Read Kernewek Efesianys 4 Bible Online

Efesianys 4 - Kernewek bible

Efesianys 4

¹My ytho, prisner y'n Arloedh, a'gas pys a gerdhes gwiw dhe'n galow may fewgh hwi gelwys,

²gans pub uvelder ha klorder gans perthyans, ow kodhav an eyl y gila yn kerensa,

³hwansek dhe witha unnses an Spyrys y'n golmenn a gres.

⁴Yma unn korf hag unn Spyrys, kepar dell vewgh gelwys yn unn govenek a'gas galow;

⁵unn Arloedh, unn fydh, unn besydhyans,

⁶unn Duw ha Tas a bub den oll, neb usi a-ugh pub den oll, ha dre bub den oll hag yn pub den oll.[5]

⁷Dhe bubonan ahanan, gras a veu res war-lergh musur ro Krist.

⁸Ytho leverys veu, ‘Wosa yskynna yn ughelder, ev a hembronkas prisnoryon, hag a ros rohow dhe dus.’

⁹An lavar ‘yskynna’ — pyth yw hemma, mar nyns yw, ev dhe dhiyskynna[6] ynwedh dhe'n isella rannow a'n norvys?

¹⁰Neb a dhiyskynnas yw ynwedh neb a yskynnas pell a-ugh oll an nevow may lanwa pup-tra.

¹¹Hag ev a ros re dhe vos abesteli, re profoesi, re aweylers, re bugeledh ha dyskadoryon,

¹²rag darbari an syns dhe hwel menystrans, dhe dhrehevyans korf Krist,

¹³erna dhyffyn ni oll dhe unnses an fydh hag aswonnvos Mab Duw, yn gour perfydh, dhe'n musur a'n adhvetter a'n leunder a Grist,

¹⁴ma na ven namoy fleghes, tewlys gans mordonnow ha degys a-dro gans pub gwyns a dhyskas, dre sotelneth tus, yn sleyghneth bys y'n felder a doell.

¹⁵Mes ow kewsel an gwir yn kerensa, res yw dhyn tevi ynno ev yn pup-tra, neb yw an penn, Krist,

¹⁶dhiworth neb, an korf dien, junys ha synsys war-barth dre bub giowenn ow skoedhya war-lergh oberyans 'vas pub rann, a wra dhe'n korf tevi, rag y dhrehevyans yn kerensa.

¹⁷Hemma a lavarav ha dustunia y'n Arloedh, na wrellowgh kerdhes namoy kepar dell gerdh an Jentilys yn euveredh aga brys;

¹⁸tewlhes yn aga brys, alyons dhiworth bewnans Duw dre fowt skians eus ynna i rag kaletter aga holonnow

¹⁹heb omglewans vyth, i a omros dhe avlander, ow kul mostedhes a bub eghenn gans krefni.

²⁰Mes hwi ny dhys'sowgh Krist yndellma!

²¹— mara'n klewsowgh[7] yn tevri, ha bos dyskys ynno, par dell usi an gwiryonedh yn Yesu,

²²may hworrewgh mes ahanowgh an den koth, agas bewedh kyns, yw shyndys dre fals hwansow,

²³ha dhe vos nowydhhes yn spyrys agas brys,

²⁴ha dhe wiska an den nowydh yw gwrys war-lergh Duw yn ewnder ha sansoleth a dheu dhiworth an gwir.

²⁵Rakhenna, gorrewgh dhe-ves gowegneth, ha ‘kewsel pubonan an gwir gans agas hynsa’, rag agan bos eseli an eyl a'y gila.

²⁶‘Bedhewgh serrys ha na wrewgh pegha.’ Na wres an howl sedhi war agas sorr,

²⁷ha na rewgh tyller dhe'n jowl.

²⁸Neb a lader, na ladres namoy, mes gwres ev lavurya, owth oberi an dra dha gans y dhiwla y honan, may kaffo neppyth dhe ranna gans neb a'n jeffo edhomm.

²⁹Na dhes ger drog vyth yn-mes a'gas ganow, saw pypynag a vo da rag an drehevyans yw res, may rollo gras dhe neb a'n klewvo.

³⁰Ha na wrewgh grevya Spyrys Sans Duw, yn neb hwi a veu selys rag dydh daspren.

³¹Bedhes pub hwerowder ha sorr ha konnar ha garma serrys ha sklander gorrys mes ahanowgh, gans pub drog.

³²Ha bedhewgh kuv an eyl dh'y gila, truedhek, parys dhe ava an eyl dh'y gila kepar dell avas Duw yn Krist dhywgh hwi[8] ynwedh.