Read Kernewek Galatianys 1 Bible Online

Galatianys 1 - Kernewek bible

Galatianys 1

¹Powl, abostol na dhiworth tus, na der unn den, mes dre Yesu Krist ha Duw an Tas neb a'n drehevis dhiworth an re varow,

²hag oll an vreder usi genev, Dhe eglosyow Galatia:

³Gras dhywgh ha kres dhiworth Duw agan Tas ha'n Arloedh Yesu Krist,

⁴a omros y honan rag agan peghosow rag ma'gan deliffra mes a'n bys, drog dell yw y'n eur ma, herwydh bodh agan Duw ha Tas,

⁵ha dhodho re bo gordhyans bys vykken ha bynnari. Amen.

⁶Marth a'm beus drefenn hwi dhe gildenna mar uskis a-dhiworto ev neb a'gas gelwis yn gras Krist war-tu ha ken aweyl,

⁷— mes nyns eus aweyl arall, marnas yma tus neb a wra agas ankombra hag ow mynnes dihevelebi aweyl Krist;

⁸mes mar pydh pregewthys dhywgh genen ni po gans el dhiworth nev neb aweyl kontrari dhe'n pyth a bregewthsyn ni, re bo milligys.

⁹Kepar dell leversyn kyns, arta y'n eur ma y lavarav, mar pregoth neb den dhywgh ow kontradia an pyth a dhegemmersowgh, re bo milligys.

¹⁰Esov vy ytho owth assaya y'n eur ma perswadya tus po Duw? Po a hwilav plesya tus? Mar pen vy hwath ow plesya tus ny vien kethwas Krist.

¹¹Rag my a vynn hwi dhe wodhvos, an aweyl pregewthys genev — nyns yw hi war-lergh mab-den

¹²rag ny's degemmeris dhiworth denvyth na ny's dyskis marnas dre dhiskwedhyans Yesu Krist.

¹³Rag re glewsowgh a'm fara seulabrys yn yedhowieth pan helghyn vy eglos Duw dres eghenn ha'y dhistrui,

¹⁴hag avonsya pella yn yedhowieth ages lies kevoes genev a'm kenedhel vy ha bos tynn dres eghenn rag hengovyow ow hendasow.

¹⁵Byttegyns pan vynnas Duw, neb a'm dibarthas a-dhia vrys ow mamm ha'm gelwel der y ras,

¹⁶diskwedhes y Vab ynnov, ma'n pregowtthen yn mysk an Jentilys, a-dhesempis ny wrug vy omgusulya gans kig na goes,

¹⁷na ny wrug vy yskynna bys yn Yerusalem dhe'n re o abesteli kyns es dell veuv vy abostol, mes yth yth dhe-ves dhe Arabia ha dehweles arta dhe Damaskus.

¹⁸Ena wosa teyr blydhen yth yskynnis bys yn Yerusalem dhe omgusulya gans Kefas, ha triga ganso pymthek dydh,

¹⁹mes ny welis abesteli erell vyth marnas Jamys broder an Arloedh.

²⁰Y'n taklow a skrifav dhywgh, otta, Duw yn test, nyns ov vy gowek.

²¹Ena my a dheuth dhe ranndiryow Syria ha Silisia.

²²Mes nyns o ow fas aswonnys dhe eglosyow Yudi esa yn Krist;

²³nyns esens ow klewes, marnas ‘Ev neb a'gan helghi seulabrys yma lemmyn ow pregoth an fydh a wre hy distrui seulabrys’;

²⁴hag i a wordhyas Duw ynnov.