Read Kernewek Galatianys 4 Bible Online

Galatianys 4 - Kernewek bible

Galatianys 4

¹My a lever, nag yw an her, hag ev hwath flogh, dihaval dhe gethwas, kynth yw ev mester a bup-tra,

²mes yma ev yn-dann withysi ha governours bys pan dheffo an termyn settys gans an tas.

³Yndella ni ynwedh, pan en ni fleghes, o synsys yn kethneth gans elvennow an bys ma;

⁴mes pan dheuth keweras an oes, Duw a dhellos y Vab, genys a venyn, genys yn-dann lagha,

⁵rag dasprena an re esa yn-dann lagha, may fen ni degemmerys avel mebyon.

⁶Drefenn agas bos mebyon, Duw a dhellos Spyrys y Vab bys yn agan kolonn, ow kria ‘Abba, a Das.’

⁷Ytho nyns osta keth na fella mes mab; ha mars osta mab ytho ynwedh her dre Dhuw.[6]

⁸Byttegyns y'n eur na pan na aswonnsowgh hwi Duw, yth ewgh kethyon dhe'n re nag yw duwow dre natur;

⁹mes y'n eur ma owth aswonn Duw, mes moy yn tevri aswonnys gans Duw, fatell esowgh ow treylya arta war-tu ha'n elvennow gwann hag ydhil, may fynnowgh bos arta kethyon dhedha avel kyns?

¹⁰Dy'goelyow a solempnyowgh hwi dour, ha misyow ha termynyow ha blydhynyow.

¹¹Yma own dhymm ragowgh, my dhe lavurya war neb kor yn euver ragowgh.

¹²Dewgh ha bos kepar dell ov vy, my a'gas pys, a vreder, ha my a'n keth par ha hwi. Ny wrussowgh hwi kamm vyth dhymm;

¹³mes hwi a woer, dre gleves a'n kig y pregewthis dhywgh y'n dalleth,

¹⁴hag yn despit dhe'n prevyans a veu dhywgh y'm kig, ny wrussowgh hwi dispresya na fia, mes hwi a'm degemmeras kepar hag el a Dhuw, kepar ha Krist Yesu.

¹⁵Ple'ma agas bennesikter ytho? Rag desta a wrav, y hwrussiwgh terri mes agas dewlagas, mar kallewgh, ha'ga ri dhymm.

¹⁶Ytho a dheuth vy ha bos agas eskar rag my dhe leverel an gwirder dhywgh?

¹⁷Diwysyk yns i ragowgh, drog aga bodh, ha mynnes orthowgh bos keys mes, rag may fowgh hwi diwysyk a-barth dhedha i.

¹⁸Da yw bos diwysyk pup-prys pan vo an acheson onan da, heb bos unnsel yndella pan esov vy yn agas mysk.

¹⁹Ow fleghesigow, mayth esov arta yn gloesow genesigeth ragowgh bys pan vo Krist formys ynnowgh,

²⁰my a vynna bos yn agas mysk y'n eur ma ha chanjya ow lev, rag dout a'm beus ahanowgh.

²¹Leverewgh dhymm, hwi a vynn bos yn-dann lagha, a ny glewowgh an lagha?

²²Rag skrifys yw bos dew vab dhe Abraham, an eyl a gethes ha'y gila a venyn rydh.

²³Mes mab an gethes a veu genys war-lergh an kig, ha'n mab a venyn rydh der ambos.

²⁴An re ma yw leverys avel allegori; rag an re ma yw dew gevambos, honna dhiworth menydh Sinay, ow tineythi rag kethneth, yw Hagar.

²⁵Hagar yw menydh Sinay yn Arabia hag a styr Yerusalem, kepar dell yw y'n eur ma, rag kethes yw hi keffrys ha'y fleghes.

²⁶Mes an Yerusalem usi a-vann yw frank, neb yw agan mamm.

²⁷Rag skrifys yw, ‘Lowenha, ty anvap, neb na dhineyth, tardh yn garmow a lowena, ty na lavur yn genesigeth, rag yma lies flogh dhe'n venyn forsakys, moy es hy ben neb a's teves gour.’

²⁸Hwi, a vreder, yw fleghes a'n ambos kepar hag Ysak.

²⁹Mes kepar dell wrug y'n eur na neb a veu genys war-lergh an kig helghya neb a veu genys war-lergh an Spyrys, yth or yndella hwath y'n eur ma.

³⁰Mes pandr'a lever an skryptor? Pellha an gethes ha'y mab, rag ny vydh mab an gethes her war-barth gans mab an venyn rydh.

³¹Rakhenna, a vreder, nyns on ni fleghes a'n gethes mes a'n venyn rydh.