Read Kernewek 2 Korinthianys 8 Bible Online

2 Korinthianys 8 - Kernewek bible

2 Korinthianys 8

¹Lemmyn ni a vynn orthowgh godhvos, breder, a-dro dhe ras Duw re beu res dhe'n eglosyow a Masedonia.

²Yn prov sevurra a alar, leunder aga joy ha'ga boghosogneth dhown a balshas yn rychedh a'ga sempledh hel,

³dell dhustuniav, herwydh aga fygans ha dres aga fygans, a'ga bodh aga honan

⁴ow kovynn yn ter an gras dhe gevrenna y'n menystrans dhe'n syns;

⁵ha nyns o hemma dell waytsen, mes yn kynsa yth omrosons dhe'n Arloedh, hag ena dhyn ni, dre vodh Duw.

⁶Ytho ni a bysis Titus, a-ban dhallathsa seulabrys, a gowlwul an ober ma a ras yn agas mysk.

⁷Mes, yn pup-tra dell balshowgh, yn fydh hag yn kows hag yn godhvos hag yn pub diwysygneth hag yn agas kerensa dhyn ni, gwaytyewgh may palshahowgh y'n gras ma ynwedh.

⁸Ny lavarav hemma avel arghadow, mes yth esov vy ow previ gwiryonses agas kerensa dre dhiwysygneth re erell.

⁹Rag hwi a aswonn gras agan Arloedh Yesu Krist, y vos ev gyllys boghosek a-barth dhywgh, kynth o rych, mayth ewgh hwi ha bos rych der y voghosogneth.

¹⁰Hag y'n mater ma kusul a rov vy: rag y telledh hemma dhywgh, neb a dhallathas y wul mes ynwedh mynnes y wul, nans yw blydhen;

¹¹lemmyn ynwedh kowlwul an ober, ena kepar dell yw freth agas mynnas, yn kettella bedhes kowlwrys herwydh agas pygans.

¹²Rag mars usi an frethter ena seulabrys, kemmeradow yw herwydh pygans den, a-der herwydh an pyth nag eus ganso.

¹³Ny vynnav vy may fo difresyans dhe re erell ha hwi yn esow,[5] mes may fo ranna ewn

¹⁴y'n tor' ma, agas palster hwi ow provia rag aga esow i, ha may provio aga lanwes i rag agas esow hwi, yndella may fo ranna ewn;

¹⁵dell yw skrifys, ‘Neb a'n jeva meur ny'n jeva re, ha neb a'n jeva boghes ny'n jeva fowt.’

¹⁶Lemmyn grasow re bo dhe Dhuw, neb re worras yn kolonn Titus an keth frethter a-barth dhywgh hwi,

¹⁷drefenn ev dhe dhegemmeres agan pysadow, hag ow pos hwath diwysykka ev eth yn-rag dhywgh hwi a'y vodh y honan.

¹⁸Ha ni a dhannvonas ganso an broder neb yw gormelys yn mysk an eglosyow oll a'y wonis y'n aweyl,

¹⁹ha moy es henna, dewisys veu gans an eglosyow dhe vyajya genen ni ha ni ow menystra an gras ma dhe ri gordhyans dhe'n Arloedh y honan ha dhe dhiskwedhes agan frethter.

²⁰Ni a vynn omwitha na'gan kapplo a-dro dhe'n ro hel ma hag yw menystrys genen ni;

²¹rag ervirys on ni dhe wul an pyth yw ewn dherag an Arloedh, keffrys dherag tus.

²²Ha ni a dhannvonas gansa agan broder neb a brevsyn yn fenowgh bos diwysyk yn lies mater, ha neb yw lemmyn hwath diwysykka drefenn y fydhyans meur ynnowgh.

²³A-dro dhe Titus, ev yw ow howethyas ha'm kesoberer ragowgh; a-dro dh'agan breder, i yw abesteli eglosyow, golewder Krist.

²⁴Rakhenna, yn apert dherag an eglosyow, diskwedhewgh prov a'gas kerensa keffrys a'gan bostyans dhedha a-dro dhywgh.