Read Kernewek Filippianys 1 Bible Online

Filippianys 1 - Kernewek bible

Filippianys 1

¹1 Powl ha Timothi, gwesyon Krist Yesu, Dhe oll an syns yn Krist Yesu usi yn Filippi gans an epskobow ha'n dhyagonyon:

²Gras dhywgh hwi ha kres dhiworth Duw agan Tas ha'n Arloedh Yesu Krist.

³Grassav dhe'm Duw yn pub kov ahanowgh

⁴prest ow pysi ragowgh hwi oll gans lowena yn oll ow fysadow,

⁵yn agas kowethyans y'n aweyl dhiworth an kynsa dydh bys y'n eur ma,

⁶ow trestya dhe'n keth tra ma: neb re dhallathas gwrians da ynnowgh dh'y gowlwul bys yn dydh Yesu Krist;

⁷dell yw gwiw ragov dhe brederi ahanowgh hwi oll, rag ottahwi genev y'n golonn; rag hwi oll yw kevrennoryon genev a ras, hag y'm kolmow hag yn mentons ha kompoesans a'n aweyl.

⁸Rag Duw yw ow thest fatell yeunav ragowgh hwi oll yn kolonyow Krist Yesu.

⁹Ha hemma my a bys, may hwrello agas kerensa palshe moy ha moy yn godhvos ha pub konvedhes,

¹⁰rag dissernya an taklow yw an gwella, may fewgh lel ha divlam bys yn dydh Krist,

¹¹lenwys a frut ewnder dre Yesu Krist dhe wordhyans ha gormola Duw.

¹²A vreder, my a vynn hwi dhe wodhvos, an taklow re hwarva dhymm dhe dreylya yn hwir dhe avonsyans an aweyl,

¹³may teuth ha bos apert yn oll an pretorium ha dhe bub den arall, ow holmow dhe vos yn Krist,

¹⁴ha'n brassa rann a'n vreder, kolonnekhes y'n Arloedh der ow holmow, yw moy hardh dhe gewsel an ger[1] heb own.

¹⁵Dhe wir, re a bregoth Krist der envi ha strif, mes re ynwedh dre volonjedh da;

¹⁶an re ma dre gerensa, ow kodhvos my dhe vos gorrys omma rag mentons an aweyl,

¹⁷an re na bregoth Krist dre gesstrif, heb lelder, mes hwansek dhe ynkressya ow godhevyans y'm kolmow.

¹⁸Pandra, ytho? Yn despit dhe henna, Krist yw pregewthys yn pub fordh, po yn falsuri po yn gwir, hag yn henna y lowenhav. Mes my a vynn lowenhe ynwedh,

¹⁹rag my a woer siwyans hemma dhe vos ow selwyans der agas pysadow, ha gweres res gans Spyrys Yesu Krist,

²⁰war-lergh ow gwaytyans ha'm govenek na vydhav shamys yn travyth, mes y fydh Krist meurhes gans bolder leun avel pup-prys, hag y'n eur ma ynwedh y'm korf, po dre vewnans po dre vernans.

²¹Rag dhymmo vy bewa yw Krist ha merwel yw gwayn.

²²Mes bewa y'n kig, hemm yw frut ow ober, ha ny wonn pandr'a vynnav dewis.

²³Yth esov vy yn kaletter ynter an dhew, ow pos hwansek dhe vos dhe-ves ha bos gans Krist, rag henn yw meur gwell;

²⁴mes moy res yw ragowgh hwi my dhe wortos y'n kig.

²⁵Sur ov vy a-dro dhe hemma, ha my a woer my dhe wortos ha pesya genowgh rag agas avonsyans ha lowena y'n fydh,

²⁶rag may palshaho agas bostyans yn Krist Yesu ynnov, rag my dhe dhos dhywgh arta.

²⁷Saw bedhes agas bewedh gwiw dhe'n aweyl a Grist, mar tov dh'agas gweles po gortos a-ves, may klewviv ahanowgh, hwi dhe sevel yn unn spyrys gans unn enev, ow strivya war-barth rag fydh an aweyl,

²⁸heb bos ownekhes yn travyth gans agas eskerens. Hemm yw prov a dhiswrians dhedha i, mes a'gas selwyans hwi, ha hemma dhiworth Duw.

²⁹Rag y feu res dhywgh a-barth Krist, ha krysi dhodho hag ynwedh godhevel ragdho,

³⁰hag yma genowgh an keth strif a welsowgh ynnov, ha lemmyn a glewowgh bos ynnov.