Read Kernewek Efesianys 1 Bible Online

Efesianys 1 - Kernewek bible

Efesianys 1

¹Powl, abostol Krist Yesu dre volonjedh Duw, Dhe'n syns usi yn Efesus[1] yw lel yn Krist Yesu:

²Gras dhywgh hwi ha kres dhiworth Duw agan Tas ha'n Arloedh Yesu Krist.

³Bennigys re bo Duw ha Tas agan Arloedh Yesu Krist, neb re'gan bennigas gans pub bennath spyrysek y'n tylleryow nevek yn Krist,

⁴dell y'gan dewisas ynno kyns gwrians an bys, may fen ni sans ha divlam a-dheragdho yn kerensa,

⁵orth agan ragdhestna dhe vos degemmerys avel mebyon dhodho ev, dre Yesu Krist, orth bodh y vrys,

⁶dhe wormel splannder y ras a wrontyas dhyn y'n Karadow;

⁷yn neb y'gan beus daspren der y woes, gevyans peghosow, war-lergh rychys y ras

⁸a ros dhyn yn hel, yn oll furneth ha konvedhes,

⁹ow ri dhyn godhvos kevrin y volonjedh, war-lergh y vodh a dhispletyas ynno

¹⁰avel towl rag keweras an termynyow, dhe guntell pup-tra war-barth yn Krist, an taklow yn nev, ha'n re y'n nor, ynno ev;

¹¹ni ynwedh a veu dewisys, ragdhestnys war-lergh y borpos ev neb a gowlwra pup-tra orth bodh y vrys,

¹²may fewen ni rag gormel y splannder, ni neb o an kynsa a'n jevo govenek yn Krist;

¹³yn neb hwi ynwedh, ow klewes an ger a wiryonedh, aweyl agas selwyans, yn neb hwi ynwedh ow krysi, a veu selys gans an Spyrys Sans ambosys,

¹⁴neb yw ragdal agan eretons bys pan vo dasprenys an perghennogeth, dhe wormel y splannder.

¹⁵Rakhenna, my ynwedh, ow klewes a'gas fydh y'n Arloedh Yesu, ha'n gerensa war-tu ha'n syns oll,

¹⁶ny asav grassa ragowgh, orth agas kampoella y'm pysadow,

¹⁷may rollo an Duw a'gan Arloedh Yesu Krist, an Tas a wolewder, spyrys furneth ha diskwedhyans y'n aswonnvos anodho,

¹⁸golowys dewlagas agas kolonn, may hwodhvewgh pyth yw govenek y alow, pyth yw rychys splannder y eretons y'n syns,

¹⁹ha pyth yw an braster dres eghenn a'y alloes troha ni neb a grys war-lergh oberyans krevder y nerth

²⁰a wrug ev yn Krist, orth y dhrehevel a'n re varow, ha'y worra dhe esedha a-dhyghow dhodho y'n tylleryow nevek,

²¹pell a-ugh pub prynsipata ha potestas ha domynashyon ha pub hanow yw henwys, hag y'n oes ma hag y'n oesow a dheu;

²²hag ev re worras pup-tra yn-dann y dreys hag a'n ros dhe vos penn war bup-tra dhe'n eglos,

²³yw y gorf, an leunder anodho ev neb a lenow oll yn oll.