Read Kernewek Filippianys 3 Bible Online

Filippianys 3 - Kernewek bible

Filippianys 3

¹Wor'tiwedh, ow breder, gwrewgh lowenhe y'n Arloedh. Dhymmo vy nyns yw dihedh skrifa an keth taklow dhywgh, mes dhywgh hwi sawder yw.

²Bedhewgh war a'n keun, bedhewgh war a'n dhrogoberoryon, bedhewgh war a'n fals tregh,

³Rag yth on ni an trodreghyans gwir,[3] neb a wra gordhya dre Spyrys Duw ha bostya yn Krist Yesu, heb trestya y'n kig —

⁴kyn fo dhymmo vy ow honan ynwedh reson dhe drestya y'n kig. Mars eus den arall a drest y'n kig, my a drest dhe voy:

⁵trodreghys an ethves dydh, a'n genedhel a Ysrael, a loeth Benyamin, Ebrow a Ebrowyon, Farise war-lergh an lagha,

⁶a-dro dhe dhiwysykter, ow persekutya an eglos; a-dro dhe ewnder y'n lagha, divlam.

⁷Mes an taklow ma hag o gwayn dhymm, an re ma my re's synsis koll rag Krist.

⁸Moy es henna, my a syns bos pup-tra koll rag an pris dres eghenn a aswonnvos Krist Yesu ow Arloedh, rag neb my a gollas pup-tra, ha my a syns y vos skoellyon may kyffiv Krist,

⁹ha may fiv kevys ynno, heb kavoes ow ewnder vy a dheu a'n lagha mes an ewnder a dheu dre fydh yn Krist, an ewnder a dheu a Dhuw, selys war fydh;

¹⁰rag y aswonnvos ev ha galloes y dhasserghyans, ha kevrenn yn y alarow, kesformys yn y vernans,

¹¹war neb kor may hylliv attaynya dasserghyans dhiworth an re varow[4].

¹²Nyns yw my dhe waynya seulabrys, po my dhe vos gwrys perfydh, mes my a striv, mar kallav synsi kepar dell veuv synsys ynwedh gans Krist Yesu.

¹³A vreder, ny amontyav my dhe synsi an gober ow honan. Mes unn dra a wrav: yth ankovav an taklow usi war ow lergh, hag yth ystynnav troha'n taklow usi a-dheragov,

¹⁴my a striv troha'n peul-diwedh rag gober an galow yn-bann a Dhuw yn Krist Yesu.

¹⁵An re ahanan ytho yw gwrys perfydh, prederyn hemma; ha mar prederowgh ken, hemma ynwedh Duw a dhiskwedh dhywgh.

¹⁶Byttegyns le may trehedhsyn, gwren kerdhes y'n keth hemma[5].

¹⁷Gwrewgh war ow lergh, a vreder, ha notyewgh an re a gerdh yndella, kepar dell on ni ensampel dhywgh.

¹⁸Rag lies den a gerdh, a neb my a leveris dhywgh yn fenowgh, hag y lavarav lemmyn owth oela, aga bos eskerens a'n grows a Grist.

¹⁹Aga diwedh yw diswrians, aga duw yw an dorr, hag yma aga glori yn aga meth, gorrys aga brys war daklow an dor.

²⁰Rag yma agan sita y'n nevow, ha ni a wayt gans mall Selwador dhiworti, an Arloedh Yesu Krist,

²¹neb a wra treylya agan korf uvel dhe gorf kehaval dhe'n korf a'y splannder, dre oberyans y alloes dhe worra pup-tra yn-danno ev.