Read Kernewek Efesianys 6 Bible Online

Efesianys 6 - Kernewek bible

Efesianys 6

¹Fleghes, bedhewgh gostydh dh'agas kerens y'n Arloedh rag bos hemma gwiw.

²‘Gwra enora dha das ha'th vamm’, hag yw an kynsa arghadow gans ambos,

³‘may fo da genes ha may fewi termyn hir war an nor.’

⁴Ha tasow, na wrewgh serri agas fleghes mes megewgh i yn dyskybleth ha dyskans an Arloedh.

⁵Kethwesyon, bedhewgh gostydh dh'agas mestrysi war-lergh an kig gans own ha krena yn lelder a'n golonn kepar ha dhe Grist.

⁶Na wrewgh hemma may fewgh gwelys, ow plegya dhe dus, mes avel gwesyon Krist, ow kul bodh Duw dhiworth an enev,

⁷ow servya gans bolonjedh da kepar dell ve dhe'n Arloedh, a-der dhe dus:

⁸ow kodhvos pub den, py dader pynag a wrello, hag ev keth po rydh, dhe dhegemmeres hemma dhiworth an Arloedh.

⁹Ha'n vestrysi, gwrewgh hwi an keth tra dhedha heb godros, ow kodhvos bos an Arloedh anedha i hag ahanowgh hwi yn nev, ha nyns eus faverans ganso.

¹⁰Wor'tiwedh, bedhewgh krev y'n Arloedh, hag y'n nerth a'y alloes.

¹¹Gwiskewgh leun-arvwisk Duw may hallowgh settya orth towlow an jowl,

¹²rag nyns yw agan kas erbynn goes ha kig, mes erbynn prynsipatys, erbynn potestatys, erbynn rewloryon an bys tewl ma, erbynn luyow spyrysek a dhroktra y'n tylleryow nevek.

¹³Rakhenna, kemmerewgh leun-arvwisk Duw may hallowgh sevel y'n jydh drog, ha wosa gul pup-tra, sevel hwath.

¹⁴Sevewgh, ytho, ha'gas diwglun grogysys gans gwirder, hag ow kwiska an lurik a ewnder,

¹⁵hag owth arghena an treys gans ombareusyans a dheu dhiworth an aweyl a gres[12].

¹⁶Dres oll, kemmerewgh yn-bann an skoes a fydh may hyllowgh difeudhi pub seth ow flammya a'n tebel el,

¹⁷ha kemmerewgh an basnett a selwyans ha kledha an Spyrys, yw lavar Duw.

¹⁸Dre bub pysadow ha govenek, pysiwgh pub eur oll y'n Spyrys; ha dhe'n porpos na, bedhewgh hewoel gans pub diwysykter ha pysadow rag oll an syns,

¹⁹ha ragov vy, may fo kows res dhymm, ha my owth igeri ow ganow, dhe dhyllo yn hardh mysteri an aweyl.

²⁰Rygdhi kannas yn chaynys ov vy, may hylliv hy derivas yn hardh dell goedh dhymm kewsel.

²¹Lemmyn, may hwodhvowgh hwi ynwedh fatell yw genev, ha pandr'a wrav, pup-tra a wra derivas orthowgh Tyghikus, an broder karadow ha menyster len y'n Arloedh,

²²neb re dhannvenis dhywgh rag an keth tra ma, may hwodhvowgh a-dro dhyn, ha may kennertho agas kolonn.

²³Kres dhe'n vreder ha kerensa gans fydh dhiworth Duw an Tas ha'n Arloedh Yesu Krist.

²⁴Re bo gras gans pubonan a gar agan Arloedh Yesu Krist gans kerensa anvarwel.