Read Kernewek Filippianys 2 Bible Online

Filippianys 2 - Kernewek bible

Filippianys 2

¹Ytho, mars eus konfort yn Krist, mars eus solas kerensa, mars eus kowethyans a'n Spyrys, mars eus truedh ha piteth,

²gwrewgh lenwel ow lowena, ow prederi an keth tra gans an keth kerensa yn unn spyrys, unn tybyans,

³heb gul travyth dre gesstrif na dre woeth, mes yn uvelder, ow synsi pub den arall dhe vos gwell agesowgh agas honan,

⁴heb mires orth agas les agas honan mes orth les tus erell kekeffrys.

⁵Kemmerewgh yn agas mysk an tybyans ma esa ynwedh yn Krist Yesu;

⁶kyn feu yn furv Duw, ny dybis bos par dhe Dhuw avel neppyth dhe sesya,

⁷mes yth omwakhas y honan, ha kemmeres furv gwas, devedhys yn hevelep tus; ha kevys yn furv den

⁸ev a omuvelhas ha dos ha bos gostydh bys yn ankow, mernans yn krows.

⁹Rag hemma, Duw a'n ughelhas yn feur ha ri dhodho an hanow[2] yw dres pub hanow,

¹⁰yn hanow Yesu may plekkya pub glin, an re yn nev, an re war an nor, ha'n re yn-dann an nor,

¹¹ha mayth avowa pub taves bos Yesu Krist Arloedh, dhe wordhyans Duw an Tas.

¹²Ytho, ow howetha garadow, kepar dell vewgh pup-prys gostydh pan esen genowgh hwi, oberewgh agas selwyans agas honan gans own ha kren hwath moy lemmyn pan esov dhe-ves.

¹³Rag Duw yw neb a ober ynnowgh, ha dhe vynnes ha dhe oberi orth bodh y vrys.

¹⁴Gwrewgh pup-tra heb krodhvolas na disputya,

¹⁵may fewgh divlam ha heb drog, fleghes heb namm a Dhuw, yn mysk kenedhel gamm ha treus, ha hwi a splann yn aga mysk kepar ha golowys y'n bys,

¹⁶ow synsi fast an ger a vewnans, may hylliv bostya yn dydh Krist na wrug vy poenya yn euver na lavurya yn euver.

¹⁷Mes dhe wir, mars ov skoellys avel offrynn diwes war agas sakrifis ha'n gonis a'gas fydh, my a lowenha ha keslowenhe genowgh hwi oll;

¹⁸hag y'n keth vaner, hwi ynwedh a lowenha ha keslowenhe genev.

¹⁹Mes my a wayt y'n Arloedh Yesu dannvon Timothi dhywgh hwi kyns nep-pell, may fiv vy konfortys, my ynwedh, ow kodhvos nowodhow ahanowgh.

²⁰Rag nyns eus genev denvyth a'n keth brys, a vydh prederus yn hwir yn agas kever.

²¹Rag pubonan anedha a hwila aga les aga honan; ny hwilons i les Krist Yesu.

²²Mes y gnas ev hwi a's aswonn; ev dhe wonis genev y'n aweyl kepar ha mab gans tas.

²³An keth hemma, ytho, my a wayt y dhannvon dhywgh kettell welliv fatell vydh taklow genev,

²⁴mes my a drest y'n Arloedh my dhe dhos ow honan kyns nep-pell.

²⁵Mes my a dybis bos res dannvon dhywgh Epafroditus, ow broder, kesoberer ha kessouder ha'gas kannas, ha menyster a'm edhomm,

²⁶a-ban yeuni ev war agas lergh pubonan, ha troblys veu rag hwi dhe glewes y vos klav.

²⁷Dhe wir, klav ova bys yn ankow. Mes Duw a dhiskwedhas tregeredh dhodho, ha nyns esa dhodho ev yn unnsel mes dhymmo vy ynwedh, na gaffen keudh war geudh.

²⁸Ytho, dhe frettha my re'n dannvonas, may lowenhahowgh orth y weles arta, ha may fiv vy dhe le troblys.

²⁹Rakhenna degemmerewgh ev y'n Arloedh gans lowena oll, ha gwrewgh enora tus a'n par na,

³⁰rag der ober Krist, ev a dheuth bys yn ankow, ow peryllya y vewnans dhe gollenwel an gweres na yllewgh ri dhymm.