Read Kernewek Efesianys 2 Bible Online

Efesianys 2 - Kernewek bible

Efesianys 2

¹Ha hwi a veu marow yn agas drogoberow ha'gas peghosow

²may kerdhsowgh ynna war-lergh gis an bys ma, war-lergh penntern galloes an ayr, an spyrys a ober lemmyn yn mebyon diwostytter;

³hag yn aga mysk, ni oll ynwedh a wre omdhegi kyns yn yeunadow agan kig, ow kul hwansow an kig ha'n prederow, hag yth en ni dre natur fleghes sorr kepar ha'n re erell ynwedh.

⁴Mes Duw, rych yn tregeredh, drefenn y gerensa meur ma'gan karas,

⁵hwath pan en ni marow yn drogoberow, a wrug dhyn bewa war-barth gans Krist (hwi re beu selwys dre ras),

⁶hag a wrug dhyn dasserghi hag esedha ganso y'n tylleryow nevek yn Krist Yesu,

⁷may tiskwettha y'n oesow ow tos, rychys dres eghenn y ras yn kuvder troha ni yn Krist Yesu.

⁸Rag dre ras hwi re beu selwys dre fydh; ha nyns yw hemma ahanowgh hwi, ro Duw yw ev.

⁹Nyns yw a wriansow, ma na vostyo denvyth.

¹⁰Rag y wrians ev on ni, kreatys yn Krist Yesu dhe oberow da a ragbareusis Duw, may hyllyn ni kerdhes ynna.

¹¹Rakhenna, perthewgh kov agas bos Jentilys kyns y'n kig, gelwys ‘an Antrodreghyans’ gans an re yw gelwys ‘an Trodreghyans’, gwrys y'n kig gans dorn,

¹²agas bos y'n eur na heb Krist, estrenhes dhiworth kemmynieth Ysrael, hag estrenyon dhe gevambosow an dedhewadyow, heb govenek, ha heb Duw y'n bys.

¹³Mes lemmyn yn Krist Yesu hwi, neb a vedhewgh pell yn termyn eus passyes, eth ha bos ogas, dre woes Krist.

¹⁴Rag ev yw agan kres, neb a wrug an dhew onan, wosa terri paros an rannans, an kas yntredhon, der y gig,

¹⁵ow tiswul an lagha a arghadow ha rewlys, may hwrella a'n dhew unn den nowydh ynno ev, ow kul kres,

¹⁶ha may hwrella dhe'n dhew bos unnverhes yn unn korf dhe Dhuw der an grows, dredhi[2] ow ladha an eskarogeth.

¹⁷Hag ev a dheuth dhe bregoth kres dhywgh hwi neb o pell, ha kres dhe neb o ogas,

¹⁸rag bos fordh genen agan dew, dredho ev, der unn Spyrys, dhe'n Tas.

¹⁹Ytho nyns owgh hwi namoy estrenyon hag alyons, mes kesburjysi gans an syns, hag eseli teylu Duw,

²⁰drehevys war sel an abesteli ha'n brofoesi, Krist Yesu y honan ow pos an pennmen.

²¹Ynno ev oll an drehevyans junys war-barth, a dyv dhe vos tempel sans y'n Arloedh;

²²ynno ev hwi ynwedh yw drehevys war-barth dhe vos trigva Duw y'n Spyrys.