Read Kernewek Galatianys 2 Bible Online

Galatianys 2 - Kernewek bible

Galatianys 2

¹Ena wosa peswardhek blydhen yth yskynnis arta dhe Yerusalem gans Barnabas, ow kemmeres Titus genev ynwedh;

²my a yskynnas dre dhiskwedhyans ha gorra a-dheragdha an aweyl a bregowthav yn mysk an Jentilys, yn priva dhe dus a vri, ma na vien ow poenya po na wrussen poenya war neb kor yn euver.

³Byttegyns Titus devri, esa genev, hag ev Grek, ny veu ev konstrynys na hwath a vos trodreghys;

⁴mes rag bos breder fekyl dres a-ji yn-dann gel, skolkyoryon a slynkyas a-ji rag aspia orth agan rydhses a'gan beus yn Krist Yesu, ma'gan drollens bys yn kethneth;

⁵ny omblegsyn ni toch vyth dhedha yn gostytter, may halla gwiryonedh an aweyl pesya ragowgh.

⁶Mes a-dhiworth an re a dybys bos neppyth, — py sort pynag yns ny vern dhymm; nyns usi Duw ow favera tremmynn denvyth — an dus enorys na, ny geworrsons travyth dhymmo vy,

⁷mes y'n kontrari parth hag i ow konvedhes bos an aweyl a antrodreghyans kemmynnys dhymm kepar dell veu an aweyl a drodreghyans dhe Peder,

⁸rag neb a wrug y ober yn Peder rag abostolieth an trodreghyans a wrug y ober ynwedh ynnov vy rag an Jentilys,

⁹hag ow konvedhes an gras re beu res dhymm, Jamys ha Kefas ha Yowann, hag i an kolovenyow dell dybys, a ros an dhorn dhyghow a gowethyans dhymm ha dhe Barnabas, mayth ellen ni dhe'n Jentilys, hag i aga honan dhe'n dus trodreghys;

¹⁰marnas i a vynnas orthyn perthi kov a'n voghosogyon, an keth tra may feu hwans dhymm dh'y wul.

¹¹Mes pan dheuth Kefas dhe Antiogh, my a sevis er y bynn orth y anow, rag y vos dhe vlamya.

¹²Rag kyns neb tus dhe dhos dhiworth Jamys, ev a dhybri gans an Jentilys; mes pan dheuthons i, ev a omdennas ha diberth ow perthi own a dus an trodreghyans.

¹³Ha'n Yedhewon erell a junyas ganso y'n falsuri ma, may feu Barnabas ynwedh ledys yn stray gansa der aga falsuri.

¹⁴Mes pan gonvedhis vy na gerdhens i yn ewnhynsek herwydh gwiryonedh an aweyl, my a leveris dhe Kefas a-dheragdha yn kettep penn, ‘Mar pywydh jy, ha ty Yedhow, yn maner an Jentilys ha ny vewydh yn maner an Yedhewon prag y konstrynydh jy an Jentilys a vewa kepar dell vens i Yedhewon?’

¹⁵Ni yw Yedhewon dre enesigeth ha nyns on ni peghadoryon a'n Jentilys,

¹⁶ow konvedhes nag yw denvyth ewnhes der oberow a'n lagha mes dre fydh yn Krist Yesu, ha nyni a grysis yn Krist Yesu, may fen ni justifiys dre fydh yn Krist ha a-der dre oberow a'n lagha; rag ny vydh kig vytholl justifiys der oberow a'n lagha.

¹⁷Mes mars on ni, neb a hwila bos justifiys yn Krist, agan honan kevys dhe vos peghadoryon, yw Krist ytho menyster a begh? Bynner re bo!

¹⁸Rag mar tastrehavav an taklow a dhistruis vy, my a dhiskwa my ow honan dhe vos treuspasser.

¹⁹Rag der an lagha my a verwis dhe'n lagha, may fewen vy dhe Dhuw. Krowsys veuv gans Krist;

²⁰bew ov, mes na fella my ow honan, mes Krist a vew ynnov; an bewnans a'm beus y'n eur ma y'n kig my a vew yn fydh Mab Duw neb a'm karas hag omri y honan ragov.

²¹Ny wrav vy dilea gras Duw; rag mar pe ewnder der an lagha ytho Krist a verwis yn euver.