Read Kernewek Efesianys 5 Bible Online

Efesianys 5 - Kernewek bible

Efesianys 5

¹Ytho, gwrewgh Duw agas patron, kepar ha fleghes karadow,

²ha kerdhewgh yn kerensa, kepar dell wrug Krist agas kara hag omri y honan ragon ni yn offrynn ha sakrifis dhe Dhuw, sawer plegadow.

³Mes fornikashyon ha pub plosedhes po krefni, na vedhens henwys yn agas mysk, kepar dell dhelledh dhe syns.

⁴Na vedhes fara plos na kows gokki na ges, nag yw gwiw, mes grasyans yn aga le.

⁵Godhvydhewgh hemma: denvyth ow kul fornikashyon, na den plos, na den kraf, henn yw gordhyer idolys, ny'n jeves eretons yn gwlaskor Krist ha Duw.

⁶Na wres denvyth agas toella dre lavarow gwag; rag drefenn an taklow ma y teu sorr Duw war vebyon diwostytter.

⁷Ytho, na vedhewgh kevrennogyon gansa;

⁸rag kyns yth ewgh hwi tewlder, mes lemmyn golow y'n Arloedh. Kepar ha fleghes golow gwrewgh hwi kerdhes

⁹(rag yma frut an golow[9] yn oll dader hag ewnder ha gwirder),

¹⁰ow previ an pyth yw plegadow gans an Arloedh.

¹¹Ha na gemmerewgh rann gans gwriansow difrut an tewlder; gwell yw aga heredhi.

¹²Rag meth yw poran kewsel a'n taklow yw gwrys gansa yn-dann gel.

¹³Mes pup-tra diskudhys der an golow yw apert,

¹⁴rag pup-tra a veu diskwedhys yw golow. Rakhenna, leverys yw, ‘Sav, ty neb a gosk, ha sav yn-bann mes a'n re varow, ha Krist a re dhis golow.’

¹⁵Gwaytyewgh dour ytho fatell gerdhowgh[10], avel tus fur, a-der anfur,

¹⁶ow kul devnydh a'n termyn, rag bos an dydhyow drog.

¹⁷Rakhenna, na vedhewgh gokki, mes konvedhewgh pyth yw bolonjedh an Arloedh.

¹⁸Ha na vedhewgh medhow dre win, mayth eus fowt rewl, mes bedhewgh lenwys a'n Spyrys,

¹⁹ow kewsel an eyl orth y gila yn salmow ha hymnys ha kanow spyrysek, ow kana hag ow kul melodi yn agas kolonn dhe'n Arloedh;

²⁰prest ow krassa pup-tra yn hanow agan Arloedh Yesu Krist dhe Dhuw an Tas.

²¹Bedhewgh gostydh an eyl dh'y gila yn own Krist.

²²Gwragedh, bedhewgh gostydh dh'agas gwer agas honan kepar ha pan ve dhe'n Arloedh.

²³Rag an gour yw penn an venyn kepar dell yw Krist penn an eglos, ev y honan Selwador an korf.

²⁴Mes kepar dell yw an eglos gostydh dhe Grist, yndella ynwedh an gwragedh yw gostydh dh'aga gwer yn pup-tra.

²⁵Gwer, kerewgh agas gwragedh kepar dell garas Krist an eglos hag omri y honan rygdhi,

²⁶ma's gwrella sans, orth hy glanhe dre wolghas an dowr der an ger,

²⁷may proffya an eglos dhodho ev y honan, splann, heb brith na krygh, na travyth a'n par na, saw may fe hi sans ha dinamm.

²⁸Y'n keth vaner, y koedh dhe wer kara aga gwragedh, kepar ha'ga horf aga honan. Neb a gar y wreg a gar y honan.

²⁹Rag ny wrug denvyth bythkweth kasa y gig y honan, mes ev a'n mag ha'y jershya kepar dell wra Krist ynwedh maga ha chershya an eglos;

³⁰rag yth on ni eseli a'y gorf[11].

³¹‘Rag hemma, den a wra gasa y das ha'y vamm hag a vydh junys dh'y wreg, ha'ga dew a vydh unn kig.’

³²Meur yw an mysteri ma, mes my a gews a Grist ha'n eglos.

³³Byttegyns, hwi ynwedh, pubonan, kares ev y wreg kepar ha'y honan, ha'n wreg, kemmeres hi own a'y gour.