledhys;

¹⁰keudhys, hwath prest ow lowenhe; boghosek, hwath ow kul dhe lies bos rych; heb travyth, hwath ni a bew pup-tra.

¹¹Agan ganow re beu igerys yn rydh dhywgh, tus Korinth, ha ledanhes yw agan kolonnow;

¹²nyns owgh hwi stroethys genen ni, mes stroethys owgh hwi gans agas kerensa agas honan;

¹³yn attal — my a gews kepar ha dhe fleghes — ledanhewgh agas kolonnow ynwedh.

¹⁴Na vedhewgh kamm-gesyewys gans diskryjygyon; rag py kevrenn eus dhe ewnder gans anlaghedh, po py kowethyans eus dhe wolow gans tewlder?

¹⁵Ha py kessenyans eus dhe Grist gans Beliar, po py rann eus dhe gryjyk gans diskryjyk?

¹⁶Ha py akord eus dhe dempel Duw gans idolys? Rag ni yw tempel an Duw bew, dell leveris Duw, ‘My a wra triga yn aga mysk, ha my a wra kerdhes yn aga mysk; aga Duw vydhav vy, hag ow fobel vydhons i.

¹⁷Rakhenna dewgh yn-mes a-dhiworta, ha bedhewgh diberthys, yn-medh an Arloedh, ha na dochyewgh travyth avlan, ha my a wra agas degemmeres,

¹⁸ha tas vydhav dhywgh ha mebyon ha myrghes vydhowgh hwi dhymm, yn-medh an Arloedh Ollgalloesek.’